Read DIOSPA QHELQACHISQ Quechua OSEAS 12 Bible Online

OSEAS 12 - DIOSPA QHELQACHISQ Quechua bible

OSEAS 12

¹Efrainmi wayrata kawsaq-masinpaq hina qhawan, p'unchay-ch'isiyaqmi rupha wayraq qhepanta phawan, astawanmi llullakushanpas runatapas maqashan. Asiria suyuwanmi rimanakun, Egipto suyumanmi aceitetapas apachin, nispa.

²Señor Diosmi Judá runakuna contra quejakushan, imaynachus purisqanman hinan Jacobpa mirayninta muchuchinqa, maychus ruwasqankunaman hinan payman kutichipunqa.

³Jacobmi mamanpa wiksanpi wawqenta talonninmanta hap'irqan, wiñay tukusqaña kaspataq Dioswan hap'inakurqan.

⁴Angelwanmi hap'inakurqan, hinaspan atiparqan, saminchananpaqmi waqaspa angelta valekurqan. Diosmi Jacobta Betelpi tarirqan, hinaspan chaypi paywan rimarqan.

⁵Tukuy-atiyniyoq Señor Diosmi Payqa, Señor Diosmi sutinqa.

⁶Qanqa Diosniykiq yanapaykusqan kutirikuy, cheqaqta munakuy, chaninta ruway, Diosniykiq ruwapunasuykita suyashallaypuni.

⁷Efrainqa Canaán suyu runa hina mana chaninmi, waqllisqa balanzawanmi runa q'otuyta yachan.

⁸Efrainmi nin: Arí, qhapaqyapunin, qhapaqmi kashani, ichaqa manan pipas mana chaninpi tarisqaymanta huchachawanmanchu, nispa.

⁹Egipto suyupi kashasqaykimantapachan ñoqaqa Diosniyki Señor Dios kani, karpakunapin tiyachisqaykipas Ch'uklla Ruwana Fiesta p'unchaykunapi hina.

¹⁰Profetakunamanmi rimaykurqani, sapa kutillan rikhuriykunata rikuchirqani, profetakunawanmi rikch'anachiy simikunata rimachirqani.

¹¹Galaadpin wak'a dioskunata yupaycharqanku, chaymi ch'usaqmanña tukupun. Gilgalpin torokunata sacrificanku, chaymi altarninkuqa chakrakunapi rumi soqyakuna hina kapunqa.

¹²Jacobmi Aram hallp'aman ayqekurqan, Israelmi warmita tarinanpaq servipakurqan, warmita tarinanpaqmi uywata michipakurqan.

¹³Señor Diosqa huk profetawanmi Egipto suyumanta Israel llaqtata horqomurqan, huk profetawanmi chay llaqtata waqaycharqan.

¹⁴Efraín runakunan Señor Diosta sinchita phiñachirqanku, chaymi Señor Diosqa runa wañuchisqankumanta paykunata huchachanqa, Señor Diosqa pisichasqankumantan paykunata muchuchinqa.