Read DIOSPA QHELQACHISQ Quechua EZEQUIEL 4 Bible Online

EZEQUIEL 4 - DIOSPA QHELQACHISQ Quechua bible

EZEQUIEL 4

¹Señor Diosmi niwarqan: Qan, runaq churin, adobeta hap'iy, hinaspa ñawpaqeykiman churaykukuy, patanpitaq Jerusalén llaqtaq rikch'ayninta dibujanki.

²Hinaspa llaqta muyuykusqa kasqanta rikunankupaq hark'achita ruwanki hallp'a montosqa seqanatawan, ruwallankitaq perqa thunina carretakunata, muyuriqpitaq soldadokunaq karpankunata.

³Chaymantataq fierromanta qhata sartenta churaykukunki qanmanta llaqtamantawan t'aqananpaq, huk fierro perqapas kashanman hinata, hinaspataq llaqtata chay qhepamanta qhawanki. Llaqtaqa awqanpa muyuykusqan hinan kanqa, qanmi chay muyuykachiqqa kanki. Chaytaqmi Israel runakunaq qhawananpaq señal kanqa.

⁴Qantaq lloq'e ladonpi chutarayanki, Israel llaqtaq huchanwanmi ñit'iykachisqayki chay chutarayasqayki p'unchaykunapi.

⁵Israelpa sapa wata huchanmantan huk p'unchaytakama chutarayanki, chaypin kanqa kinsa pachak isqon chunka p'unchay.

⁶Chay p'unchaykuna tukukuqtintaq, paña ladonpiñataq chutarayanki, Judá suyuq huchanwan ñit'iykusqa tawa chunka p'unchayta, sapa wata huchamanta huk p'unchaytakama.

⁷Qhawarinkitaq awqanpa muyuykusqan Jerusalén llaqta ladoman, makiykita q'enpirqokuspataq paypa contranpi willanki.

⁸Huk watanawanmi t'eqerqosqayki mana kutiriyta atinaykipaq, llaqtaq muyuykusqa kasqan p'unchaykuna tukukunankama.

⁹Kunantaq hap'inki trigota, cebadata, mijota, centenota, habasta, lentejastapas, llapanta chhaqrunki huk puruñallapi, chaymantataq mikhunaykipaq t'antata ruwakunki. Kinsa pachak isqon chunka p'unchaynintin chutarayasqaykipin chayllata mikhunki.

¹⁰Churasqa horallapin mikhunki, sapa p'unchay media librata hinalla.

¹¹Kaqllataqmi unutapas ukyanki churasqa horallapi, sapa p'unchaytaq huk botella unullata ukyanki.

¹²Llapa runaq rikushasqanmi t'antata ruwakunki runaq hatun hisp'aynin sansa patapi, hinaspan mikhunki cebada t'antata hina, nispa.

¹³Señor Diosqa nillarqantaqmi: Chay hina qhelli mikhunatan Israel runakunaqa mikhunqaku ñoqaq ch'eqerqarichisqay suyukunapi, nispa.

¹⁴Chaymi ñoqaqa nirqani: ¡Apu Señor Diosníy! Erqe kasqaymantapachan manapuni hayk'aqpas qhelli mikhunakunataqa mikhuqchu kani, manallataqmi paymantakama wañusqa aychatapas, salqa animalkunaq sipisqan aychatapas, manapunin malliykullaqpaschu kani, nispa.

¹⁵Hinan Señor Diosqa niwarqan: Chay hinaqa, waka q'awa sansa patapi t'antaykita chayachinki, amaña runaq hatun hisp'aynin sansa patapichu, nispa.

¹⁶Chaymantataq niwarqan: Runaq churin, Jerusalenpin mana mikhuna kanqachu, mikhuna kaqpas tupusqallan kanqa, runakunapas llakisqan mikhunqaku. Unupas tupusqallan kanqa, manchan-manchanmi ukyanqakupas.

¹⁷Mikhunanku ukyananku tukukuqtinmi, imayna kasqankuta qhawanakuspa sinchi llaksasqa kanqaku. Huchankumantataqmi aswan-aswanta laqhoyanqaku, nispa.