Read DIOSPA QHELQACHISQ Quechua EZEQUIEL 17 Bible Online

EZEQUIEL 17 - DIOSPA QHELQACHISQ Quechua bible

EZEQUIEL 17

¹Señor Diosmi niwarqan:

²Qan, runaq churin, Israel llaqtaman huk rikch'anachiyta willay watunankupaq.

³Niytaq, Apu Señor Diosmi nin: Hatun ankan Libanoman chayarqan, mast'arisqa raphranpas hatunpunin kasqa, askha color sumaq phuruyoqmi kasqa. Cedro mallkitan umanmanta hap'irqan,

⁴mallkiq ñawintan p'itirqorqan, comerciantekunaq hallp'anmanmi aparqan, askha qhatunayoq llaqtamanmi mallkimurqan.

⁵Pampamanta muhuta hoqarispataq, allin hallp'aman t'akarqan, mayu pataman sauceta hina askha unuq kasqanman.

⁶Muhutaq wiñarqamuspa allin uvas sach'aman tukurqan. Huch'uyllaña karqan chaypas, raphinqa ankaq kasqanmanraqmi t'iksurqan, saphintaq ukhumanraq saphiykusharqan, uvas sach'amanmi tukurqan, allinta p'arqarirqan, raphinpas askhan karqan.

⁷Kallarqantaq huk hatun anka, hatun raphrayoq askha phuruyoq. Uvas sach'ataq mallkisqa kasqan cheqasmanta chay ankamanñataq saphinta mast'arirqan, raphintapas t'iksurirqan qarpachikunanpaq.

⁸Allin hallp'api mallkisqan kasharqan, askha unuyoqmi kasharqan, allinta k'allmanpas q'omeryananpaq, allin askhata rurunanpaq, allin uvas sach'aman tukunanpaq.

⁹Niy, Apu Señor Diosmi nin: Kay uvasqa, ¿allinchu kanqa? Ñawpaqkaq ankaqa, ¿manachu saphinmanta t'irarqonqa? ¿Manachu ruruntapas qechupunqa? ¿Manachu ch'ikchimusqanpas ch'akipunqa, mana kallpayoqpapas pisi runaqllapas t'iranankama?

¹⁰¿Wakmantaña tarpuqtinkupas wiñanmanñachu? Inti lloqsimuy rupha wayra wayramuqtinqa, ¿manachu ch'akipunqa? Wiñasqan hallp'api chay sach'aqa ch'akipunqan, nispa.

¹¹Señor Diosmi nillawarqantaq:

¹²Kay mana kasukuq llaqtata tapuykuy: ¿Atinkichu kay rikch'anachiy watuyta? nispa. Nillaytaq: Babilonia reymi Jerusalenta rirqan, hinaspan Judá suyu reyta llapan umalli runakunatawan presota Babiloniaman apamurqan.

¹³Chaymantataqmi Judá reypa ayllun huk runawan rimanakurqan, rimanakusqanta mana p'akinanpaq jurachispa. Hinaspataq llaqtapi allichachaq runakunata apapurqan,

¹⁴chay hinapi Judaqa rimanakusqanta hunt'aspa pisi kallpalla mana sayariytapas atispa kawsananpaq.

¹⁵Ichaqa, chay rimanakuq reymi Babilonia rey contra sayarirqan, hinaspan rantinpi runakunata Egiptoman kacharqan, caballokunata soldadokunatawan askhatapuni mañakuspa. ¿Chayqa allinchu reypaq kanqa? ¿Ayqenmanchu chaykuna ruwaq runaqa? ¿Rimanakusqanta mana hunt'aqqa ayqenmanchu?

¹⁶Ñoqa Apu Señor Diosmi sutiyrayku jurani, kaq Babiloniapipunin wañunqa, rey kananpaq payta churaq reypa suyunpipunin wañunqa, payqa rimanakusqanta p'akispan jurasqanta pisicharqan.

¹⁷Babilonia rey, llaqtata muyuykuspa runa hark'achita perqa seqanatawan sayarichiqtinmi askha runata sipiranqa, chaypiqa Egipto rey Faraonpas askhallaña soldadonkunapas yanqanpaqmi kanqa.

¹⁸Chay Judá reyqa pisicharqanmi juramento ruwasqanta rimanakusqantawan p'akispa. Payqa hunt'ananpaqmi rimarirqan, ichaqa mana allintan ruwarqan, chayraykun payqa mana ayqenqachu.

¹⁹Ñoqa Apu Señor Diosmi sutiyrayku jurani: Payqa prometekusqantan mana hunt'awarqanchu, ñoqawan rimanakusqantapas p'akirqanmi, chayraykun ruwasqanmanta cuentata mañaspa payta muchuchisaq.

²⁰Paytan llikaywan toqllawan hina hap'irqosaq, hinaspan Babiloniaman apasaq, chaypitaqmi mana hunt'aq kasqanmanta juzgamusaq.

²¹Allichachaq soldadokunan maqanakuypi wañupunqa, qhepaq kaqkunataqmi tawantin lado wayraman ch'eqechisqa kanqa. Chaywanmi qankunaqa yachankichis ñoqa Señor Diospuni rimasqayta.

²²Ñoqa Apu Señor Diosmi nillanitaq: Ñoqan hatun cedroq ñawinta hap'iykusaq, hinaspan qholla ch'ikchinta p'itirqosaq, hinaspan alto orqoq ñawch'inman mallkirqamusaq.

²³Israelpa alto orqonmanmi mallkimusaq, raphisapan kanqa, allintan rurunqapas, sumaq cedromanmi tukupunqa. Imaymana rikch'aq animalkunan llanthunpi tiyanqaku, k'allmanpitaqmi imaymana urpichakuna q'esachakunqaku.

²⁴Chay hinapin yachanqaku llapan mallkikuna ñoqa Señor Diospa ruwasqayta. Ñoqan hatun wiñaq mallkita kumpani, huch'uy mallkitataq hatunllataña wiñachini. Ñoqan q'omer sach'ata ch'akichini, ch'aki sach'atataqmi q'omeryachini. Ñoqa Señor Diosqa rimasqaytaqa hunt'asaqpunin, nispa.