Read DIOSPA QHELQACHISQ Quechua AMÓS 2 Bible Online

AMÓS 2 - DIOSPA QHELQACHISQ Quechua bible

AMÓS 2

¹Señor Diosmi nin: Moab runakunan sinchitaña huchallikun, chaymi paykunataqa muchuchisaqpuni, Edom reypa tullunkunatan ruphaykachirqan usphayachinankama.

²Chaymi Moab suyuta ninawan hap'iykachisaq, Queriotpi qhapaq wasikunatataq ruphaykunqa. Hinan Moabqa awqa-tinkuy qaparkachaypi trompetapas waqashaqtin wañunqa.

³Moab kamachikuqtan wañuchisaq, hinallataq llapa umalli runakunatapas, ninmi Señor Diosqa.

⁴Señor Diosmi nin: Judá runakunan sinchitaña huchallikun, chaymi paykunataqa muchuchisaqpuni, yachachikuyniykunatan saqerparirqanku, manataq kamachikuy simiykunata kasukurqankuchu, aswanpas tayta-mamankuq yupaychasqan idolokunata yupaychaspan pantapurqanku.

⁵Chaymi Judá suyuta ninawan hap'iykachisaq, Jerusalenpi qhapaq wasikunatataq ruphaykunqa, nispa.

⁶Señor Diosmi nin: Israel runakunan sinchitaña huchallikun, chaymi paykunataqa muchuchisaqpuni, chanin runatan qolqeman vendenku, wakcha runatataq iskay usut'aman chhalanku.

⁷Mana piniyoqkunatan sinchita sarunchakunku, huch'uyyaykukuqpa uyarichikusqantapas hark'anku. Taytantin churintinmi kaq sipasllawan puñunku, chhaynatan ch'uya sutiyta qhellichanku.

⁸Prendasqa p'acha patapin mayqen altar qayllapipas qhelli huchata ruwanku. Multa sik'isqa vinotataqmi diosninkuq wasinpi ukyanku.

⁹Ñoqataq ichaqa ñawpaqenkupi Amor llaqta runakunata wañurqarichirqani, sayayninkun cedro sach'a hina karqan, encina sach'a hinataq ch'ilallaña, ñoqataq k'allmankunatapas p'akirqarirqani, saphinkunatapas t'irarqarirqani.

¹⁰Qankunataqa Egipto suyumantan horqomurqaykichis, hinaspan tawa chunka watantin ch'inneqninta purichimurqaykichis, Amor llaqta runakunaq hallp'anta hap'ikapunaykichispaq.

¹¹Wakin churiykichistan profetata sayarichirqani, wakin waynaykichistataq Nazareo runakuna kananpaq t'aqakurqani, Israel runakuna, ¿manachu chayqa chay hina? Ñoqa Señor Diosmi chayta nini.

¹²Qankunan ichaqa Nazareo runakunaman vinota ukyachirqankichis, profetakunatataq: Ama profetizaychischu, nirqankichis.

¹³Kunanqa ñoqan pampaman ñit'iykusqaykichis, imaynan winay q'epintin carretaqa pampata ñit'iykun hinata.

¹⁴Usqhaylla phawaqpas manan ayqeyta atinqachu, kallpasapatapas manan kallpanqa yanapanqachu, allinnin maqanakuqpas manan qespichikunqachu.

¹⁵P'eqtawan wach'iqpas manan chutayta atinqachu, usqhaylla phawaqpas manan qespichikunqachu, caballopi sillakuqpas manan qespichikunqachu.

¹⁶Chay p'unchaypiqa aswan allinnin maqanakuqpas mana imantinmi ayqekunqa, ninmi Señor Diosqa.