Read DIOSPA QHELQACHISQ Quechua EZEQUIEL 16 Bible Online

EZEQUIEL 16 - DIOSPA QHELQACHISQ Quechua bible

EZEQUIEL 16

²Qan, runaq churin, lliw millay p'enqay ruwasqankuta Jerusalén llaqtaman rikuchiy.

³Niytaq, Apu Señor Diosmi nin: Jerusalén, qanqa Canaán suyupin paqarirqanki nacerqankipas. Taytaykiqa Amor llaqta runan karqan, mamaykitaqmi Het warmi karqan.

⁴Paqarisqayki p'unchaypiqa manan pupuykita kuchurqasunkikuchu, manan maqchirqasunkikuchu, manan kachiwanpas hawirqasunkikuchu, manallataqmi walthaykurqasunkikupaschu.

⁵Manapunin pillapas qantaqa khuyapayarqasunkikuchu chaykunata ruwanankupaq. Paqarisqayki p'unchaymi qanta millakuspanku q'ala pampaman wikch'urqasunkiku.

⁶Hinan ñoqaqa qayllaykita purishaspa rikurqayki, qhellillaña yawarniykipi qhospashaqta, hinaspan: ¡Kawsankin! nirqayki.

⁷Hinaspataqmi sumaqta wiñachipurqayki, campopi sumaq qorata hina. Astawanmi wiñarqanki hatunyarqanki, sipasyarqanki. Ñuñuykikunapas allichachaqmi rikhurirqan, chukchaykipas wiñarqanmi, ichaqa mana p'achayoq q'alallan kasharqanki.

⁸Wakmanta qayllaykita purishaspaymi rikurqayki, hinan qhariyoq kanaykipaq allinña kashasqanki, capaywantaq q'ala cuerpoykita pakaykurqayki, hinaspan qanta munakunaypaq rimaykurqayki. Qanwanmi rimanakapurqani, hinan ñoqaq kapurqanki. Ñoqa Apu Señor Diosmi chayta nini.

⁹Yawar qhellimantan qanta maqchirqayki, q'apaq aceitewantaq hawiykurqayki.

¹⁰Sumaq bordasqa p'achawanmi churaykurqayki, allin qaramanta usut'awan ima. Qollarqaykitaqmi linomanta chumpita, seda mantontapas.

¹¹Alhajakunawanmi k'achancharqayki, makiykipaqpas chipanatan qorqayki, kunkaykiman walqakunaykipaqpas walqanata,

¹²senqaykiman warkukunaykipaqpas huk siwita, ninriykikunapaqpas aretekunata, umaykipaqpas sumaq coronata.

¹³Chay hinan qoriwan qolqewan sumaqchasqa karqanki, p'achaykikunapas sedamantan karqan, sumaq bordasqa linomantawan. Mikhurqankipas sumaq allin t'antakunallatan, miel misk'ita, olivo aceitetawan. Munay k'achamanmi tukuykurqanki, hinaspataq reyna kapurqanki.

¹⁴K'acha-kayniyki hawan lliw suyukunaq allin mentasqan karqanki, sonqo suwapunin karqanki sumaq k'achanchasqaywan. Ñoqa Apu Señor Diosmi chayta nini.

¹⁵Qanmi ichaqa sumaq-kayniykiman hap'ipakurqanki, allin mentasqa kayniykiman hap'ipakuspan rabona warmiman tukuykapurqanki, llapan qayllaykipi puriqkunamanmi huchallikunaykipaq entregakurqanki.

¹⁶P'achaykikunawanmi color-color karpata moqo patakunapi ruwakurqanki wak'a diosta yupaychanapaq, chaypitaqmi hukkunawan kaspa wasanchawarqanki. Chay hina ruwayqa manan hayk'aqpas karqanchu, kanqapaschu.

¹⁷Qorimanta qolqemanta k'achanchakuna qosqaymantan ruwakurqanki qhariman rikch'akuq idolokunata, chaykunawantaq wasanchawarqanki.

¹⁸Sumaq bordasqa p'achaykiwanmi churakurqanki, ñoqaq aceiteyta inciensoytawantaq chaykunaman haywarqanki.

¹⁹Ñoqan qorqayki sumaq mikhunata: Ñut'u hak'uta, aceiteta, misk'itawan, chaykunatan qanqa haywarqanki sumaq q'apaq ofrendata hina wak'a diosniykikunaman. Ñoqa Apu Señor Diosmi chayta nini.

²⁰Chaymantapas ñoqapaq wachakusqayki wawaykikunatan mikhuna sacrificiota wak'a dioskunaman haywarqanki. Rabona warmiña kashaspapas, aswantaraqmi huchallikurqanki,

²¹wawaykunatapas wak'a dioskunaman ruphachispa sacrificiota haywallarqankitaq.

²²Cheqnikusqayta ruwaspaykin rabona kaspa manaña yuyarikurqankichu sipas kaspayki pasaq q'alalla kikin yawarniykipi qhospasqaykitapas.

