Read DIOSPA QHELQACHISQ Quechua OSEAS 5 Bible Online

OSEAS 5 - DIOSPA QHELQACHISQ Quechua bible

OSEAS 5

¹Señor Diosmi nin: ¡Yaw, sacerdotekuna, kayta uyariychis! ¡Yaw, Israel llaqta, maki uyariychis! ¡Yaw, reypa ayllun kaqkuna, maki uyariychis! Qankunan juzgasqa kankichis, Mizpapin toqlla karqankichis, Tabor orqo patapin mast'asqa llika karqankichis,

²Sitim pampapi p'uytu t'oqoqmi karqankichis, chaymi llapaykichista ñoqa muchuchisqaykichis.

³Ñoqan Efraín runakunata allinta reqsini, Israel runakunataqa sut'itapunin rikuni. Arí, Efraintaq wasanchawan chayqa, Israelqa qhellichakapunmi, nispa.

⁴Millay ruwasqankun Diosman kutirikapunankupaq mana kacharinchu. Qhelli huchapi puriyman k'askakuspankun Señor Diosta mana reqsinkuchu.

⁵Israel runakunaq anchaykachayninkun paykuna contra sut'ita rimarin. Efraín runakunan huchallikusqallankupitaq misk'akunku, Judá runakunapas paykunallawantaqmi misk'akunku.

⁶Ovejakunantin wakakunantinmi Señor Diosta maskhaspa purinqaku, ichaqa manan payta tarinqakuchu, paykunamanta Señor Dios t'aqakapusqanrayku.

⁷Paykunaqa Señor Diostan qheparparinku q'aqa wawakunata churiyaspa, chaymi mosoq killa rikhurimuqtin, paykunaqa chakrakunantin ch'inyachisqa kanqaku.

⁸Gabaapi waqrata tocaychis, Ramapipas putututa waqachiychis, awqa-tinkuypaq wakichikunapaq Bet-avenpi qapariychis: ¡Benjamín ayllu makilla qhawakuychis! nispa.

⁹Efraín runakunaqa muchuchiy p'unchaypin ch'inyachisqa kanqaku, cheqaqpuni kanantan Israel ayllukunapi willani.

¹⁰Señor Diosmi nin: Judá suyu umallikunaqa qorpakunata wasapaqkuna hinan kanqaku. Paykunamanmi k'arak phiñakuyniyta unuta hina chayachimusaq.

¹¹Efraín runakunan sarunchasqa kashanku, rimanakuyman hina chaskisqanku hallp'akunatan qechuchikapunku, yanqa dioskunata qatikuytapuni munasqankurayku.

¹²Ñoqan Efraín suyupaq thuta kuru hina kasaq, Judá suyupaqtaq tullu ismuy hina kasaq.

¹³Efraín runakunan onqosqa kasqankuta reparakushaspanku Asiria suyuta rirqanku, Judá runakunataq ismuripusqankuta reparakushaspanku hatun reyman yanapay mañakuqta kacharqanku. Chay reyqa manan qhaliyachiyta atisunkichischu, ismurisqaykichistapas manan hampiykuyta atisunkichischu.

¹⁴León hinan Efraín runakunaman phawaykusaq, uña león hinan Judá runakunaman phawaykusaq. Ñoqa kikiymi paykunata llik'irqarisaq, hinaspaymi ripusaq. Paykunatan achurikuspa aysarikusaq, manataqmi pipas kacharichiwanqachu.

¹⁵Hinaspan maychus tiyanayman kutipusaq huchankumanta muchuspa maskhawanankukama, llakipakuyninkupin maskhawanqaku, nispa.