Read DIOSPA QHELQACHISQ Quechua EZEQUIEL 46 Bible Online

EZEQUIEL 46 - DIOSPA QHELQACHISQ Quechua bible

EZEQUIEL 46

¹Apu Señor Diosmi nin: Ukhu patioq inti lloqsimuy lado punkunqa wisq'asqallan kanqa soqta p'unchaynintin llank'ashaqtiykichis, samana p'unchaypitaqmi kicharisqa kanqa, mosoq killa rikhuriy p'unchaypiwan.

²Kamachikuqmi haykumunqa hawa patiomanta ukhu patioman haykunapi kaq hatun wasiman, chaypitaq sayaykunqa punku sayaq k'aspiq ladonpi. Chaykamataq sacerdotekunaqa kamachikuqpa ruphachina sacrificionta sumaq kawsay ofrendankunatawan haywashanqaku. Hinan kamachikuqqa chay haykunamanta qhawarispalla yupaychaykunqa, chaymantataq lloqsimpunqa. Punkuqa manan wisq'akunqachu ch'isiyanankama.

³Samana p'unchaykunapi, mosoq killa rikhuriy p'unchaykunapipas, suyu runakunaqa Señor Diospa qayllanpi yupaychanqaku chay punkuq ñawpaqellanpin.

⁴Samana p'unchaypin kamachikuqqa Señor Diosman apamunqa mana imanasqa soqta borregota, huk anejotawan ruphachina sacrificio kananpaq.

⁵Chay anejotawan kuskatan haywanqa huk arroba rurukunata, sapanka borregotawanmi haywanqa ima munasqan rurukunata, kaqllataq sapanka arroba ruru ofrendatawan haywanqa kinsa litro kuskannin aceiteta.

⁶Mosoq Killa rikhuriy p'unchaytaq haywanqa mana imanasqa huk torillota, soqta borregota, huk anejotawan.

⁷Chay torillotawan anejotawanmi qonqa huk arroba rurukunata, sapanka borregotawantaq haywanqa ima munasqan rurukunata, kaqllataq sapanka arroba ruru ofrendatawan haywanqa kinsa litro kuskannin aceiteta.

⁸Kamachikuqtaq haykunqa ukhu patioman punku haykuna wasinta, chaynillantataq lloqsipunqa.

⁹Chhayna fiestakunapi Señor Dios yupaychaq Israel llaqta runa hamuspaqa kay hinatan ruwanqa: wichay punkunta haykuspaqa, uray punkuntan lloqsinqa, uray punkunta haykuqtaq wichay punkunta lloqsinqa. Manapunin kaq haykusqan punkuntaqa lloqsinqachu, aswanpas hukkaq punkuntapunin lloqsinqa.

¹⁰Kamachikuqqa haykunqa Israel llaqta runantinmi, lloqsipunqapas paykunallawantaq.

¹¹Llapan fiestakunapipas hatun p'unchaykunapipas haywanqa huk arroba ruruta sapanka torillotawan, huk arroba ruruta sapanka anejotawan, sapanka borregotawantaq ima munasqan rurukunata haywanqa, kaqllataq sapanka arroba ruru ofrendatawan haywanqa kinsa litro kuskannin aceiteta.

¹²Kamachikuqqa tukuy sonqonmanta ruphachina sacrificiotapas, sumaq kawsay ofrendatapas Señor Diosman haywaqtinmi, inti lloqsimuy punkuta kicharinqaku. Hinan samana p'unchaypi hina haywanqa. Lloqsipuqtin hinataq punkutaqa wisq'apunqa.

¹³Sapa paqarmi mana imanasqa huk watayoq borregota Señor Diosman haywanqaku ruphachina ofrendata hina.

¹⁴Chaykunawanmi sapa paqar Señor Diosman haywanqaku huk arroba ruruq soqta p'akinta, huk litro aceitetawan, chaywan hak'uta tupachinapaq. Kaytaqa ruwallanqakupunin.

¹⁵Chay hinatan sapa paqar, borregotapas ruru ofrendatapas, aceitetapas haywanqaku mana thanispa ruphachina sacrificio kananpaq, nispa.

¹⁶Apu Señor Diosmi nillantaq: Kamachikuqchus tupaqnin hallp'ata churinman qoykapun chayqa, churinpaq mirayninpaqwanmi kanqa.

¹⁷Ichaqa kamachikuqchus kamachin runaman qoykunman hallp'anta chayqa, chay hallp'aqa kacharipuna watakamallan kamachinpa kanqa. Chay watataqmi hallp'anqa kaqta kamachikuqman kutipunqa, churinkunaman qosqanmi ichaqa paykunaqllapuni kapunqa.

¹⁸Kamachikuqqa manan atinchu pimantapas hallp'anta qechuspa qarqoyta. Churinkunamanqa paypa hallp'allantapunin qonqa, chay hinapi ama pipas mana hallp'ayoq kananpaq, nispa.

¹⁹Chaymantataq runaqa pusarikuwarqan uray lado haykunata ukhu patioman sacerdotekunaq wichay qhawashaq ch'uya wasinkunaman, chaymantataq qhawarichiwarqan inti haykuy lado cheqasta.

²⁰Niwarqantaq: Haqaypin sacerdotekunaqa hucha pampachaypaq ofrendakunata, qopuna ofrendakunatawan t'impuchinqaku, ruru ofrendakunatapas wayk'unqaku. Chay hinapin hawa patioman mana imallatapas horqonqakuchu, ch'uya-kaynin llaqta runata mana k'irinanpaq, nispa.

²¹Chaymantapas apallawarqantaq hawa patioman, hinaspan puriykachachiwarqan tawantin k'uchuntinta, hinan rikurqani sapanka k'uchupi patan qatasqa huch'uy patiota.

²²Llapanpas kaq sayaykaman kasqa, anchonman iskay chunka metro, wask'anmantaq chunka phisqayoq metro.

²³Sapanka huch'uy patiotaq rumimanta muyuriq huch'uy perqayoq kasqa, chay perqaq k'uchunpitaq q'onchakuna kasqa.

²⁴Hinan niwarqan: Chaykunan wayk'unanku wasikuna, chaypin Dios yupaychana wasipi serviqkuna llaqta runaq apamusqan sacrificiokunata wayk'unqaku, nispa.