Read DIOSPA QHELQACHISQ Quechua LAMENTACIONES 5 Bible Online

LAMENTACIONES 5 - DIOSPA QHELQACHISQ Quechua bible

LAMENTACIONES 5

¹Señor Diosníy, imachus sucedewasqankuta yuyariy, qhawariwayku imaynachus p'enqachisqa kasqaykuta.

²Llapan hallp'aykupas wak llaqtayoqkunaq makinpiñan, llapan wasiykupas karu llaqtayoqkunaq makinpiñan.

³Wakchan kapuyku mana taytayoq, mamaykupas viuda hinan qheparqapun.

⁴Ukyanaykupaq unutapas rantikapushaykun, llant'amantapas pagapushaykun.

⁵Uywa hina soq'aspa qatisqan kashayku, sayk'urqapuykun, manañan samarichiwankuñachu.

⁶Mikhunayoq kanaykupaqmi makiykuta haywarikurqayku Egipto runakunaman, Asiria runakunamanwan.

⁷Tayta-mamaykun huchallikurqanku, paykunaqa wañupunkuñan, ñoqaykun rantinkupi muchushayku.

⁸Kunanqa kamachikunaq kamachisqanmi kapuyku, manataq pipas makinkumanta horqoqniyku kanchu.

⁹Wañuchiqkunan campopi kashanku, chaymi sinchi sasawan mikhunaykutapas tariyku.

¹⁰Aycha qaraykupas horno hinan rawrarin, yarqaymanta ruphapakuy onqoy hap'iwasqankurayku.

¹¹Sión llaqtapin warmikuna violasqa rikukurqanku, Judá llaqtakunapin sipaskuna violasqa kapurqanku.

¹²Qollana runakunan makinkumanta warkusqa karqanku, kurak runakunapas mana respetasqan karqanku.

¹³Waynakunatan maranpi kutaqpaq churarqanku, erqekunataqmi llant'a q'epiq ñit'isqan karqanku.

¹⁴Llaqta punkukunapiqa manan kurak runakuna kapunñachu, waynakunaq tocasqanpas manan uyarikunñachu,

¹⁵sonqoykupi kusikuypas manan kapunñachu, tusuyniykupas llakimanmi tukupun.

¹⁶Mentasqa-kayniykupas manan kapunñachu. ¡Ay, imaraqmi ñoqaykumanta! ¡Huchallikurqaykun!

¹⁷Chayraykun sonqoykupas chiriyaykapun, chayraykun ñawiykupas ayphayaykapun,

¹⁸Sión orqoq yanqa raqay-raqay kasqanmanta, chacal animalkunaq chayninta kuti-tikrasqanmanta.

¹⁹Qanmi ichaqa, Señor Diosníy, wiñaypaq kamachikunki, miray-miraykunapin kamachikunki.

²⁰¿Imanaqtintaq pasaqta qonqarparipuwankiku? ¿Imanaqtintaq kay hina unayri wikch'urparipuwankiku?

²¹Señor Diosníy, qanman kutirichiwayku, hinan kutirimpusaqku, imaynan ñawpaq kawsayniyku karqan chay hina kunanpas kachun.

²²Icha, ¿pasaqtachu mana munapuwankiku? Icha, ¿sinchi phiñasqapunichu ñoqaykupaq kapunki?