Read DIOSPA QHELQACHISQ Quechua OSEAS 13 Bible Online

OSEAS 13 - DIOSPA QHELQACHISQ Quechua bible

OSEAS 13

¹Efraín ayllu rimariqtinqa llapallan payta manchakurqanku, Israel suyupin payta hatuncharqanku, ichaqa Baal diosta yupaychaspan Efrainqa huchallikurqan, hinaspan wañukapurqan.

²Kunanpas Efraín runakunaqa huchallikushallankun, qolqenkuta ninapi unuyachispan idolokunata ruwakunku, yuyaykusqankuman hina yachaqkunaq ruwasqan idolokunata ruwakunku. Hinaspan ninku: ¡Sacrificiokunata diosninchiskunaman haywaychis! nispa. Runakunataq torilloman rikch'akuq idolokunata much'anku.

³Chaymi illarimuy chinkapuq pacha phuyu hina kanqaku, usqhaylla chinkapuq pacha illariy sulla hina kanqaku, eramanta wayraq phukusqan ñut'u paja hina kanqaku, t'oqomanta lloqsiq q'osñi hina kanqaku.

⁴Señor Diosmi nin: Ñoqan Egipto suyupi kasqaykichismantapacha Diosniykichis Señor Dios kani. Manan qankunaqa wak Diosta reqsinkichischu, aswanpas ñoqallatan, manan wak qespichiqpas kanchu, aswanpas ñoqallan.

⁵Ñoqan ch'inneqpi waqaycharqaykichis, chay sansashaq pampapi cuidarqaykichis.

⁶Ñoqan qankunata michirqaykichis, hinan saksaykurqankichis. Saksaykuqtiykichistaq sonqoykichisqa hatunchakurqan, hinan qankunaqa qonqapuwarqankichis.

⁷Chaymi ñoqaqa qankunapaq león hina kasaq, leopardo hinan ñanpi qhamiyasqaykichis.

⁸Uñankunata chinkachikuq china ukumari hinan hap'irqarispa sonqo llikaykichistapas qhasurqarisaq. León hinan chaypi mikhusqaykichis, phiña salqa animal hinan llik'isqaykichis.

⁹Israel runakuna, ñoqan thunisqaykichis. ¿Pitaq yanapaykusunkichis?

¹⁰Chayri, ¿maytaq reyniykichis qespichinasuykichispaq? ¿Maytaq llapa llaqtaykichiskunapi umalli runaykichiskunapas? ¿Manachu qankunaqa: Reytapas umallikunatapas qowayku, nispa mañakuwarqankichis?

¹¹Qankunapaq phiñakuspaymi reyta churapurqaykichis, qankunapaq k'arakta phiñakuspaytaqmi qechupurqaykichis.

¹²Efraín suyuq huchallikusqanqa qelqa k'uyupi qelqasqan kashan, chay hina waqaychasqan huchankunaqa kashan.

¹³Nacenan horan hunt'akun, ichaqa mana yuyayniyoq wawa kaspan, nacenanña kashaspanpas chakakun.

¹⁴¿Wañuy-pachaq atiyninmantachu paykunata kacharichisaq? ¿Wañuymantachu paykunata qespichisaq? Yaw, wañuy, ¿maytaq wañuchinayki? Yaw, wañuy-pacha, ¿maytaq muchuchinayki? ¡Manañan chay runakunata khuyapayasaqchu!

¹⁵Efraín suyuña qora hina t'ikarinqa chaypas, inti lloqsimuy lado rupha wayratan ñoqa Señor Diosqa ch'inneqmanta chayachimusaq, hinan pukyunpas ch'akipunqa, unu p'uytunpas tukukapunqa. Llapa chaniyoq waqaychasqa illankunatan awqanqa qechunqa.

¹⁶Ñoqa contra sayarisqanmantan Samaria llaqtaqa muchuchisqa kanqa, awqanpa espadanmi paykunata wañuchinqa, wawankunan pampaman ch'aqerqarisqa kanqa, wiksallisqa warmikunan khallarqarisqa kanqa, nispa.