Read DIOSPA QHELQACHISQ Quechua EZEQUIEL 23 Bible Online

EZEQUIEL 23 - DIOSPA QHELQACHISQ Quechua bible

EZEQUIEL 23

²Qan, runaq churin, uyariway. Iskay warmikunan karqan huk mamaq ususinkunalla.

³Chay sipaskunan warma kayninkumantapacha Egipto suyupi qhelli huchapi puriyta yachaykapurqanku. Chaypin hinallata ñuñunkuta q'apichikurqanku, hinaspan doncella kayninkuta chinkachikapurqanku.

⁴Kurakkaqpa sutinmi Ahola, chaymi Samaria karqan, sullk'akaqtaq Aholiba, chayñataq Jerusalén karqan. Paykunaqa ñoqaqmi karqan, wachapuwarqankutaq qhari wawakunata, warmi wawakunatapas.

⁵Ahola kaqqa ñoqaqña kashaspapas qhelli hucha kawsayllapin purisharqan, paymantakaman Asiria qharikunata maskharqan.

⁶Chaykunataqmi karqan Asiria soldadokuna sumaq sani-puka p'achayoq, llapankutaq kamachikuq umallikuna, sumaq rikch'ayniyoq waynakuna caballopi sillarqarisqakama.

⁷Asiria runakunamanta aswan allinninkunawanmi Aholaqa wasanchakurqan, idolonkunawanpas sonqonta suwachikuspan qhellichakurqan.

⁸Egiptopi kasqanmantapachan qhelli huchapi puriyta yachaykapurqan, chaytataqmi manaña qonqanñachu. Warma sipas kasqanmantapachan lliwpas paywan puñukullarqan, hinallan ñuñuntapas q'apichikurqan, munasqankutan ima qhelli huchatapas paywan ruwarqanku.

⁹Chayraykun munaqnin Asiria qharikunaq makinman qoykapurqani, sonqonta chaykunawan suwachikusqanrayku.

¹⁰Hinan paykunaqa cuerponta q'alararqanku, chaymantataq churinkunata ususinkunatawan qechupurqanku, paytataq espadawan wañuchipurqanku. Chay hinatan huchanmanta muchuchisqa karqan, chaymi huk warmikunapaqpas yachaqakuna rimay karqan.

¹¹Ñañan Aholibataq chayta rikurqan, chaywanpas payqa ñañanmanta aswantaraqmi sonqonta suwachikuspa qhelli huchapi puriykapurqan.

¹²Payqa Asiria qharikunawanmi sonqonta suwachikurqan, paykunaqa llapallankun kamachikuq umallikuna kanku, allin maqanakuq munay p'achayoq sumaq rikch'ayniyoq waynakuna caballopi sillarqarisqa.

¹³Chaypin repararqani paypas ñañanpa purisqanta hina purispa qhellichakusqanta.

¹⁴Aholibaqa aswan millay qhelli huchapi puriqmi karqan. Paymi rikurqan perqakunapi ch'eqospa ruwasqa pukawan llunch'isqa,

¹⁵Babilonia runakunata, Caldea runakunata llapankutaq umallikunaman rikch'akuq karqanku, kamachikuq hina, chumpikunayoq, uman watarqarisqa.

¹⁶Chay Babilonia runakunata rikurqospan, paykunawan sonqonta suwachikurqan, hinaspan Babiloniakamaraq waqyamuqkunata kacharqan.

¹⁷Babiloniamanta runakunataq hamuspa paywan munanakurqanku, hinaspa puñurqanku, aychankuta mana watakuspan payta qhellichaykapurqanku. Pasaqtapunin qhellichaykakapurqan qhepaman paykunata millakapunankamaraq.

¹⁸Hinaspan sut'itapuni qhelli huchapi puriyta yachaykapurqan, q'ala kaynintapas rikuchikusparaq, imaynan kurak ñañanta millakurqani chay hinata paytapas millakunaykamaraq.

