Read DIOSPA QHELQACHISQ Quechua EZEQUIEL 2 Bible Online

EZEQUIEL 2 - DIOSPA QHELQACHISQ Quechua bible

EZEQUIEL 2

¹Niwarqantaq: Qan, runaq churin, sayariy rimapayanaypaq, nispa.

²Rimapayashawanankamataq Diospa Espiritun hunt'aykuwarqan, hinaspa sayarichiwarqan. Chaymi rimapayawasqanta uyarirqani:

³Qantan Israel runakunaman kachasqayki, ñoqa contra sayarispa mana kasukuqkunaman. Paykunaqa ñawpa taytankumantapacharaqmi kunan p'unchaykamapas ñoqa contrallapuni sayarishanku.

⁴Paykunaqa coles uya, rumi sonqo runakunan kanku. Chaykunamanmi kachasqayki: Kay hinatan Señor Diosqa nin, nispa rimapayamunaykipaq.

⁵Chay millay mana kasukuq runakunaqa uyarichunkupas amapas, ichaqa yachanqakupunin paykuna ukhupi huk profetaq kasqanta.

⁶Qan, runaq churinqa, amapunin paykunata manchakunkichu, ima nispa nisqankutapas, hinaña qan reparakunki khiska sonqopi otaq alacrankunaq qayllanpi tiyashaq hina kasqaykita chaypas. Aswan millayña sayariqtinkupas, amapunin mancharikunkichu ima nisqankutapas millay uyankutapas.

⁷Qanqa willallankipunin simiyta, uyarichunkupas amapas, paykunaqa mana kasukuqkunan kanku.

⁸Qan, runaq churinqa, allintapuni uyariway, amayá paykuna hina mana kasukuqqa kaychu, simiykita hanllariy, hinaspa qosqayta mikhuy, nispa.

⁹Hinan rikurqani qelqa k'uyuta huk maki haywarimushawaqta.

¹⁰Chay makitaq ñawpaqeypi qelqata k'uyurarqan, chaypin qelqasqa kasqa ñawpaqenpi qhepantinpi sonqo nanay harawikuna, llakiy-llaki rimaykuna, anananaykuna ima.