Read DIOSPA QHELQACHISQ Quechua NÚMEROS 18 Bible Online

NÚMEROS 18 - DIOSPA QHELQACHISQ Quechua bible

NÚMEROS 18

¹Señor Diosmi Aaronta nirqan: — Ñoqawan Tupana Karpapi huchallikunqaku chayqa, qanmi churiykikunapiwan aylluyki Leví runakunapiwan huchachasqa kankichis, sacerdote llank'aypi huchallikuqtinkutaq ichaqa qanpiwan churiykikunallapiwan huchachasqa kankichis.

²Leví ayllumanta taytaykiq ayllun runakunatan waqyanki, qantapas churiykikunatapas karpapi llank'ayniykichista yanapanasuykichispaq.

³Paykunaqa qanpa kamachisqallaykin karpapi ruwanankuta llank'anqaku, ichaqa aman qayllaykunqakuchu Ch'uya Cheqasmanpas altarmanpas, mana chayqa wañunqakun, qankunapas wañullankichistaqmi.

⁴Ñoqawan Tupana Karpapiqa qankunawan kuskan llank'anqaku, paykunaqa karpata qhawaspan lliwta ruwanqaku. Ichaqa aman pipas wak runaqa qankunaman qayllaykusunkichischu.

⁵Qanpiwan churiykikunallapiwanmi Ch'uya Cheqaspipas altarpipas llank'ankichis, ahinapin manaña Israel runakunapaq phiñakusaqchu.

⁶Ñoqan Leví ayllu runakunataqa Israel runakuna ukhumanta akllarqani qankunaman qonaypaq, paykunaqa ñoqapaq t'aqasqan kanku karpapi llank'anankupaq,

⁷ichaqa altarpipas Ch'uyay-ch'uya Cheqaspipas qanpiwan churiykikunallapiwanmi lliwta ruwankichis. Chay llank'ayqa qankunamanmi tupasunkichis, ñoqan qankunaman huk sumaq sonqota hina sacerdote-kayta qorqaykichis. Pipas mana sacerdote kashaspa chay llank'ayta ruwaqqa, wañunanpaq huchachasqan kanqa, nispa.

⁸Señor Diosmi Aaronta nirqan: — Ñoqaman apamuwasqanku ofrendakunataqa qanmi waqaychanki. Israel runakunaq ñoqapaq t'aqasqan ofrendakunatan qanman churiykikunamanwan qoykichis tupaqniykichis hina wiñay kananpaq.

⁹Ruru ofrendakunapas, hucha pampachay ofrendakunapas, kutichipuy ofrendakunapas ancha ch'uyan, sapanka ofrendakunamanta mana ruphachisqa puchuq kaqkunan qanmanpas churiykikunamanpas tupasunkichis.

¹⁰Chay ofrendakunataqa qharikunallan mikhunkichis, ichaqa karpaq ch'uya kanchanpin mikhunkichis, ch'uya kasqanrayku.

¹¹Qollaykitaqmi qanman, churiykikunaman ususiykikunamanpas, Israel runakuna maywisqa ofrendakunata haywawanqa chaykunata, chaymi tupaqniykichis hina wiñaypaq kashallanqapuni. Aylluykimanta mayqen runapas ch'uya kashaqqa mikhunmanmi chaykunata.

¹²Qollaykitaqmi Israel runakunaq sapa wata ñawpaqkaq ruru ñoqa Señor Diosman apamuwasqankutapas, allinnin aceitemanta, vinomanta, trigomantawan.

¹³Hinallataq cosechankumanta ñawpaqkaq ruru haywawasqanku ofrendakunapas qanpaq kanqa. Aylluykimanta mayqen runapas ch'uya kashaqqa chaykunata mikhullanmanmi.

¹⁴Israel runakunaq ñoqapaqpuni t'aqasqan tukuy ofrendakunan qanpaq kanqa.

¹⁵Israel runakunan llapa phiwi churinkuta, llapa uywakunaq ñawpaq wachay uñankunata qowanqaku, chaykunaqa qanpaqmi kanqa. Phiwi churinkutan, mana mikhuna animalpa ñawpaq wachay uñankunatan ichaqa horqokapunqaku.

