Read DIOSPA QHELQACHISQ Quechua AMÓS 3 Bible Online

AMÓS 3 - DIOSPA QHELQACHISQ Quechua bible

AMÓS 3

¹Israel runakuna, qankuna contra Señor Diospa rimasqanta uyariychis, Egipto suyumanta horqomusqan llaqta contra paypa rimasqanta uyariychis. Paymi nin:

²Kay pachantin llapa llaqtakunamantaqa qankunallatan akllakurqaykichis, chaymi tukuy mana allin ruwasqaykichiskunamanta muchuchisqaykichis, nispa.

³Purinankupaq sonqota mana tupachishaspa, ¿iskay runaqa kuska purinmanchu?

⁴¿Mana mikhunata hap'ishaspa, leonqa hatun yunkapi qaparinmanchu? ¿Mana imatapas hap'ispalla uña leonqa t'oqonmanta qaparimunmanchu?

⁵¿Toqllapi mana mikhuna kaqtin, phalaq animalqa sipitapi urmanmanchu? ¿Mana imatapas hap'ispalla toqllaqa pampamanta t'iwkanmanchu?

⁶¿Llaqtapi trompeta mana waqaqtinqa runakuna mancharikunmanchu? ¿Ima mana allinpas llaqtapi kanmanchu Señor Dios mana chayachimushaqtin?

⁷Manan, manapunin Señor Diosqa imatapas ruwanchu yuyaykusqanta kamachin profetakunaman manaraq willashaspaqa.

⁸¡Leonmi qaparin! ¿Pitaq mana mancharikunmanchu? ¡Señor Diosmi rimarin! ¿Pitaq mana profetizanmanchu?

⁹Asdod llaqtaq qhapaq wasinkunapi willamuychis, Egipto suyuq qhapaq wasinkunapipas willamuychis. Samaria orqokunaman huñunakamuychis, hinaspa chaypi ch'aqwaykunata rikuychis, hinallataq chay ukhupi sarunchasqakunatapas, nispa.

¹⁰Señor Diosmi nin: Manan chaninkaqta ruwayta yachankuchu, qhapaq wasinkupin qechusqatapas llat'anasqatapas huñunku.

¹¹Chayraykun suyuntinta huk awqa muyuykunqa, hinaspan pukaraykita thuninqa, qhapaq wasiykikunatapas llat'ananqa, ninmi Señor Diosqa.

¹²Señor Diosmi nin: Imaynan michiqqa leonpa siminmanta ovejaq iskay chakinta qechun, otaq ninri puchullantapas, chay hinan Samariapi tiyaq Israel runakunaqa pisilla qhepanqaku, Damascomanta apamusqa sumaq puñunapi chutarayaqkunapas, nispa.

¹³Tukuy-atiyniyoq Señor Diosmi nin: Uyariychis, Jacobpa ayllun contra rimariychis.

¹⁴Huchallikusqankumanta Israelta muchuchisqay p'unchaypin Betelpi kaq altarkunata thunisaq, altar waqrakunapas willusqan kanqa, pampamantaq urmanqa.

¹⁵Thunisaqmi chiraw mitapaq wasitapas q'oñi mitapaq wasitapas, thunisaqmi marfilwan[3] sumaqchasqa wasikunatapas, purunyachisaqmi chay munay wasikunatapas. Ñoqa Señor Diosmi chayta nini.