Read DIOSPA QHELQACHISQ Quechua OSEAS 10 Bible Online

OSEAS 10 - DIOSPA QHELQACHISQ Quechua bible

OSEAS 10

¹Israel suyuqa k'allmasapa uvas yura hinan, pay kikinpaqmi askhata rurun. Askhata rurusqanman hinan altarkunatapas askhata perqarqan, suyunpa t'ikarisqanman hinan yupaychana saywa rumikunatapas astawan sumaqcharqan.

²Israel suyuqa iskay sonqon, kunanqa huchanmantan muchuchisqa kanqa. Señor Diosmi altarninkunata ñut'unqa, yupaychana ruminkunatapas thuninqa.

³Kunallanmi ninqaku: Manan reyninchis kanchu, Señor Diosta mana manchakusqanchisrayku, reyqa, ¿imatataq ñoqanchispaq ruwanman? nispa.

⁴Yanqallan rimanku, yanqallan jurankupas rimanakunkupas, chaymi chaninchayqa mana chaninman tukupun, chakra wachukunapi wiñaq wañuna qora hinan.

⁵Bet-avén llaqtapi qori torilloq apasqa kasqanmantan Samariapi tiyaqkunaqa khatatatanku. Chay torillomantan llaqtaqa waqashan, hinallataq chay ídolo yupaychaq sacerdotenkupas waqashan. Sumaqchasqa idolonkun apasqa kapushan, chaymi paykunaqa khuyayta waqashanku.

⁶Torillo idolonkupas Asiria suyumanmi apasqa kanqa hatun reyman haywanankupaq. Ahinan Efraín runakunaqa p'enqachisqa kanqa, Israel suyun idolonmanta p'enqakunqa.

⁷Samaria reymi chinkapunqa, mayupi tuyuq ñut'u k'aspi hina.

⁸Mana chanin wak'a dios yupaychana cheqaskunapas thunisqan kanqa, chaykunapin Israel llaqtaqa astawan huchallikuq. Altarninkuna patapin khiskapas kisapas wiñanqa. Orqokunatan ninqaku: ¡Pakaykuwayku! nispa. Moqokunatan ninqaku: ¡Urmaykamuwayku! nispa.

⁹Señor Diosmi nin: Gabaapi ñoqa contra huchallikusqaykichismantapachan Israel runakuna qankunaqa huchallikushallankichispuni, chaymi chay millay runakunamanqa Gabaapi awqa-tinkuy aypanqa.

¹⁰Munasqay tiempopin paykunata muchuchisaq. Llaqtakunan paykuna contra huñukunqaku sinchi huchankumanta Israelta muchuchiqtiy.

¹¹Efrainqa llank'aq waka hinan, era saruytan munan, ichaqa sumaq kunkanmanmi yugota wataykuni, Efrainmi chutanqa, Judataq yapunqa, Jacobtaq rastranqa.

¹²Chanin kawsay muhuta qankunapaq tarpuychis, cheqaqta munakuwasqaykichis rurutataq cosechaychis. Purunta qankunapaq chakmaychis ñoqa Señor Diosta maskhana p'unchaykunaña kasqanrayku. Ñoqata maskhawaychis saminchaykunata parata hina chayachimunaykama.

¹³Qankunan ichaqa mana allinkaqta tarpurqankichis, mana chaninkaqtataq cosecharqankichis, hinaspan llullakuy ruruta mikhurqankichis. Atiyniykimanmi hap'ipakurqanki, askha kallpasapaykikunamanmi k'askakurqanki.

¹⁴Maqanakuy qapariymi llaqtaykiman chayamunqa, llapa pukaraykikunapas thunisqan kanqa, imaynan Salmanqa Bet-arbel llaqtata thunispa awqa-tinkuy p'unchaypi mamakunatapas wawakunantinta ch'aqerqarirqan hinata.

¹⁵Chay hinatan Betelpi tiyaqkunata ruwasunkichis sinchi huchaykichis hawa. Chay p'unchaymi tutallamanta Israel suyu reyqa wañurqochisqa kanqa, nispa.