Read DIOSPA QHELQACHISQ Quechua AMÓS 5 Bible Online

AMÓS 5 - DIOSPA QHELQACHISQ Quechua bible

AMÓS 5

¹Israel runakuna, simiykunata uyariychis, qankunamanta kay llakiy-llaki takisqayta uyariychis:

²Ch'uya sipas Israelmi urmaykapun, manañan astawanpas sayarinñachu. Pampapin wikch'urayapushan, manan pipas sayarichiqnin kanchu, nisqayta.

³Apu Señor Diosmi Israel llaqtata nin: Waranqa runawan hatun maqanakuyman lloqsiq llaqtaqa pachakllawanñan kutimpunqa, pachakwan lloqsiq llaqtapas chunkallawanñan kutimpunqa.

⁴Señor Diosmi Israel llaqtata nin: Asuykamuwaychis, kawsankichismi.

⁵Ama Betelman asuykuychischu, amataq Gilgalta riychischu, amallataq Beersebamanpas uraykuychischu. Gilgalpi tiyaqkunaqa preso apasqapunin kanqa, Betel llaqtapas thunisqan kanqa, nispa.

⁶Chhaynaqa, Señor Diosman asuykuychis, kawsankichistaqmi, paqtan Josepa ayllunta nina hina ruphaykunman, mana pipas Betelpi nina wañuchiq kaqtin.

⁷¡Ay, imaynaraqmi kankichis chaninchaytapas ajenjota hina hayaman tukuchiqkuna! ¡Ay, imaynaraqmi kankichis kuskachaytapas pisicharpariqkuna!

⁸Señor Diosmi ch'aska Qototapas Hatun Cruztapas ruwaqqa, paymi laqhayaqta p'unchayman tukuchiqqa, p'unchaytapas laqhayaqman tukuchiqqa, paymi lamar-qocha unuta phuyuchimuqqa, hinaspa hallp'a pataman chayta ch'aqchuqqa.

⁹Señor Diosmi sutinqa. Paymi kallpasapakunata wañurqarichiqqa, allin perqasqa llaqtatapas thunichiqqa.

¹⁰¡Ay, imaynaraqmi kankichis, juzganapi chanin rimaqta cheqnikuqkuna! ¡Ay, imaynaraqmi kankichis, cheqaqkaqta rimaqtapas millakuqkuna!

¹¹Qankunaqa mana piniyoqtan sarunchankichis, trigo llank'asqanku rurutapas sik'inkichis, chayrayku thupasqa rumimanta wasikunata perqarqankichis chaypas, manan chaykunapi tiyankichischu, sumaq uvas yurakunata plantarqankichis chaypas, manan vinota ukyankichischu.

¹²Ñoqaqa yachanin askha kuti mana kasukusqaykichista, askhallataña huchallikusqaykichistapas. Yachanin chanin runata llakichisqaykichista, lluk'iykusqatapas chaskikusqaykichista, wakchakunaq juzganapi uyarichikusqanta waqllichisqaykichistapas.

¹³Chaymi allin yuyayniyoqqa upallakun, chay p'unchay mana allin kasqanrayku.

¹⁴Allinkaqta maskhaychis, amataq mana allinkaqtachu, hinan kawsankichis. Ahinapin Tukuy-atiyniyoq Señor Diosqa qankunawan kashanqa, imaynan nirqankichis hina.

¹⁵¡Mana allinkaqta cheqnikuychis! ¡Allinkaqta munakuychis! Juzganapipas allin chaninchayllapuni kachun, ichapas Tukuy-atiyniyoq Señor Diosqa Josepa ayllunmanta puchuqta khuyapayanman.

¹⁶Tukuy-atiyniyoq Señor Diosmi nin: Llapa plazakunapin waqay kanqa, llapa callekunapin sonqo nanay waqay kanqa. Chakrapi llank'apakuqkunatapas waqapakuqkunatapas waqanankupaqmi waqyanqaku.

¹⁷Llapa uvas chakrakunapin waqaykunqaku, ñoqaqa muchuchinaypaqmi chayamusqaykichis, ninmi Señor Diosqa.

¹⁸¡Ay, imaynaraqmi kankichis Señor Diospa chayamunallantaña munaqkuna! ¿Imaynataq qankunapaq chay p'unchayri kanqa? ¡Laqhayaqmi kanqa, manataq k'anchaychu!

¹⁹Leonmanta ayqekushaspa ukumariwan tupaq hinan kanqa, otaq wasinman haykushaspa perqaman tawnaykukuqtin mach'aqwaypa kanisqan hinan kanqa.

²⁰Arí, Señor Diospa p'unchayninqa laqhayaqmi kanqa, manataq k'anchaychu, tutayaqmi kanqa, manataq sut'ichu.

²¹Tukuy-atiyniyoq Señor Diosmi nin: Cheqnikunin, millakunin fiestaykichiskunataqa, manataqmi kusikusaqchu huñukuyniykichiswanqa.

²²Ruphachina sacrificiotaña haywawankichis chaypas, manan chaykunataqa chaskisaqchu. Ofrendaykichistaqa manan qhawarillasaqpaschu, manallataq wirayachisqa animalniykichistapas allipunachiq sacrificioykichistapas.

²³Karunchawaychis askhallaña takiyniykichiskunata, arpaykichiskunaq waqasqantapas manan uyariyta munanichu.

²⁴Aswanpas chaninchayqa unu hina hunt'a phawachun, kuskachaypas mana tukukuq mayu hina kachun.

²⁵Yaw, Israel ayllu, ¿chayri ch'inneqpi tawa chunka watantinqa sacrificiokunatapas ofrendakunatapas haywawarqankichischu? Manan.

²⁶Kunanpas reyniykichis Sicut-tan, ch'askaykichis Quiyutan, ruwakusqaykichis idolokunatan wantunkichis.

²⁷Damasco llaqtaq haqayninkaman apachisqaykichis, ninmi Señor Diosqa. Paypa sutinqa Tukuy-atiyniyoq Señor Diosmi.