²³Ñoqa Apu Señor Diosmi nini: ¡Ay, ikiraqmi, imaraqmi qanmanta! Lliw mana allinkuna ruwasqayki qhepamanpas,

²⁴wasanchawanaykipaq huk cheqasta ruwakurqanki, sapanka plazakunapi wak'a dioskunapaq yupaychana cheqastapas ruwallarqankitaq.

²⁵Sapanka callekunapin yupaychana cheqasta ruwakurqanki, sumaq k'acha-kayniykitataq tukuchirqanki millay ruwayman, cuerpoykita lliw puriqkunaman entregakuspayki aswan-aswanta qhellichakurqanki.

²⁶Suyumasiyki Egipto qhencha runawanmi qhellichakurqanki, hinaspan phiñachiwarqanki aswan-aswanta qhellichakuspayki.

²⁷Chaymi makiyta haywarimuspa qanta muchuchirqayki, hinaspan hallp'aykita qechuchirqayki. Suyumasiyki Filistea runakunamanmi hap'iykachirqayki, paykunaqa cheqnikusunkin, sinchi millay ruwasqaykiwanmi paykunaqa p'enqakurqanku.

²⁸Chaywanpas manan kusisqachu karqanki, Asiria runakunawanpas qhellichakurqankin, chaypas manallataqmi saksarqankichu.

²⁹Kaqllataqmi qhellichakurqanki Babilonia suyu runakunawan, chay comerciantekunawan, chaywanpas manapunin saksarqankichu.

³⁰Chayraykun ñoqa Apu Señor Diosqa nini: ¡Imayna loqhe sonqoyoqpunin karqanki, chay hinata ruwaq mana p'enqakuq coles uya rabona!

³¹Sapanka callekunapin wasanchawanaykipaq wasita ruwakurqanki, sapanka plazakunapitaq wak'a dios yupaychana cheqasta ruwakurqanki. Chaywanpas qanqa manan wakin rabona hinachu karqanki, pagota qoqtinkupas wikch'uykukurqankin.

³²¡Wasanchaq warmi! Qosaykiwan kanaykitaqa wak qharikunatan chaskinki.

³³Llapan rabona warmimanqa pagankupunin, qanmi ichaqa llapan munaqniykikunaman pagarqanki, qanwan puñuq hinantinmanta hamunankupaqtaq sumaq sonqota qorqanki.

³⁴Hucha ruwayniykipin wakin warmikunamanta qanqa huk-hinata ruwanki. Manan pipas qantaqa maskhasunkichu hucha ruwananpaq, manataq paykunaqa imatapas qosunkikuchu, aswanpas qanmi paykunaman qonki, chay hinapin huk-hina wakinkunamanta kanki.

³⁵¡Yaw, wasanchaq rabona warmi, rimasqayta uyariy!

³⁶Ñoqa Apu Señor Diosmi nini: Qanmi mana p'enqakuspa cuerpoykita q'alakurqanki munaqniykikunaq qhelli hucha ruwananpaq, hinallataq millay p'enqay diosniykikunata yupaycharqanki, paykunaman sacrificiota haywanaykipaqtaq wawaykikunata nak'arqanki.

³⁷Chayraykun huñurqosaq llapan munaqniykikunata, munasqaykikunatapas, cheqnisqaykikunatapas. Paykunatan qan contra hinantinmanta huñumusaq, hinaspan paykunaq qayllanpi q'alasqayki lliw rikunasuykipaq.

³⁸Juzgasqaykin wasanchaq kasqaykimanta, runa wañuchiq kasqaykimantawan, k'arakta phiñakuspaymi wañuyman hap'iykachisqayki.

³⁹Munaqniykikunaq makinmanmi hap'iykachisqayki, paykunan thuninqaku wasanchawanayki cheqaskunata wak'a diosniykikuna yupaychana cheqaskunatapas. P'achaykitapas llik'inqakun, sumaq alhajaykikunatapas qechusunkikun, hinaspataqmi q'alallata wikch'upusunkiku.

⁴⁰Contraykipin askha runata sayarichimunqaku, hinan ch'aqesunkiku, espadankuwantaq kuchurqarisunkiku.

⁴¹Wasiykikunatan ninawan kanaykunqaku, askha warmikunaq qayllanpitaq huchaykimanta muchuchisunkiku. Rabona kayniykitan chinkachipusaq, manañan munaqniykikunaman pagankiñachu.

⁴²Hinan qan contra k'arak phiñakuyniy thasnukapunqa, sonqoypas tiyaykapunqa, manañataq phiñakusaqchu.

⁴³Qanqa qonqarqapunkin sipas kasqaykitaqa, hinaspataqmi phiñachiwarqanki chay millay huchakunawan, chayraykun chay ruwasqaykikunamanta ñak'arichisqayki. Qanqa millay hucha ruwasqaykikunaman aswantaraqmi huchakunata yapaykurqanki. Ñoqa Apu Señor Diosmi chayta nini.