¹⁹Ichaqa aswan-aswantaraqmi qhelli huchapi puriyman qoykakapurqan, Egiptopi sipas kaspa qhelli huchapi purisqantaraqmi yuyarisharqan.

²⁰Hinaspan Egipto runakunawan sonqonta suwachikurqan, asno hina caballo hina warmimanta phawaykachaq chay runakunawan.

²¹Chay hinapin, qan Aholibaqa sipas kaspa kacharisqa phawaykachanaykimanta hawapi-ukhupi sonqoyoq karqanki, Egipto runakunaq ñuñuyki q'apinanmanta.

²²Chay hinaqa, yaw Aholiba, ñoqa Apu Señor Diosmi niyki: Chay millakusqayki wayllukuqniykikunatan awqaykiman tukuchisaq, hinantinmantan contraykipi hamuchisaq.

²³Babiloniamanta Caldea runakuna, Pecod suyu runakuna, Shoa suyu runakuna, Coa suyu runakuna, hinallataq llapan Asiria runakunapas hamunqaku, llapankun paykunaqa kanku sumaq rikch'ayniyoq waynakuna, kamachikuqkuna, oficialkuna, umallikunapiwan, llapankutaq paykunaqa caballopi sillaykusqakama.

²⁴Wichaymantapachan qan contra hamunqaku maqanakunapaq carretakunayoq, mikhuy apaq carretakunayoq, askha soldadokuna cascokunayoq, escudokunayoq, hinantin ladoykimantan muyuykusunkiku. Ñoqan paykunaman hap'iykachisqayki muchuchinasuykichispaq, paykunataqmi ñak'arichisunkichis paykunaq kamachikuy siminkunaman hina.

²⁵Ñoqan k'araktapuni qanwan phiñakusaq, chaymi paykunapas k'arakta phiñakuspa muchuchisunkiku, senqaykita ninriykitapas qhorusunkikun, qhepaq runakunatapas espadawanmi wañurachinqaku. Churiykikunatapas ususiykikunatapas lliwtan qechusunki, qhepallatañataqmi puchuqkunaqa ninaq ruphasqan kapunqa.

²⁶P'achaykikunatan ch'utisunkiku, k'achanchakunayki qori-qolqetan qechusunkiku.

²⁷Chay hinapin kacharisqa phawaykachanaykita, Egipto runakunawan qhelli huchapi purinaykitawan p'uchukachisaq, manañataqmi chaykuna ruwayta munapakunkiñachu, Egipto suyumantapas yuyarinkiñachu, nispa.

²⁸Apu Señor Diosmi nin: Chay millakuspa cheqnikusqayki suyukunaq makinmanmi hinata hap'iykachisqayki.

²⁹Paykunapas qanta cheqnikullasunkitaqmi, llank'apakuspa tarisqaykitan hap'ikapunqaku, hinaspan q'ala chichita wikch'upusunkiku aychaykipas q'ala-q'ala kanankama, millay qhelli huchapi puriyman qoykakapusqaykitan rikunqaku. Kacharisqa qhelli hucha puriypi phawaykachayniykin

³⁰chaykunataqa apamusunki, qanmi chay suyukunawan qhelli huchapi purirqanki, idolonkuta yupaychaysikuspaykitaq qhellichakurqanki.

³¹Ñañaykiq purisqanta purisqaykiraykun muchuy vasota qoyki pay hina muchunaykipaq, nispa.

³²Chayraykun Apu Señor Diosqa nin: Ñañaykiq ukyasqan vasotan qanpas ukyallankitaq, maqma p'uktu hatun vasota. Chay vasoq hunt'a kasqanwanmi macharqapunki, runakunataq qanmanta asikunqaku pisichaspanku.

³³Chay Samaria ñañaykiq vasonqa q'alayaywan phutikuywan hunt'aykusqan kashan, chaywanmi machanki t'ili kanaykikama, pasaq llakisqa khuyay kanaykikama.

