Read DIOSPA QHELQACHISQ Quechua EZEQUIEL 20 Bible Online

EZEQUIEL 20 - DIOSPA QHELQACHISQ Quechua bible

EZEQUIEL 20

¹Qanchiskaq wataq phisqa killanpa chunka p'unchayninpin Israelpa wakin kurak runankuna Señor Dios tapukuq hamurqanku, hinaspan ñawpaqeypi tiyaykurqanku.

²Señor Diostaq niwarqan:

³Qan, runaq churin, Israelpa kurak runankunata niy, Apu Señor Diosmi nin: ¿Qankunari ñoqa tapuqchu hamushawankichis? Ñoqa Apu Señor Diosmi sutiyrayku jurani: Manapunin qankunaqa hayk'aqpas tapuwankichismanchu, nispa.

⁴Qan, runaq churin, ¿paykunata huchachankichu? ¿Huchachankipunichu? Chay hinaqa rikuchiy ñawpa taytankuq millay ruwasqankunata,

⁵hinaspa paykunata niy, Apu Señor Diosmi nin: Israelta akllakushaspaymi Jacobpa mirayninkunaman sut'inta rimarirqani, Egipto suyupitaqmi paykunaman rikuchikuspa jurarqani: Ñoqan Apu Señor Diosniykichisqa kani, nispa.

⁶Chay p'unchaymi rimarirqani: Egiptomantan horqosqaykichis, qankunapaq akllasqay hallp'amanmi pusasqaykichis. Chay suyupiqa lechewan miel misk'iwanmi askhallaña kan, llapan suyumantapas aswan allinmi chay suyuqa.

⁷Chay hinaqa sapankaykichis yupaychanaykichis millay idolokunata wikch'uychis, ama qhellichakuychischu ñawiykichispa munasqan Egipto runakunaq wak'a diosninkuta yupaychaspaykichis. Ñoqan Apu Señor Diosniykichisqa kani.

⁸Paykunataq ñoqa contra churaykukuspanku mana uyariwarqankuchu, manan ñawinkuq munasqan millay idolonkumantapas t'aqakurqankuchu, manallataq Egipto runakunaq wak'a diosninkutapas wikch'urqankuchu. Chaymi ñoqaqa yuyaykurqani paykunaman phiñakuyniyta kachaykuspa kikin Egiptollapiraq paykunata ñak'arichiyta, phiñakuyniypas thasnukunankamaraq.

⁹Ichaqa manaraq chayta yuyaykushaspaymi paykunaman rikuchikurqaniña, nirqaniñataq chay suyumanta horqonaypaq. Chayraykun paykunataqa mana muchuchirqanichu Egipto runakunaq sutiyta mana pisichanankupaq.

¹⁰Chaymi Egiptomanta horqomurqani, hinaspan ch'inneqman pusarqani.

¹¹Chaypitaq reqsichirqani kamachikuyniykunata unanchasqa simiykunatawan, chaykunata kasukuq runaqa kawsanqan.

¹²Chaymantapas qollarqanitaqmi samana p'unchayniykunata paykunawan rimanakusqayta yuyarichiq kananpaq, hinallataq ñoqa Señor Diospuni paykunata ch'uyanchasqaytawan yuyarichinanpaq.

¹³Paykunan ichaqa ch'inneqpi contray sayarirqanku, manataq unanchasqay simiykunata kasukurqankuchu, kamachikuyniykunatapas mana munarqankuchu, hinaña kasukuqkunaqa kawsayta chaskinanku karqan chaypas. Samana p'unchayniykunatapas pasaqtapunin saruncharqanku. Chaymi yuyaykurqani paykunaman phiñakuyniyta chayachispa kasqan ch'inneqpi tukupuyta.

¹⁴Ichaqa sutiyta mana p'enqayman churayta munaspan mana chay llaqtakunaq qayllanpichu ruwarqani, paykunaq rikushasqan Egiptomanta horqomusqayrayku.

¹⁵Kaqllataq ch'inneqpipas jurarqani: Qankunataqa manan chay “qosqayki” nisqay suyumanqa pusaykusqaykichischu, chay llapan suyumanta aswan allinnin lecheq miel misk'iq askha kanan suyumanqa.

¹⁶Qankunaqa manan kamachikuyniykunata munarqankichischu, unanchasqa simiykunatapas kasukurqankichischu, samana p'unchayniytapas saruncharqankichismi, wak'a dioskunaman sonqollikuspaykichis, nispa.

