Read DIOSPA QHELQACHISQ Quechua JOEL 2 Bible Online

JOEL 2 - DIOSPA QHELQACHISQ Quechua bible

JOEL 2

¹Señor Diosmi nin: Sión orqopi trompetata tocaychis, ch'uya orqoypi kunkayoqta waqyakuychis, nispa. Kay suyupi llapa tiyaqkuna khatatataychis, Señor Diospa muchuchinan p'unchay chayamushasqanrayku. Chay p'unchayqa asuykamushanñan,

²tutayaq laqhayaq p'unchaymi kanqa, yana phuyu llanthu p'unchaymi kanqa. Langostakunaqa askhallaña kallpasapa soldadokuna hinan hamushan, chaykunaqa tutayaykuy hinan orqo patakunaman mast'arikamushan, manan hayk'aqpas chay hinaqa karqanchu, manataqmi hayk'aqpas chay hinaqa kanqachu.

³Ñawpaqenkupi kaqtapas nina hinan ruphaykunku, qhepankupi kaqtapas nina rawray hinan q'olaykunku. Manaraq chayamushaqtinkuqa Edén huerta hinan hallp'aqa karqan, ripuqtinkutaq ch'inneq hina ch'usaq kapun, llapallantan chaykunaqa mikhurqapunku.

⁴Langostakunaqa caballomanmi rikch'akunku, awqa-tinkuypi caballokuna hinaraqmi phawanku,

⁵orqo patakunaman p'itaspankuqa awqa-tinkuypi carretakuna hinan raqhaqenku, rastrojota ruphaykuq nina rawray hinan p'araqenku, maqanakunapaq wachuchakuq kallpasapa soldadokuna hinan kanku.

⁶Runakunan chaykunata qhawarispa khatatatanku, llapallankun q'ellumanraq tukunku.

⁷Awqa-tinkuyman phawaq soldadokuna hinan langostakunaqa phawanku, awqa-tinkuq runakuna hinan perqata seqanku. Sapankan wachuchasqa purin, manataq mayneqmanpas q'ewirinchu.

⁸Manan paykunaqa tanqanakunkuchu, sapankan purinanta purinku, wach'ina chawpintan phawaykunku, manataqmi wachuchakusqankuta rawinkuchu.

⁹Llaqtamanmi phawaykunku, perqa patantan phawanku, wasikunamanmi wichanku, suwa hinan ventananta haykunku.

¹⁰Ñawpaqenkupin hallp'a pacha khatatatan, hanaq pachan chukchun, intipas killapas tutayanmi, ch'askakunapas manañan k'anchankuñachu.

¹¹Señor Diosmi ejercitonpa ñawpaqenpi kunununuspa kamachikun, mana yupay atinan soldadonkunaqa, kallpasapallañan kamachikusqanta hunt'aqkunaqa, hatunmi sinchi manchanataqmi Señor Diospa muchuchinan p'unchayqa, ¿pitaq chaytaqa aguantayta atinman?

¹²Señor Diosmi nin: Kunanqa tukuy sonqoykichiswan kutirikamuwaychis ayunaspa, waqaspa, llakikuspa ima, nispa.

¹³Llakikuspa p'achaykichista qhasunaykichismantaqa sonqoykichista qhasukuychis. ¡Diosniykichis Señor Diosman kutirikuychis! Payqa sumaq sonqon, llakipayakuqmi, mana usqhay phiñakuqmi, tukuy tiempo munakuqmi, muchuchiy yuyaykusqantapas usqhay saqepuqmi.

¹⁴Ichapaschá payqa qankunaman kutirimusunkichis, hinaspa khuyapayasunkichis, sumaq cosechawantaq saminchasunkichispas. Hinan qankunaqa chakraq rurusqantapas vinotapas Diosniykichis Señor Diosman haywayta atiwaqchis.

¹⁵Sión orqopi trompetata tocaychis, Diospa qayllanpi ayunanapaq llaqta runakunata kamachiychis, Diosmanta mañakunapaq runakunata huñuykuychis.

¹⁶Runakunata huñuychis, hinaspa Diospaq t'aqaychis. Kurak runakunata huñuychis, erqekunata, ñuñuq wawakunatapas huñuychis. Chayllaraq casarasqa qharipas puñunan wasimanta lloqsimuchun, chayllaraq casarasqa warmipas puñunanmanta lloqsimuchun, huñunakuyman rinankupaq.

