Read DIOSPA QHELQACHISQ Quechua EZEQUIEL 13 Bible Online

EZEQUIEL 13 - DIOSPA QHELQACHISQ Quechua bible

EZEQUIEL 13

¹Señor Diosmi nillawarqantaq:

²Qan, runaq churin, niy Israelpa profetankuna contra, kikillankumanta rimaq profetakunata: ¡Uyariychis Señor Diospa siminta!

³Apu Señor Diosmi nin: ¡Imanallanqapunin kikinkuq yuyaynillankumanta llullakuspa yanqa rimaq uman muyusqa profetakunaqa!

⁴Yaw, Israel, profetaykikunaqa raqay-raqaypi tiyaq atoqkuna hinan.

⁵Israel llaqtaq perqanpa q'asankunataqa manan wisq'aykurqankuchu, chay hinaqa manan atikunqachu Israelta amachay, Señor Diospa phiñakuynin p'unchay chayamuqtin.

⁶Rikhuriy rikusqankuqa yanqan, willakusqankupas llullan. Paykunan ninku: Señor Diosmi kay hinata nin, nispa, manataqmi kamachirqanichu rimanankupaqqa. Chaywanpas rimasqanku hunt'akunantan suyanku.

⁷Yaw, profetakuna, qankunaq rikhuriypi rikusqaykichisqa yanqan. ¡Willakuyniykichispas llullan! Qankunan ninkichis: Señor Diosmi kay hinata nin, nispa, manataqmi imatapas nirqaykichischu.

⁸Chayraykun ñoqa Apu Señor Diosqa niykichis: Qankunaq rikhuriyniykichispas willakuyniykichispas llullan, chayraykun ñoqa Apu Señor Diosqa qankuna contra kani.

⁹Llullakuspa willakuq yanqa rikhuriymanta rimaq profetakunaq awqaykichismi tukupusaq. Manan qankunaqa Israel llaqtaypa huñukuyninpi kaytaqa atinkichischu, manan sutiykichispas Israel llaqtaypa miraynin qelqapi kanqachu, manallataq Israel suyumanpas haykunkichischu. Ahinapin ñoqa Apu Señor Dios kasqayta reqsiwankichis.

¹⁰Qankunan llaqtayta q'otunkichis: Lliw imapas allinmi kashan, nispa, manataq hinapaschu kashaqtin. Runakunan yanqa perqata sayarichirqan, qankunataq patanman iskuwan llunch'iqkuna kankichis.

¹¹Ñoqan niykichis, yaw, llunch'iqkuna, perqaykichisqa kumpakapunqan, para lloqlla hatariqtin, rumi hina chikchi chayaqtin, muyuq tutuka hatun wayra hamuqtin.

¹²Perqa ruwasqaqa kumpakunqan. Chaymi tapusunkichis: ¿Maytaq iskuwan llunch'isqaykichisri? nispa.

¹³Chayraykun ñoqa Apu Señor Diosqa nini: K'arakta phiñakuspaymi muyuq tutuka hatun wayrata kachamusaq, para lloqllatapas hatarichimusaq, hatuchaq rumita hinan chikchitapas chayachimusaq pasaqta thuninanpaq.

¹⁴Kumpasaqpunin qankunaq llunch'isqaykichis perqataqa yanqa pampa kanankama, teqsinpas rikhurinankamaraq. Arí, kumpasaqpunin perqataqa, qankunataqmi wañunkichis chay pasaq thunisqa perqa ukhukunapi, chaypiraqmi reqsiwanqaku ñoqapuni Señor Diosqa kasqayta.

¹⁵Chay perqapin llunch'iqninkunapiwan phiñakuyniyta thasnukusaq, runataqmi ninqa: Manan kapunchu perqapas llunch'iqninpas, nispa.

¹⁶Israelpa profetankuna, chay hinan qankunaqa kankichis, rikhuriypi rikusqaykichistan llullakuspa Jerusalenman: Allillanmi kashan, nirqankichis, manataq hinapaschu kashaqtin. Ñoqa Apu Señor Diosmi chayta nini.

¹⁷Qan, runaq churin, kunanqa llaqtaykipi kikillankumanta sutiypi yanqa profetizaq warmikuna contra sayariy, paykuna contra profetizay.

¹⁸Apu Señor Diosmi nin: ¡Imaraqmi qankunamanta runaq sonqonta suwaspa puriqkuna! Qankunaqa llapan runaq makinmanmi layqana p'alta watukunata sirankichis, ruwallankichistaq imaymana sayayta uyantin uma qatanakunata. Ahinatan llaqtayta mikhuyta munankichis, qankunapaq allin kananta munaspa.

¹⁹Qankunan qhellichawankichis llaqtay ukhupi huk hach'iy cebadawan t'anta ñut'usqapiwan watuspa. Llaqtaytan q'otunkichis, paykunaqa llullakuyta uyariqlla kasqankurayku, hinan mana wañunanpaq kaq runata wañuchirqankichis, wañunanpaq kaqtañataq kawsachirqankichis, nispayki.

²⁰Chayraykun ñoqa Apu Señor Diosqa nini: Ñoqapunin chay layqana p'alta watukuna ruwasqaykichista cheqnikuni, chaywanmi qankunaqa runakunata pichinchuta hina hap'inkichis. Ñoqan qankunaq chay hina munaychakuyniykichismanta chay runakunata kacharipusaq.

²¹Uma qatakusqaykichista q'alaraspan, llaqtayta qechukapusqaykichis, manañataq hayk'aqpas hap'iyta atinkichischu. Hinaspan qankuna reqsiwankichis ñoqa Señor Diosqa kasqayta.

²²Qankunan llullakuspa chanin runakunata llakichirqankichis, mana imamanta llakichinay kashaqtin, qankunan millay runakunata aswanta tanqarqankichis millay ruwayninkuta mana saqenankupaq, chay hinapi mana qespikunankupaq.

²³Chaymi kunan manaña llulla rikhuriykunata rikunkichisñachu, manañataqmi watunkichispaschu. Ñoqan llaqtayta makiykichismanta qechukapusqaykichis, hinan qankuna reqsiwankichis ñoqa Señor Diosqa kasqayta, nispa.