¹⁷Chaywanpas khuyallikuniraqmi, chaymi mana kaq ch'inneqpichu paykunata tukurparipurqani.

¹⁸Wawankunatataq nirqani: Ñawpa taytaykichispa kamachisqantaqa ama ruwaychischu, ama paykunamanta yachaqakuychischu, amallataq wak'a diosninkuwanpas qhellichakuychischu.

¹⁹Ñoqan Diosniykichis Señor Diosqa kani, hunt'aychispuni llapan kamachikuyniykunata unanchasqay simiykunatawan.

²⁰Samana p'unchayniykunatapas ñoqapaq t'aqapuwaychis, chay hinapin qankunawan rimanakusqayta yuyarichiq kanqa, qankunataqmi reqsiwankichis ñoqa Diosniykichis Señor Dios kasqayta.

²¹Ichaqa chay miraymi contraypi sayarirqanku, manan kasukurqankuchu unanchasqa simiykunatapas, manallataq hunt'arqankuchu kamachikuyniykunatapas, hinaña kasukuqkunaqa kawsayta chaskinanku karqan chaypas, samana p'unchayniykunatan saruncharqanku. Chaymi yuyaykurqani paykunaman phiñakuyniyta chayachispa kasqanpi tukupuyta, kaq ch'inneqpi phiñakuyniy thasnukunankama.

²²Ichaqa hinallañan kakurqani sutiy wak suyukunaq qayllanpi mana pisichasqa kananrayku, paykunapas rikushawarqankupunin Egiptomanta horqomusqaytaqa.

²³Ch'inneqpitaqmi jurarqani: Wak suyukunamanmi pachantinman ch'eqechisqaykichis,

²⁴qankunaqa manan kamachikuyniykunata hunt'arqankichischu, unanchasqa simiykunatapas manan munarqankichischu, samana p'unchayniykunatapas saruncharqankichismi, hinaspan ñawpa taytaykichispa idolonkunaman sonqollikurqankichis.

²⁵Chaymi paykunaq contranpi mana allin unanchasqaykunatapas mana kawsanankupaq kamachikuykunatapas churarqani.

²⁶Hinatataq saqerparirqani idolonkuman phiwi wawankuta ninapi ruphachispa sacrificiota haywaspa qhellichakunankupaq. Chaytan ruwarqani q'aqchakunankupaq, hinaspa ñoqa Señor Dios kasqayta reqsiwanankupaq, nispa.

²⁷Chay hinaqa, qan, runaq churin, Israel runakunata niy, Apu Señor Diosmi nin: Kay hinakunapin ñawpa taytaykichiqa pisichawaspa wikch'upuwarqanku:

²⁸Juraspa prometesqay hallp'aman chayllaraq pusaykushaqtiymi, suni orqota qhawarillasparaq, k'allmasapa mallkitawan rikuspallaraq, chaypi sacrificiota ruphachirqanku, ofrendatapas haywarqanku, q'apaq inciensotapas q'apachirqanku, vino ofrendatapas hich'arqanku, chay hinata ruwaspan phiñachiwarqanku.

²⁹Ñoqataq tapukurqani: ¿Iman chay orqo patapi yupaychana cheqaskunaman risqaykichis? nispa. (Hinan sutin kapurqan “orqo patapi yupaychana cheqas” nisqa).

³⁰Chay hinaqa, Israel runakunata niy, Apu Señor Diosmi nin: ¿Imanaqtinmi qankuna qhellichakuyta munankichis ñawpa taytaykichiskuna hina? ¿Imanaqtinmi millay idolonkuta munapakunkichis?

³¹Wawaykichista ofrendapi ruphachispan qankunaqa idoloykichiswan qhellichakushallankichispuni. ¡Yaw, Israel runakuna! ¿Chay hina kashasparaqtaqchu tapukuq hamuwankichis? Ñoqa Apu Señor Diosmi sutiyrayku jurani: Manapunin qankunaqa tapuwankichismanchu.

³²Qankunan ninkichis: Wakin suyukuna hinan kayta munayku, wakin llaqtakuna hinan kayta munayku, paykunaqa yupaychanku kurkumanta rumimanta ruwasqa dioskunatan, nispa. Ichaqa yuyaykusqaykichisqa manan hayk'aqpas hunt'akunqachu.

