Read DIOSPA QHELQACHISQ Quechua EZEQUIEL 21 Bible Online

EZEQUIEL 21 - DIOSPA QHELQACHISQ Quechua bible

EZEQUIEL 21

¹Hinan Señor Diosqa niwarqan:

²Qan, runaq churin, Jerusalenman kutirispa yupaychana wasi contra waqyakuy. Israel suyu contrapas profetizallaytaq,

³Señor Diosmi nin: Ñoqan awqayki tukupuni. Espadaytan horqomusaq, hinaspan wañurachisqaykichis chanin runakunatapas huchasapakunatapas.

⁴Chaykuna ruwanaypaqmi espadayqa llapa runa contrapuni kanqa wichay suyumanta uray suyukama.

⁵Chaymi lliw pachantin yachanqaku ñoqa Señor Diosqa espadayta horqokuspayqa manaña waqaychakapuq kasqayta, nispa.

⁶Chay hinaqa, qan, runaq churin, llaqta runaq qayllanpi sinchi p'akisqa sonqoyoq khuyayta waqaykuy.

⁷¿Imamantan khuyayta waqaykushanki? nispa tapuykuqtinkutaq, ninki: Hatun llakin kanan kashan. Lliw pachantinmi laqhoyanqa mana k'atay kallpayoq kanankama, manan piqpapas kallpan kapunqachu, llapankun mancharikuymanta khatatatapunqaku. ¡Ñan chayarqamushanña! Chayqa kanqapunin, nispayki. Ñoqa Apu Señor Diosmi chayta nini.

⁸Señor Diosqa nillawarqantaqmi:

⁹Qan, runaq churin, profetizaspa niy, Señor Diosmi nin: ¡Qhawariy espadata! ¡Qhawariy! Ñan llusk'achaspa ñawch'ichasqaña.

¹⁰Ñawch'ichasqañan runata wañurachinaypaq, llusk'achasqan chhipipishan. (Llaqtalláy, ama kusikuychischu, lliw muchuchiykunamantan kunankama asikurqankichis).

¹¹Sumaqtan llusk'achashanku espadataqa hukpa makin hap'iykunanpaq. Ñan ñawch'ichaspa chhipipisqaña kashan, runa wañuchiqman hap'iykachinanpaq.

¹²Qan, runaq churin, ¡qapariy! ¡Anchiy! Espadan llaqtayta muchuchinanpaq kashan, Israelpi llapan kamachikuqkunata ñak'arichinanpaq. Llaqtaywan kuska wañunankupaqmi huchachasqa kashan, chhaynaqa takapakuyyá nanaymanta.

¹³Ñoqa Apu Señor Diosmi llaqtayta probashani, paykunan p'ananayta pisicharqanku, chayqa paykunapaq manan allinchu.

¹⁴Chay hinaqa, qan runaq churin profetizay, makiykiwantaq t'aqllapakuy. Espadaqa kuti-kutirispan waqtanqa, chayqa runa wañuchiq espadan, runa wañuchiq manchakuy espadan, llaqtatan hinantin cheqasmanta qhawapayashan.

¹⁵Espadan lliwta llaksanqa, askhatataqmi urmachinqa. Llapan wasikunamanmi wañuchiq espadata churaykuni, espadaqa llusk'achasqan chhipipishan, wañurachinapaq ñawch'ichasqañan kashan.

¹⁶Yaw, espada, pañamanpas kuchuy lloq'emanpas mat'ay, may ladomanña kutirispapas kuchuy,

¹⁷ñoqapas t'aqllakusaqmi phiñakuyniy thaninankama. Ñoqa Señor Diosmi chayta nini.

¹⁸Señor Diostaq niwarqan:

¹⁹Qan, runaq churin, iskay ñanta pampapi ruwarqoy, chayninta Babilonia rey espadantin hamunanpaq. Iskaynin ñanmi kaq suyullamanta lloqsimunqa. Ñan palqay patapin willakuy qelqata churani, may llaqtamanchus chay ñan risqanta.

²⁰Huk ñanmi kanqa Amón runakunaq Rabá llaqtanman espadantin reypa rinanpaq, huk ñantaqmi kanqa Judá suyuq allin perqayoq Jerusalén llaqtanman reypa rinanpaq.

²¹Babilonia reytaq sayaykuspa iskaynin ñanpa palqariyninpi suerteta qhawan. Wach'inpin sortean, wasi diosninkunatan tapun, uywakunaq k'ipchannintan qhawan,

²²suerte qhawasqantaq lloqsin paña makinpi Jerusalén sutiwan churasqan wach'i. Chay suertetaq karqan perqa thunina carretakunata apanankupaq, lliwta wañuchinankupaq, soldadokunata kamachinanpaq, ¡maqanakusunchis! nispa qaparinanpaq, punkunta perqa thunina carretakunawan kumpachinankupaq, hallp'a montosqa seqanata ruwanankupaq, mana pipas ayqenanpaq hark'achita perqanankupaqwan.

²³Chay willakuytaq Jerusalén runakunaman llulla willakuyman rikch'akunqa, allinta rimanakusqanku hawa, chay willakuymi ichaqa paykunata yuyarichinqa mana allin ruwasqankumanta huchachasqa kasqankuta, rikuchinqataq paykuna hap'isqa kanankutawan.

²⁴Chayraykun ñoqa Apu Señor Diosqa nini: Ancha sut'itapuni contraykichispi sayarispaykichismi yuyarichiwankichis huchasapapuni kasqaykichista. Tukuy ima ruwasqaykichispin huchasapa kasqaykichista sut'inchakunkichis. Chaykunamantan hap'irqosqa kankichis.

²⁵Yaw, Israel suyu rey, millay mana chanin runa, qayllaykamushasunkiñan hatun ñak'ariyniykiqa.

²⁶Apu Señor Diosmi nisunki: Qechusunkikun uma k'uyunaykita, ch'utisunkikun coronaykitapas. Lliw imaymanan huk-hinaman t'ikrakunqa: K'umuchisqa kaqmi hatunchasqa kapunqa, hatunchasqa kaqtaqmi k'umuchisqa kapunqa.

²⁷Llapantapunin purunyachisaq, raqay-raqayllaña kanankama. Chaytaqmi qhepapunqa iman kaq raqay-raqay, chanin kamachikuq hamunankama, hinan payman qopusaq.

²⁸Kunantaq, qan, runaq churin, profetizaspa niy, Apu Señor Diosmi Israel runakuna k'amiq Amón runakunata nin: ¡Qhawariy espadata! ¡Qhawariy! Waqaychananmanta horqosqañan sipirananpaq, llusk'achasqañan wañurachinanpaq, illapa hinan lliphllikishan.

²⁹Yanqan rikhuriypi rikusqaykichisqa, watusqaykichispas llullan. Qankunan yuyashankichis chay millay runakunaq kunkan qhoruyta, muchunanku p'unchay chayamusqanrayku.

³⁰¡Qan, espada, kutiykapuy waqaychanaykiman! Paqarisqaykichis cheqaspin taripasqaykichis, maypichus nacesqaykichis suyunpin juzgasqaykichis,

³¹phiñakuyniytan chayachimusqaykichis, phiñakuspaymi contraykichispi rawrarisaqraq, awqa sonqo runakunamanmi hap'ichisqaykichis, yana alma runakunamanmi qaraykusqaykichis.

³²Ruphachisqan kapunki, yawarniykin suyuykiman ch'eqeykunqa, manataqmi qanmanta pipas yuyarinqañachu. Ñoqa Señor Diosmi chayta nini.