¹⁷Yupaychana wasiq ukhukaq pationpi altar qayllapi Señor Diosta serviq sacerdotekuna waqaspa mañakuchunku: Señor Diosnillayku, llaqtaykita khuyapayaykuy, ama llaqtaykitaqa runaq k'aminanpaq saqerpariychu, ama wak suyukuna paykunamanta asikuchunkuchu, llaqtakunapas ama nichunkuchu: ¿Maytaq Diosninkuri? nispaqa.

¹⁸Señor Diosqa hallp'anmantan anchata sienterqan, llaqtan runakunatan khuyapayarqan,

¹⁹chaymi Señor Diosqa paykunaman kutichimurqan: Qosqaykichismi trigotapas, vinotapas, aceitetapas, chaykunawanmi saksaykunkichis, manañan hayk'aqpas wak suyukuna qankunamanta asikunqañachu.

²⁰Wichaymanta wakwamuq langostatan qayllaykichismanta karunchasaq, hinaspan chaykunata ch'aki hallp'a ch'inneqman wikch'usaq. Ñawpaq puriqkunatan inti lloqsimuy Kachi Qochaman wikch'uykusaq, qhepa puriqkunatataq inti haykuy lamar-qochaman wikch'uykusaq, chaykunapin ismurispa asnarinqaku, qankunata muchuchisqasuykichismantan langostakunata chay hinata ruwasaq, nispa.

²¹Hallp'alláy ama manchakuychu, kusikuy, q'ochukuy, Señor Diospa musphanakunata ruwasqanmanta.

²²Salqa animalkuna, ama manchakuychischu, q'achu pampakunan q'omeryashanña, sach'akunan rurushanña, higos sach'apas uvas yurapas rurushanñan.

²³Sionpi tiyaqkuna, kusikuychis, Diosniykichis Señor Diospa ruwasqanmanta q'ochukuychis. Paymi ñawpaqkaq paratapas qhepakaq paratapas chayachimusunkichis, imaynan unay watakunata parachimurqan hinata.

²⁴Erakunan trigo hunt'a kanqa, vino waqaychanakunapas aceite waqaychanakunapas llimp'arinqan.

²⁵Señor Diosmi nin: Ñoqan qankuna contra chayachimurqani ejercitota hinaraq langosta kurukunata, hinan wakwamuspa uña langosta, hatun langosta, wak langostakunapas llapallanta mikhuspa tukurqan, kunantaq chay watakunapi langostaq mikhusqanmanta kutichipusqaykichis.

²⁶Saksanaykichiskaman mikhunkichis, hinaspa ñoqa Diosniykichis Señor Diosta yupaychawankichis, ñoqan ancha musphanakunata ruwapurqaykichis. Manañan hayk'aqpas qankunaqa p'enqachisqachu kankichis,

²⁷hinaspan yachankichis qankunawan kashasqayta, ñoqa Diosniykichis Señor Dios kasqayta, manataq wak diosqa kasqantapas. ¡Manañataqmi hayk'aqpas llaqtay Israelqa p'enqachisqachu kanqa!

²⁸Chaykuna qhepatan llapa runaman Espirituyta kachaykamusaq, hinan churiykichiskunapas ususiykichiskunapas sutiypi profetizanqaku, kurak runaykichiskunapas mosqokunqaku, wayna churiykichiskunapas rikhuriykunatan rikunqaku.

²⁹Chay p'unchaykunapiqa Espirituytaqa kachaykamullasaqtaqmi qhari kamachiykunamanpas warmi kamachiykunamanpas.

³⁰Hanaq pachapipas kay pachapipas musphanakunatan rikhurichisaq, runakunan wañuchinakunqaku, llaqtakunan ruphaykachisqa kanqa, q'osñin phuyu hinaraq hatarinqa.

³¹Ñoqa Señor Diospa manchana hatun p'unchayniy manaraq chayamushaqtinmi inti tutayanqa, killataq yawar pukaman tukunqa, nispa.

³²Ichaqa llapallan Señor Diosta waqyakuqkunan qespichisqa kanqaku, Señor Diospa prometesqanman hinan, Sión orqopi pakaykukuna kanqa, paypa akllakusqankunan Jerusalenpi qespichisqa qhepanqaku.