Read DIOSPA QHELQACHISQ Quechua EZEQUIEL 19 Bible Online

EZEQUIEL 19 - DIOSPA QHELQACHISQ Quechua bible

EZEQUIEL 19

¹Qan, runaq churin, kay harawita takiy Israel umallikunapaq:

²China leonmi mamaykiqa karqan, leonkunaq chawpinpi aswan allinninmi karqan, malta leonkunaq chawpinpin chutarayarqan, chaypitaqmi uñankunata uywarqan.

³Hukkaqtan wiñarqachirqan hatun kanankama. Mikhunanpaq chakuytapas yacharqanñan, hinaspan runataña mikhupurqan.

⁴Paymanta rimaqtan suyukuna uyarirqanku, toqllankupin hap'irqorqanku, llawq'anayoq fierrowanmi aysarqanku, Egipto suyumanmi aparqanku.

⁵China leonpa suyakuyninmi manapuniña kapurqanchu, hukkaq uñantan hap'irqan, wiñanankamataqmi kallpacharqan.

⁶Hatun leonña kaspanmi, leonkuna chawpipi puriykacharqan, mikhunanpaq chakuytan yacharqan, hinaspan runataña mikhurqan.

⁷Allin perqasqa wasikunatan q'asurqan, llaqtakunatan thunirqan, manchay qapariyninwanmi suyuntinta kuyurichirqan.

⁸Pay contran sayarimurqan qayllanpi suyukuna muyuriqninpi llaqtakuna. Llikankutan mast'arqanku, toqllankumanmi urmaykachirqanku.

⁹Jaulamanmi llawq'anayoq fierrokunawan aysaykurqanku, hinaspan Babilonia reyman aparqanku. Chaypin pukara wasiman winarqanku, manañan pillapas waqyapakusqanta Israel orqokunapi uyarirqanñachu.

¹⁰Mamaykiqa uvas sach'amanmi rikch'akapurqan unu qayllapi mallkisqaman, k'allmasapan rurusapan karqan askha unu kasqanrayku.

¹¹K'allmankunan rakhullaña karqan, reykunaq varanpaqpas kusallaña, sinchitan wiñarqan, phuyumanraqmi tariparqan, hatunllaña k'allmasapa kaqtin llapa runa rikurqan.

¹²K'arakta phiñakuspan t'irarqapurqanku, pampamantaq wikch'upurqanku. Inti lloqsimuy rupha wayran ch'akichipurqan, chaymi uvaspa rurunpas urmapurqan. Rakhu k'allmankunapas ch'akipurqan, ninataq ruphaykapurqan.

¹³Kunantaq ch'in pampapi mallkisqa kashan, mana unuq kasqan ch'aki pampapi.

¹⁴K'allmanmantataq nina rawrarirqan, ruruntan ch'ikchintawan ruphapurqan. Rakhu k'allmankunan mana kanñachu reypa kamachikunan varanpaq, nispa. Kayqa llakiy-llakiy harawin, llakikuykunallapitaqmi takikunqapas.