¹⁶Phiwi churi horqokapuytaqa huk killa nacesqan qhepataña paganqaku, chaymi kanqa phisqa qolqe, Ñoqawan Tupana Karpapi kaq chanin qolqeman hina.

¹⁷Wakaq ñawpaq wachay uñanta, ovejaq ñawpaq wachay uñanta, cabraq ñawpaq wachay uñantan ichaqa mana horqokapuyta atinkumanchu. Chaykunaqa ñoqapaq t'aqasqañan, nak'anallaykiñan, hinaspa yawarninta altar pataman ch'aqchunki, wirantataq sonqoyman chayaq sumaq q'apayniyoq mikhuna ofrendata haywawanki.

¹⁸Israel runakunaq sapaq t'aqasqan ofrendakunamanta pechonpas paña chakanpas qanpaqmi kanqa, chay hinallataqmi ñawpaq wachay uñakunaq aychanpas qanpaq kanqa.

¹⁹Israel runakunaq ñoqapaq t'aqasqan llapa ofrendakunatan qosqaykichis, qanman churiykikunamanwan ususiykikunamanwan. Chaymi tupaqniykichis, wiñaypaqtaq kashallanqapuni. Qanwan mirayniykiwan kay rimanakuyniyqa wiñaypaqmi, mana p'akinan kanqa, nispa.

²⁰Señor Diosmi Aaronta nirqan: — Manan Israel runakuna ukhupi qanpa hallp'aykipas kaqniykipas kanqachu. Ñoqan Israel runakuna ukhupi kaqniykipas herenciaykipas kani.

²¹Hinallataq Leví runakunamanpas kaqninta hina qoni Israel runakunaq diezmonkunata, Ñoqawan Tupana Karpapi llank'asqankumanta pagonkuta hina.

²²Wakin Israel runakunaqa kunanmantapacha Ñoqawan Tupana Karpaman aman asuykunqakuchu, mana chayqa huchallikuspan wañunqaku.

²³Chay karpapi llank'aykunataqa Leví ayllu runakunallapunin llank'anqaku, ima mana allinpas chaypi kaqtinqa paykunan huchachasqa kanqaku, chayqa wiñaypaq kamachikuymi kanqa. Leví runakunaqqa manan Israel runakuna ukhupi hallp'anku kanqachu.

²⁴Chaymi paykunaman kaqninta hina qoni Israel runakunaq apamuwasqanku diezmokunata. Chayraykun paykunataqa nirqani: Manan Israel runakuna ukhupi hallp'aykichis kanqachu, nispa.

²⁵Señor Diosmi Moisesta nirqan:

²⁶— Leví runakunata niy, Señor Diosmi nin: Israel runakunaq diezmonkutan kaqniykichista hina qosqaykichis, hinan chay chaskisqaykichis diezmokunamanta t'aqallankichistaq diezmoykichista ñoqaman haywawanaykichispaq.

²⁷Chaymi kanqa ñoqaman qowanaykichis ofrenda, Israel runakunaq trigomanta vinomanta qowanan diezmo hina.

²⁸Ahinatan Israel runakunamanta chaskisqaykichis diezmomanta ñoqapaq diezmoykichista t'aqankichis, hinaspan chayta sacerdote Aaronman qonkichis.

²⁹Chay llapan chaskisqaykichismantan ñoqa Señor Diospaq aswan allinnin kaqta t'aqaspa haywawankichis.

³⁰Tukuy chaykunamanta allinnin kaqta ñoqapaq t'aqankichisña chayqa, puchuq trigopas vinopas qankunaq kaqniykichismi kapunqa,

³¹maypin munasqaykichispitaq chayta mikhunkichis qankunapas aylluykichispas. Ñoqawan Tupana Karpapi llank'asqaykichismanta pagoykichismi chayqa.

³²Ñoqaman tupawaq aswan allinnin kaqta t'aqaspaykichisña, puchuqta mikhuspaqa manan huchallikunkichischu. Ahinapin Israel runakunaq ch'uya t'aqasqan ofrendakunataqa mana qhellichankichischu, manataq wañuypaq huchachasqapaschu kankichis, nispa.