Read DIOSPA QHELQACHISQ Quechua EZEQUIEL 37 Bible Online

EZEQUIEL 37 - DIOSPA QHELQACHISQ Quechua bible

EZEQUIEL 37

¹Señor Diosmi llamiykuwarqan, hinan paypa Espiritunqa apawarqan askha tullukunawan hunt'a kashaq wayq'oman.

²Chaypin Señor Diosqa hinantin cheqasman tullukunaq kasqan wayq'opi pusaykachawarqan, pampapitaq rikurqani askhallaña mullpha tullukunata.

³Hinan Señor Diosqa tapuykuwarqan: — ¿Qan, runaq churin, yachankichu kay tullukunaq kawsarinanta? nispa. Ñoqataq nirqani: — Qanllan yachanki, Apu Señor Diosníy, nispa.

⁴Chaymi payqa niwarqan: — Chay tullukunaman profetizaspa niy, ¡yaw, ch'aki tullukuna, uyariychis Señor Diospa siminta!

⁵Apu Señor Diosmi nisunkichis: Qankunamanmi qosqaykichis kawsay samayta, hinan kawsaripunkichis.

⁶Hank'ukunatan churasqaykichis, aychawanmi hunt'achisqaykichis, patanmantaqmi aycha qarawan churasqaykichis, hinaspan kawsay samayta qosqaykichis, qankunataq kawsarimpunkichis. Hinan reqsiwanqaku ñoqa Señor Diosqa kasqayta, nispa.

⁷Ñoqataq rimarqani paypa kamachiwasqanta hina, rimashaspaytaq chhaqaqaqaqta uyarirqani, pampa kuyuriymi karqan hinan ch'ulla-ch'ullamanta tullukuna huñuykunakurqan.

⁸Qhawashallaqtiymi hank'unkuna rikhurirqorqan, chaymantaqa aychañataq hunt'aykurqan, patanmantaq aycha qarawan qataykurqan, ichaqa manan kawsay samayniyoqraqchu karqanku.

⁹Hinan Señor Diosqa niwarqan: — Qan, runaq churin, profetizaspa kawsay samayta niy, Apu Señor Diosmi nin: Hamuy kawsay samay, kay pachaq tawantin ladomanta, hinaspa chay ayakunaq sonqonman phukuykuy kawsarinankupaq, nispa.

¹⁰Ñoqataq profetizarqani paypa kamachiwasqanman hina, hinan kawsay samayqa paykunaman haykurqan, paykunataq kawsarispa sayarirqanku, mana yupay atiy soldadokunataq kasqaku.

¹¹Chaymi Señor Diosqa niwarqan: — Runaq churin, Israel llaqta runapas chay ch'aki tullu hinan. Paykunan ninku: Ñoqanchispa tullunchisqa ch'akillañan kashan, manan ima suyakuyninchispas kanñachu, hukpaqkama chinkasqa hinan kanchis, nispanku.

¹²Chayrayku, paykunata niy, Apu Señor Diosmi nin: Llaqtalláy, aya p'ampanaykichistan kicharisaq, hinaspan chaymanta horqomusqaykichis, hinaspataq Israel llaqtaman kutichipusqaykichis.

¹³Aya p'ampanaykichista kicharispa chaymanta horqomuqtiymi, qankunaqa reqsiwankichis ñoqa Señor Diosqa kasqayta.

¹⁴Ñoqan qankunaman kawsayniyta samaykusqaykichis, hinan qankunaqa kawsarinkichis, kikin hallp'aykichismantaqmi churaykapusqaykichis. Hinaqtinmi yachankichis ñoqa Señor Diospa rimasqayta hunt'asqaytapas. Ñoqa Señor Diosmi chayta nini, nispa.

¹⁵Señor Diosmi niwarqan:

¹⁶— Qan, runaq churin, hap'iy huk k'aspita, chaypitaq kay hinata qelqay: Uray ladopi kaq Judá suyu runakunapiwan, nispa niqta. Chaymanta hoqarillaytaq huk k'aspita, hinaspa chaypi qelqay: Wichay ladopi kaq Josepa miraynin Efraín suyu runakunapiwan, nispa niqta.

¹⁷Chaymantataq iskaynin k'aspikunata makiykipi ch'ulla k'aspita hinalla ch'antarqonki.

¹⁸Llaqtamasiyki runa: ¿Ima ninantan chay ruwasqayki nin? Willawayku, niqtintaq,

¹⁹paykunata niy, Apu Señor Diosmi nin: Josepa miraynin Efrainpa k'aspintan hap'isaq, hinaspan ch'antasaq Judapa k'aspintawan makiypi ch'ulla k'aspillaman tukuchinaypaq, nispa.

²⁰Paykunaq rikushasqanmi makiykipi hap'inki chay qelqasqayki iskaynin k'aspita,

²¹ninkitaq, Apu Señor Diosmi nin: Israel runakunatan horqomusaq hinantin suyukunapi kasqanmanta, hinantinmantan huñurqamusaq hinaspan llaqtankuman kutichimpusaq.

²²Israelpa orqonkunapin huk suyullaman paykunata tukuchisaq, hinan ch'ulla reyllayoq kanqaku, manan t'aqanasqachu kanqaku, manan iskay suyupaschu kanqaku.

²³Manañan qhellichakunqachu millay mana chanin idolokunata yupaychaspanku, manan imaymana millay huchatapas ruwanqakuñachu. Ñoqan paykunata qespichisaq ñoqata wasanchawaspa huchallikusqankumanta, huchankumantapas ch'uyanchapusaqmi. Hinan paykuna llaqtay kanqa, ñoqataq Diosninku kasaq.

²⁴Kamachiy Davidmi paykunaq reynin kanqa, llapankutan michinqa. Paykunaqa kamachikuy simiykunatan kasukunqaku, unanchasqay simiykunatapas hunt'anqakun.

²⁵Tiyakapunqakutaqmi kamachiy Jacobman qosqay hallp'api. Maypichus ñawpa taytankupas tiyarqan chayllapipunin paykunapas, wawankupas, llapan mirayninkupas tiyakunqaku, kamachiy Davidllapunitaqmi kamachiqninkupas kanqa.

²⁶Paykunawanmi rimanakusaq, thak-kayllapi kawsaspa kanankupaq, chayqa wiñaypaq rimanakusqan kanqa. Takyachispaymi askhayachisaq, paykuna chawpipitaqmi ch'uya wasiyqa kallanqapuni.

²⁷Paykuna ukhupin tiyakusaq, hinaspan Diosninku kasaq, paykunataq llaqtay kanqaku.

²⁸Paykuna chawpipi ch'uya wasiyta wiñaypaq churaqtiymi, wakin suyukuna reqsiwanqaku Israelta ñoqapaq t'aqasqa kananpaq akllakusqayta, nispa.