Read DIOSPA QHELQACHISQ Quechua EZEQUIEL 42 Bible Online

EZEQUIEL 42 - DIOSPA QHELQACHISQ Quechua bible

EZEQUIEL 42

¹Dios yupaychana wasiq ñawpaqenmantan runaqa horqowarqan wichay ladoman, hinaspan pusaykuwarqan wichayneqpi wasikunaq kasqanman, chay wasikunaqa ukhu patiopin kasqa Dios yupaychana wasimanta chunka metro hinallapi.

²Wichay qhawaq wasin kasqa wask'anman phisqa chunka metro hina, anchonmantaq iskay chunka phisqayoq metro hina.

³Iskay wasikunan kasqa, hukkaqmi Dios yupaychana wasimanta chunka metropi hina, hukkaqtaqmi hawa patio qayllapi hina kasqa. Iskaynin wasikunan kinsa pata kasqa, sapanka patataq qhawapunakuqkama kasqa.

⁴Chay iskaynin wasiq chawpinta pasanapaq kasqa phisqa metro hina anchoyoq, wask'anmantaq phisqa chunka metro hina, punkunkunataq wichayta qhawasqa.

⁵Kinsa patakaq altos wasikunaqa huch'uykaman kasqa chawpinpi kaq wasikunamantapas pampanpi kaq wasikunamantapas, purinan cheqas aswan p'alta kasqanrayku.

⁶Chay wasikunan karqan kinsa pata altosniyoqkama, ichaqa manan karqanchu tusankuna patiopi wasikunaq hinaqa, chaymi kinsakaq pata wasikunaqa aswan huch'uylla kasqa chawpikaq wasikunamanta pampapi kaq wasikunamantawan.

⁷Dios yupaychana wasi qayllapi kaq wasiqa wask'anman kasqa phisqa chunka metro hinan, ñawpaqen hawa patioman qayllapi kaq wasitaq wask'anman kasqa iskay chunka phisqayoq metro hina. Chay wasiq perqa k'uchunmantan aysakusqa inti lloqsimuy ladoman yanqa perqalla, chaytaq kasqa wask'anman iskay chunka phisqayoq metro hina.

⁹Chay wasiq inti lloqsimuy ladon hawa patio perqawan tupaynintan haykunaqa kasqa. Dios yupaychana wasiq uray ladonpipas kallasqataqmi wasikuna, ukhu patiopiraq Dios yupaychana wasimanta chunka metropi hinalla.

¹¹Chay wasikunan kasqa wichay ladopi wasikuna kikillan wask'anpas anchonpas sayayninpas.

¹²Kallasqataq chawpipi pasanapas, punkunkunapas kaq sayayllataq kasqa. Chay wasiq inti lloqsimuy ladon perqa tupaynintan haykuna kasqa.

¹³Runataq niwarqan: Uranpi wasikunapas, wichayninpi wasikunapas ch'uyan. Señor Diospa ñawpaqenpi serviq sacerdotekunan chaypi mikhunqaku ch'uya ofrenda haywasqata. Chay wasikunaqa ch'uyapunin, chayraykun chayman waqaychanqaku: ch'uya ofrendakunata, ruru ofrendakunata, hucha pampachaypaq sacrificiokunata, kutichipuna ofrendakunatawan.

¹⁴Sacerdotekuna Dios yupaychana wasiman haykuspanmi, hawa patiomanqa mana lloqsimuyta atinqakuchu, Señor Dios servinanku p'achankuta mana ch'utikuspaqa, chay p'achaqa ch'uyapuni kasqanrayku. Runakunaq kasqanman lloqsinankupaqqa wak p'achawanmi churakunanku kanqa, nispa.

¹⁵Dios yupaychana wasita patiokunantinta tupuyta tukuspataq runaqa pusawarqan inti lloqsimuy lado haykunanta, hinaspan muyuriq hawantañataq tupurqan.

¹⁶Tupunan k'aspita hap'ispataq tupurqan inti lloqsimuy ladonta, chaytaq iskay pachak phisqa chunka metroyoq hina kasqa.

¹⁷Chaymantan tupullarqantaq wichay ladonta, hinan chaypas iskay pachak phisqa chunka metroyoq hina kasqa.

¹⁸Chaymantataq tupurqan uray ladonta, chaypas iskay pachak phisqa chunka metroyoq hina kasqa.

¹⁹Chay qhepatataqmi tupurqan inti haykuy ladonta, hinan chaypas iskay pachak phisqa chunka metroyoq hina kallasqataq.

²⁰Tawantin lado perqa qhepantan tupurqan, Dios yupaychana wasiq hallp'antaq muyuriq perqayoq kasqa, tupusqataq kasqa tawantin ladonpas iskay pachak phisqa chunka metroyoqkama. Chay perqan Dios yupaychana wasi cheqastaqa muyuykurqan, chay ukhun ch'uya kasqa, qhepantaq qhellikaqpaq kasqa.