³³Ñoqa Apu Señor Diosmi sutiyrayku jurani, qankunatan kamachisqaykichis k'arak phiñakuywan, kallpawan, atiywan ima.

³⁴Sinchi kallpayta phiñakuyniytawan rikuchispaymi ñoqa huñumusqaykichis, lliw hinantin suyukunamanta ch'eqechisqa kashasqaykichis llaqtakunamantawan.

³⁵Suyukunaq ch'inneqninmanmi apasqaykichis, chaypitaq uya-uyapura taripasqaykichis,

³⁶imaynatachus ñawpa taytaykichista tariparqani Egiptoq ch'inneqninpi chay hinata. Ñoqa Apu Señor Diosmi chayta nini.

³⁷Ñoqan lliwta taripasqaykichis, imaynan huk michiqpas ovejankunata yupan hinata, hinaspataq rimanakuyniyman kasukuqta ruwasqaykichis.

³⁸Hinallataq qankunamanta t'aqasaq mana kasukuqkunata ñoqa contra sayariqkunatawan. Hinaña hinantin tiyasqaykichis llaqtamanta horqomusqaykichis chaypas, chay t'aqarparisqa runakunaqa manapunin Israel suyumanqa haykunqakuchu. Hinan qankunaqa reqsiwankichis ñoqa Señor Dios kasqayta.

³⁹Yaw, Israel llaqta, ñoqa Apu Señor Diosmi niykichis: ¡Pasaychis! ¡Idoloykichista yupaychamuychis! Chaymantataq ichaqa cheqaqtapuni qankunaqa uyariwankichis, chay hinapin ch'uya sutiyta manaña pisichawankichischu, idoloykichista ofrendawan yupaychaspaykichis.

⁴⁰Llapa Israel runakunan suyunkupi ñoqata yupaychawanqaku ch'uya orqoy patapi, Israelpa suni orqonpi, chaypin sumaqta chaskikapusqaykichis. Ñoqa Apu Señor Diosmi chayta nini. Chaypin munasaq ofrendaykichis haywawanaykichista, hinallataq chakraykichispa ñawpaq ñawinninta apamuwanaykichista, llapan ch'uya qokuyniykichistapas.

⁴¹Lliw suyukunamanta ch'eqesqa kasqaykichis llaqtakunamantawan huñuspaymi, chaskisqaykichis sumaq q'apaq ofrendata hinaraq, llapa suyukunaq qhawarinanpaqtaqmi ruwasqaykichis ñoqa ch'uya Diosllatapuni yupaychawanaykichispaq.

⁴²Maypachachus ñawpa taytaykichisman juraspa prometesqay Israel hallp'aman qankunata pusaykuqtiymi reqsiwankichis ñoqa Señor Diosqa kasqayta.

⁴³Chaypin yuyarinkichis lliw millay ruwasqaykichista qhellichakusqaykichistapas, hinaspan qankunamantakama millakunkichis chay millay mana chaninkuna ruwasqaykichista.

⁴⁴Israel llaqta, ñoqan qankunata qhawarisqaykichis, manan millay ruwasqaykichisman hinachu, manallataqmi waqllisqa ruwasqaykichiskunaman hinapaschu, aswanpas qhawarisqaykichisqa sutiyta hatunchanaypaqmi, chaypachan reqsiwankichis ñoqapuni Señor Diosqa kasqayta. Ñoqa Apu Señor Diosmi chayta nini.

⁴⁵Señor Diostaq niwarqan:

⁴⁶Qan, runaq churin, uray ladoman kutirispa chay ladoman rimapayay, uray suyu sach'a-sach'a contra profetizay:

⁴⁷Chay sach'a-sach'ata niy, ¡Uyariy Señor Diospa siminta! Apu Señor Diosmi nin: Ninawanmi kanaykusqayki, llapantan q'omertapas ch'akitapas ruphanqa. Chay ninataqmi rawranqa mana wañuspa, llapan runaq uyantataqmi phusulluchinqa, wichay suyumanta uray suyukama.

⁴⁸Hinan lliw pachantin yachanqaku ñoqa Señor Dios kanaykusqayta, ninataq mana wañunqachu, nispa.

⁴⁹Ñoqataq nirqani: ¡Ay, ikiraqmi, imaraqmi, Señor Diosnilláy! Runakunaqa mana imatapas entiendespankun ninku: Yanqa thawtiqmi kayqa, nispa.