Read DIOSPA QHELQACHISQ Quechua EZEQUIEL 34 Bible Online

EZEQUIEL 34 - DIOSPA QHELQACHISQ Quechua bible

EZEQUIEL 34

¹Señor Diosmi niwarqan:

²Qan, runaq churin, Israel michiqkuna contra profetizay, hinaspa niy, Apu Señor Diosmi nin: ¡Imaraqmi Israelpa michiqninkunamanta, paykunaqa kikillankutan michikunku! ¿Manachu michiqkunaqa ovejakunata michinanku?

³Qankunaqa ovejaq lechentan ukyankichis, millmanmantapas p'achata ruwakunkichis, allin wiranta nak'akunkichis, manataq ovejataqa michinkichischu.

⁴Qankunaqa manan toqti ovejatapas yanapaykunkichischu, onqosqatapas manan hampiykunkichischu, chakin p'akisqatapas manan chaqllaykunkichischu, k'itakuqtapas manan kutichimunkichischu, chinkakuqtapas manan maskhamunkichischu, aswanpas munasqaykichistan ruwarqankichis awqa sonqowan qhawarispa.

⁵Mana michiqniyoq kaspan ovejaykunaqa ch'eqesqa kashanku, chaytataq salqa animalkuna mikhupushan.

⁶Ovejaykunaqa ch'eqeriykapurqanmi hinantin orqo-orqoman, chinkapurqankutaq hinantin pachakunaman, ovejaykunataqa manan pillapas qhawarirqanchu nitaq maskhaqpas rirqanchu.

⁷Chay hinaqa, michiqkuna, nisqayta allinta uyariwaychis:

⁸Ñoqa Apu Señor Diosmi sutiyrayku juraspa nini, suwakunan, imaymana rikch'aq salqa animalkunan ovejaykunata mikhuykapusqa, mana michiqniyoq kasqankurayku. Michiqniykunaqa manan oveja maskhaq rirqankuchu, aswanpas paykunallatan michikurqanku oveja michinankutaqa.

⁹Chayrayku, michiqkuna, simiykunata allinta uyariwaychis:

¹⁰Ñoqa Apu Señor Diosmi michiqkunaq awqan kani, chaymi ovejaykunamanta manuchasaq. Michiq-kayninkumantan qarqopusaq, paykuna kikinkutapas manaña michikunankupaq. Paykunamantaqa qechupusaqmi ovejaykunata, ama hinalla mikhushanankupaq.

¹¹Chay hinaqa, ñoqa Apu Señor Diosmi nini: Ñoqa kikiymi ovejaykunata maskhaspa michikapusaq.

¹²Imaynan michiqqa ch'eqechisqa kasqanmanta huñuykuspa ovejankunata cuidan, chay hinatan ñoqapas cuidasaq. Huk p'unchaymi yana phuyuq pakasqan kaspa hinantinman ch'eqeykurqanku, chaymantan qatikampusaq.

¹³Wak llaqtakunamantapas horqokampuspa huñurqospaymi kikin hallp'ankuman qatikapusaq. Israelpa orqonkunaman, mayukunaq qayllanman, llaqtakunaq qayllanmanwan qatispay michimusaq.

¹⁴Allinnin q'achutan mikhuchimusaq, Israelpa orqonpi allin q'achuq kasqanpin kanqaku, chaypiraqmi samaraykunqaku, sumaq q'achutataq mikhunqaku.

¹⁵Ñoqa kikiymi ovejaykunaq michiqnin kapusaq, ñoqapunin pusakapusaq samakunankupaq, ninmi Apu Señor Diosqa.

¹⁶Chinkasqa ovejakunatapas maskhampusaqmi, k'itakuqtapas kutichikampusaqmi, chakin p'akisqatapas chaqllaykusaqmi, onqosqatapas hampiykusaqmi. Wirankunata allininkunatataqmi nak'apusaq, ñoqan michisaq imaynatachus michinata hinapuni.

¹⁷Chay hinaqa, ovejaykuna, ñoqan nishaykichis: Ovejapurata chaninchasaq, kaqllataq anejota orqo cabratawan.

¹⁸¿Manachu wakinniykichisqa mikhuwaqchis allinnin q'achuta, chakiykichiswan puchunta sarunaykichistaqa? Ch'uya unutan ukyankichis, wakinnintataq chakiykichiswan qonchuyachinkichis.

¹⁹Hinan wakin ovejaykunaqa sarusqaykichis q'achukunata mikhushanku, qonchuyachisqaykichis unutataq ukyashanku.

²⁰Chayraykun ñoqa Apu Señor Diosqa niykichis: Tullu ovejakunatawan wira ovejakunatawanmi juzgasaq.

²¹Qankunan tanqarparirqankichis tullu ovejakunata, waqraykichiswan waqraspataqmi qatirparirqankichis.

²²Ñoqan ichaqa ovejaykunata waqaychasaq, manan hinallatachu suwanankuta qhawasaq. Juzgasaqpunin ovejapuratapas.

²³Kamachiy Davidtan kamachikuqta churasaq, pay sapallanmi michiq kanqa, paytaqmi ovejaykunata qhawaspa michinqa.

²⁴Ñoqa Señor Diosmi Diosninku kasaq, kamachiy Davidtaqmi qollananku kanqa. Ñoqa Señor Diosmi chayta nini.

²⁵Paykunawanmi rimanakusaq, thak kawsayta paykunaman qonaypaq. Suyuntinmantan salqa animalkunata chinkachipusaq, mana ima llakillayoqmi ch'inneqkunapi tiyanqaku, sach'a-sach'akunapipas puñunqaku.

²⁶Ñoqan paykunata ch'uya orqoy muyuriqpi tiyachisaq, hinaspataqmi saminchasaq, paranan mitapin saminchay parata chayachisaq.

²⁷Mallkikunapas rurunqan, hallp'apas rurunqan, hinan paykunaqa mana ima llakillayoq kikinkuq hallp'ankupi tiyanqaku. Hap'iqninkuq makinmanta kamachi-kaymanta qespichispa horqoqtiymi, reqsiwanqaku ñoqa Señor Diosqa kasqayta.

²⁸Wak llaqtayoqkunapas manañan paykunata wakmanta llat'ananqañachu, manallataq salqa animalkunapas mikhunqañachu. Mana ima llakillayoqmi tiyakunqaku mana piqpa manchachisqan.

²⁹Qosaqmi allin mikhuypa wiñanan chakrakunata, manañan yarqaymanta muchunqakuchu, manataq wak suyukunapas paykunamanta asikunqakuñachu.

³⁰Hinan reqsiwanqaku ñoqa Apu Señor Diosninkuqa paykunawan kashasqayta, Israelpas llaqtay kasqanta.

³¹Qankunan michinay ovejaykuna kankichis, qankunan llaqtay kankichis, ñoqataq Diosniykichis kani. Ñoqa Apu Señor Diosmi chayta nini, nispa.