Read DIOSPA QHELQACHISQ Quechua EZEQUIEL 25 Bible Online

EZEQUIEL 25 - DIOSPA QHELQACHISQ Quechua bible

EZEQUIEL 25

¹Señor Diosmi niwarqan:

²Qan, runaq churin, Amón runakunaman kutirispa contrankupi niy:

³Apu Señor Diospa siminta uyariychis: Yupaychawananku wasi pisichasqankumanta, Israel suyu purunyachisqankumanta, Judá runakunaq kamachi-kaypaq apasqa kasqankumantawanmi qankunaqa kusikuymanta qaparkacharqankichis.

⁴Chayraykun qankunata qaraykusqaykichis inti lloqsimuy ch'inneqmanta hamuspa phawaykuq runakunaman. Chay runakunan suyuykichispi karpakunata ruwakuspa tiyaykunqaku, paykunan pallasqaykichis rurukunata mikhunqaku, lecheykichistapas ukyanqaku.

⁵Rabá llaqtatan camello michinaman, Amón suyutapas oveja michinaman tukuchisaq. Hinan qankuna reqsiwankichis ñoqa Señor Diosqa kasqayta.

⁶Ñoqa Apu Señor Diosmi nini: Qankunaqa Israeltan mana kaqpaq qhawarparispaykichis kusikuymanta t'aqllakuspaykichis sarupakurqankichis.

⁷Chayraykun makiyta haywarimusaq qankunata muchuchinaypaq, wak llaqtakunamanmi llat'ananasuykichispaq hap'iykachisqaykichis. Qankunaqa manañan suyuman yupasqachu kapunkichis, manallataqmi llaqtaman yupasqapasñachu, pasaqtapunin thunipusqaykichis. Hinan reqsiwankichis ñoqa Señor Diosqa kasqayta, nispa.

⁸Apu Señor Diosmi nin: Moab runakunan Edom runakunapiwan ninku: Judá suyuqa wakin suyukuna kasqallantaqmi, nispa.

⁹Chayraykun Moabpa qorpanpi hark'apakuq llaqtakunata mentasqa llaqtankunatawan Bet-jesimot-ta, Baal-meonta, Quiriataimtawan atipachisaq.

¹⁰Inti lloqsimuy lado ch'inneqpi tiyaq runakunamanmi Moab suyuta Amón suyutawan qopusaq, chay hinapin manaña mayqen suyukunapipas yuyarinqañachu Amón runakunata.

¹¹Ñoqan Moab runakunata muchuchisaq, chay hinapin reqsiwanqaku ñoqa Señor Diosqa kasqayta, nispa.

¹²Apu Señor Diosmi nin: Edom runakunan Judá runakunata mana khuyapayaykuspa vengakurqanku, chaywanmi paykunaqa pasaqtapuni huchallikurqanku.

¹³Chayraykun ñoqa Apu Señor Diosqa makiyta haywarisaq Edom suyuta muchuchinaypaq, hinaspan uywankunata runankunatawan wañuchisaq. Suyuntintapunin raqay-raqayman tukuchisaq, Temán llaqtamanta Dedán llaqtakaman runakuna wañunqaku espadawan sipisqa.

¹⁴Ñoqaqa Israel llaqtaywanmi aynita kutichisaqpuni Edom llaqtaman. Israel llaqtaymi Edom llaqtata muchuchinqa sinchi phiñakusqayman hina. Chay hinapin Edom runakuna yachanqaku ayni-kutichiq kasqayta. Ñoqa Apu Señor Diosmi chayta nini, nispa.

¹⁵Apu Señor Diosmi nin: Filistea runakunan vengakurqanku sinchi pisipaq qhawariq sonqonkuwan, Israelpa ñawpaqmanta awqan hinapuni, paykunan yuyaykurqanku Judá suyu runakunata chinkachipuyta.

¹⁶Chayraykun ñoqa Apu Señor Diosqa makiyta haywarisaq Filistea runakunata muchuchinaypaq. Llapantapunin tukusaq Ceret runakunata, hinallataq lamar-qocha patapi tiyaqkunatapas.

¹⁷Paykunamanmi manchakuytapuni aynita kutichisaq, k'arakta phiñakuspaymi muchuchisaq. Chayta ruwaqtiymi reqsiwanqaku ñoqa Señor Diosqa kasqayta, nispa.