³⁴Machaykuspaykin vasotaraq ch'akichinki, chaymantapas ñut'ullataña chhallunki, chhallusqa k'arpawantaq ñuñuykitapas mat'akunki. Ñoqa Apu Señor Diosmi chayta nini.

³⁵Chayraykun ñoqa Apu Señor Diosqa nini: Ñoqata qonqapuwaspaykin qheparpariwarqanki, chayraykun ñak'arinkipuni kacharisqa purispa qhelli huchapi purisqaykimanta, nispa.

³⁶Señor Diosqa nillawarqantaqmi: Qan, runaq churin, ¿huchachankichu Aholata, Aholibatawan? Chay hinaqa, uyanpi laq'ay millay p'enqay ruwasqankunata.

³⁷Paykunan kanku wasanchaqkuna runa wañuchiqkuna. Paykunan idolokunata yupaychaspanku wasanchawanku, ñoqapaq wachakusqanku wawankutan wañuchirqanku idolonkuman ruphachispa.

³⁸Chay p'unchaykunapiqa aswankunataraqmi ruwarqanku, ñoqa yupaychana wasita qhellichaspanku samana p'unchayniykunatapas pisicharqanku.

³⁹Idolonkuta yupaychaspa wawanku kanasqanku p'unchaymi ch'uya wasiyman hamurqanku, hinaspan qhellicharqanku. ¡Chay hinatan wasiypiraqtaq ruwarqanku!

⁴⁰Karu llaqtamantan waqyaqkunawan qharikunata pusachikamurqan. Chaykuna chayamuqtintaq iskaynin ñañantin warmikunaqa maqchikuspanku ñawinkuta llusikurqanku, qori-qolqemanta k'achanchanawantaq churakurqanku.

⁴¹Tiyaykurqankutaq k'achanchasqa puñunapi, mesapas wakichisqallamanña, chaymantaq churaykurqanku ñoqapaq t'aqasqa ch'uya inciensoyta aceiteytawan.

⁴²Chaymantataq uyarikurqan askha runaq kusikuymanta ch'aqwasqan, chaykunaqa ch'inneqmanta hamuq machasqa runakunan karqanku. Paykunan warmikunaq makinman brazaleteta churaspa sumaq coronawan umanman churarqanku.

⁴³Ñoqataq chay qhelli hucha puriypi payayaq warmimanta nirqani: Qhelli huchapi puriq warmitaqa qhelli kawsayninman hina rikuchunku, payqa chay hinapunin, nispa.

⁴⁴Chay machasqa runakunataq sapa kutilla puñurqanku chay millay Aholawan Aholibapiwan, rabona warmiwan puñuq runakuna hina.

⁴⁵Ichaqa chanin runakunan paykunaman tupaqnin sentenciata unanchanqaku qhelli huchapi purisqankumanta, runa wañuchisqankumantawan, paykunaqa qhelli huchapi puriq warmikuna, runa wañuchiqkuna kasqankurayku, nispa.

⁴⁶Apu Señor Diosmi nin: Paykuna contra sayarichun askha ch'aqwaqkuna, hinaspa sinchita llaksarqospa llat'anachunku.

⁴⁷Llapan ch'aqwaqkunataq rumiwan ch'aqespa espadawan sipipachun, wañuchichunkutaq churinkuta ususinkuta, hinaspataq wasinkutapas kanaykuchunku.

⁴⁸Ñoqan suyumanta ch'usaqyachisaq kay millay huchakunata. Chay hinapitaqmi llapan warmikuna yachanqaku, hinaspan manaña qhelli huchapi purinqakuñachu.

⁴⁹Chay iskay warmikunataqmi ichaqa qhelli huchapi purisqankumanta, idolokuna yupaychaysikusqan huchankumantawan ñak'ariyta chaskinqakupuni. Chay hinapin paykuna reqsiwanqaku ñoqallapuni Apu Señor Dios kasqayta, nispa.