Read DIOSPA QHELQACHISQ Quechua OSEAS 14 Bible Online

OSEAS 14 - DIOSPA QHELQACHISQ Quechua bible

OSEAS 14

¹Israel llaqtalláy, Diosniyki Señor Diosman kutipuy, huchallikuspan qanqa urmaykurqanki.

²Señor Diosman kutirikapuychis, kay hinata mañakuspaykichis: Tukuy mana chanin kasqaykuta pampachaykuwayku, sumaqta chaskiykuwayku yupaychayniykuta qanman qomunaykupaq.

³Manan Asiria suyuqa qespichiwanqakuchu, manañan maqanakuna caballomanpas sillakusaqkuchu, manan ima ruwasqaykutapas “diosniyku” nisaqkuñachu. Qanllan mana tayta-mamayoqta khuyapayaqqa kanki, nispa.

⁴Señor Diosmi nin: Ñoqan mana kasuwasqankuta kasukuyman t'ikrasaq, tukuy sonqon paykunata munaykakapusaq, manañan paykunapaq k'arakta phiñakusaqchu.

⁵Ñoqan Israel runakunapaq sulla hina kasaq, paykunataqmi hamanq'ay t'ika hina phanchirinqa, Líbano cedro sach'akuna hinan allin saphichasqa kanqa.

⁶K'allmankunan mast'arikunqa, olivo sach'a hinan munayllaña kanqa, mallkikunayoq Líbano orqo-orqo hinan q'aparinqa.

⁷Israel runakunan wakmanta llanthuypi tiyaykunqaku, hinaspan trigo hina wiñanqaku, uvas yura hinan t'ikanqaku, Líbano vino hinan ancha reqsisqa kanqaku.

⁸Yaw, Efraín, ¿iman idolokunawan ruwanay? Ñoqan qanta uyarisqayki hinaspan waqaychasqayki. Ñoqan qanpaqqa q'omer ciprés sach'a hinallapuni kani, ñoqataqmi ruruchiqniykipas kani, nispa.

⁹Pipas yachayniyoqqa kay simikunata yachachun, pipas yuyayniyoqqa kaykunata entiendechun. Señor Diospa ñanninkunaqa chaninkaman, chanin runakunataq chay ñanninta purinku, millay runakunataq ichaqa chaykunapi urmanku.