⁴⁴Rimaypi rimaqkunan kay rimayta qanmanta ninqaku: “Chhayna mamaq ususinqa kasqallantaqmi”, nispa.

⁴⁵Qanqa kanki mamayki kikillanpunin, qosanta cheqnikuq wawanta mana rikuy atiq, qanqa kanki ñañaykikuna kikillanpunin, qosankutapas wawankutapas pisichaqllataq. Qankunaq mamaykichisqa Het warmin karqan, taytaykichisñataq Amor llaqta runa karqan.

⁴⁶Kurak ñañayki Samaria llaqtaqa, wichay ladoykipin tiyakurqan ususinkunantin, sullk'a ñañayki Sodoma llaqtañataq uray ladoykipi tiyakurqan ususinkunantin.

⁴⁷Qantaq kanki paykunamanta yachaqakuq, millay p'enqay ruwayninkuta ruwaq. Manan chaywanpas saksankichu, qanpa ruwasqaykiqa paykunaqmantapas aswanraqmi.

⁴⁸Ñoqa Apu Señor Diosmi sutiyrayku jurani, manan Sodoma ñañaykipas ruwarqanchu qanpapas ususiykikunaqpas ruwasqaykichista hinaqa.

⁴⁹Sodoma ñañaykiq hucha ruwasqanqa kaykunan: Payqa ususinkunantinmi sinchi uma hoqariqllapuni karqanku, paykunaqqa askhapunin mikhuyninku karqan, mana pimanta yuyarikuspan llakhilla kawsarqanku, manataq hayk'aqpas yanapaykurqankuchu pisichikuqtapas wakchakunatapas.

⁵⁰Umatan hoqaripurqanku, ñoqaq cheqnikusqaytataqmi ruwarqankupas, chayraykun ch'usaqyachipurqani rikusqaykita hina.

⁵¹Samaria llaqtan ichaqa qanpa huchallikusqaykimantaqa mana kuskallantapas huchallikurqanchu, paypa ruwasqankunamantaqa sinchitapunin millay p'enqaykunata ruwarqanki. Millay huchaykikunatawan tupachiqtiyqa, ñañaykikunaqa mana huchayoq hina qhawarisqan.

⁵²Qanqa p'enqakuymanta k'umurayay, ñañaykikunamanta aswan millay huchayoq kasqaykirayku, paykunaqa mana huchayoq hina qhawarisqan. Qanqa p'enqakuymanta k'umurayay sonqoymi nispa, huch'uyyaykukuspa ñañaykikunata mana huchayoqta hina horqosqaykimanta.

⁵³Ñoqaqa wakmantan t'ikarichisaq Sodomata, Samariata, ususinkunatapas, kaqllataq qantapas wakmantan t'ikarichisqayki.

⁵⁴Qantaqmi ruwasqaykikunamanta huch'uyyaykukuspa sonqoymi nispa k'umurayanki, chayta rikuspan ñañaykikunaq sonqon tiyaykunqa.

⁵⁵Paykunapas ñawpaq hina wakmanta t'ikariqtinkun qanpas ususikunantin ñawpaq hina t'ikaripullankitaq.

⁵⁶Qanmi asikurqanki ñañayki Sodomamanta sinchita umata hoqarispayki,

⁵⁷huchayki manaraq sut'inchasqa kashaqtin. Kunanmi ichaqa Edom llaqtapas Filistea llaqtapas llapan qayllaykipi kaqkunapas asipayasunkiku, llapankutaq cheqnisunkiku.

⁵⁸Qanqa hinapunin muchunayki millay p'enqay ruwasqaykikunamanta. Ñoqa Señor Diosmi chayta nini.

⁵⁹Ñoqa Apu Señor Diosmi nini: Qopusqaykipunin tupaqniykita, qanqa rimarisqaykitan mana hunt'arqankichu, rimanakusqaykitapas p'akipurqankin.

⁶⁰Chaywanpas ñoqaqa yuyarisaqmi sipas kashaqtiyki rimanakusqanchista, wiñaypaqmi qanwan wakmanta rimanakusaq.

⁶¹Wakmantan qopusqayki kurak ñañaykikunata sullk'a ñañaykikunatawan ususiykikuna kanankupaq, chaskikapusqaykitaqmi, hinaspan ñawpaq ruwasqaykikunata yuyarispa p'enqakapunki. Kay qosqayqa rimanakusqanchismanta sapaqmi.

⁶²Ñoqataqmi qanwan wakmanta rimanakusaq, hinan reqsiwanki ñoqapuni Señor Diosqa kasqayta.

⁶³Qanta lliw millay ruwasqaykimanta pampachaqtiymi yuyarikunki, hinaspan pasaqta p'enqakapunki, p'enqakuspaykitaqmi manaña rimarillankipaschu. Ñoqa Apu Señor Diosmi chayta nini, nispa.