Read DIOSPA QHELQACHISQ Quechua EZEQUIEL 6 Bible Online

EZEQUIEL 6 - DIOSPA QHELQACHISQ Quechua bible

EZEQUIEL 6

¹Señor Diosmi niwarqan:

²Qan, runaq churin, Israel orqokunata qhawarispa contrankupi sutiypi niy:

³Israel orqokuna, moqokuna, wayq'okuna, Apu Señor Diospa nisqanta uyariychis. Paymi nin: Qankuna pataman hatun maqanakuyta chayachimunaypaqñan kashani, hinaspan wak'a dioskuna yupaychanaykichis cheqaskunata thunisaq.

⁴Ñut'utapunin ruwasaq incienso q'apachina altarniykichiskunata, sacrificio haywana altarniykichiskunatapas, hinallataq runaykikunata wak'a diosninkuq qayllanpi wañurachisaq.

⁵Israel runakunaq ayantan wikch'usaq idolonkuq qayllanman, tullunkunatapas wikch'urparisaq altarkunaq muyuriqninman.

⁶Israel runakunaq hinantin tiyasqanku llaqtakunapas thunisqan kanqa, wak'a diosninku yupaychana cheqaskunapas raqay-raqaymi purunyapunqa. Altarninkupas pasaq thunisqan kanqa, wak'a diosninkupas ñut'urqarisqan kanqa, incienso q'apachinanku altarpas kumpasqan kanqa, paykunaq llapan ruwasqankuqa pasaqtan thunikunqa chinkapunqataq.

⁷Qankuna ukhupi askha runakuna wañuqtinmi ñoqaqa Señor Diospuni kasqayta yachankichis.

⁸Hinantin suyukunaman ch'eqechisqaypin wakinniykichis wañuymanta puchunqa,

⁹kamachi-kaypitaq kawsanqaku. Chay suyukunapi kawsashaq puchuqkunataqmi ñoqata yuyariwanqaku, yuyarillawanqakutaqmi imaynachus wasanchay huchankumanta llakikusqayta, paykunaqa ñoqamantan t'aqarikurqanku wak'a diosninku yupaychanankupaq. Paykuna kikinkun millakunqaku llapan mana allin ruwasqankumanta, millay p'enqaykuna ruwasqankumantawan.

¹⁰Hinaspan reqsiwanqaku ñoqapuni Señor Diosqa kasqayta, hinallataq hatun llakikunawan manchachisqayqa mana yanqachu kasqantapas, nispa.

¹¹Apu Señor Diosmi nin: Israel runakunan wañunqaku awqa-tinkuy maqanakuypi, yarqaypi, onqoypiwan. Chayrayku, qaparkachay t'aqllapakuspa hayt'apakuspa ima. Israelpa p'enqay mana chaninkuna ruwasqankumantawan nanaywan qaparkachay.

¹²Karupi kaqkunan onqoywan wañunqaku, qayllapi kaqkunataqmi awqa-tinkuy maqanakuypi wañunqaku, puchuqkunañataqmi yarqaymanta wañuranqaku. Ahinapin paykunata muchuchispa phiñakuyniyta thasnukusaq.

¹³Ayakunatataq rikunqaku chuta-chutata wak'a diospa muyuriqninpi, altarkunaq muyuriqninpi, suni orqo patakunapi, orqo ñawch'i patakunapi, q'omer mallki chakikunapi, rakhu encina mallki chakikunapipas, chaykunapin idolonkuta inciesowan q'apachirqanku. Chaykuna sucedeqtinmi yachankichis ñoqallapuni Señor Diosqa kasqayta.

¹⁴Makiytan haywarisaq muchuchinaypaq uray ladopi ch'inneqmanta, wichay ladopi Ribla llaqtakamaraq, suyuntan llapa llaqtakunatawan musphana mancharikuy purunman tukuchisaq. Chay hinapin ñoqa Señor Dios kasqayta reqsiwanqaku, nispa.