Read DIOSPA QHELQACHISQ Quechua NÚMEROS 19 Bible Online

NÚMEROS 19 - DIOSPA QHELQACHISQ Quechua bible

NÚMEROS 19

¹Señor Diosmi Moisesta Aarontawan kamachirqan:

²— Israel runakunata kamachiy puka ch'umpi wakata apamunankupaq, chay wakaqa mana imanasqa allinninmi kanqa, mana hayk'aqpas yugo churasqa.

³Chay wakatan sacerdote Eleazarman qonkichis, paytaq karpa-karpamanta wakman qatinqa, hinaspa ñawpaqeypi nak'anankupaq kamachinqa.

⁴Sacerdote Eleazartaq nak'asqa yawarman dedonta challpuykuspa, qanchis kutita yawarwan ch'allanqa Ñoqawan Tupana Karpaman haykuna cheqasta.

⁵Chaymantataq sacerdoteq ñawpaqenpi waka aychatapas, qaratapas, yawartapas, phusnutapas ruphachinqa.

⁶Sacerdotetaq hap'inqa cedro k'aspita, huk huch'uy muña k'allmata, sani-puka q'aytutawan, hinaspa llapanta waka ruphachisqa ninaman wikch'uykunqa.

⁷Chaymantataq sacerdoteqa p'achanta t'aqsakunqa, cuerpontapas bañakunqa, hinaspa karpa-karpaman haykupunqa, ichaqa qhelliraqmi kanqa ch'isinkama.

⁸Hinallataq waka ruphachiq runapas p'achanta t'aqsakunqa, cuerpontapas bañakunqa, ichaqa qhelliraqmi kanqa ch'isinkama.

⁹Waka ruphachisqa usphatataq hoqarinqa ch'uya kashaq wak qhari, hinaspa karpa-karpamanta sapaqpi limpio cheqasman churanqa. Chay usphatan Israel runakuna waqaychakunqaku ch'uyanchana unuta wakichinankupaq, chay unuqa huchamanta ch'uyanchanapaqmi.

¹⁰Uspha hoqariq qharipas p'achanta t'aqsakullanqataqmi, ichaqa qhelliraqmi kanqa ch'isinkama. Chaymi wiñaypaq kamachikuy kanqa, qankunapaqpas qankunawan tiyaq wak llaqtayoqkunapaqpas.

¹¹Pipas mayqen runaq ayantapas llamiykunqa chayqa, qanchis p'unchaymi qhelli kanqa.

¹²Chaymi kinsakaq p'unchay, qanchiskaq p'unchaypiwan ch'uyanchana unuwan ch'uyanchakunqa, ahinapin ch'uya kapunqa. Manachus ch'uyanchakunqa kinsakaq p'unchaypas qanchiskaq p'unchaypas chayqa, qhellin kanqa.

¹³Pipas mayqen runaq ayantapas llamiykuspa mana ch'uyanchakunqachu chayqa, Señor Diospa Karpantan qhellichan, chayrayku wañunanpaq huchachasqa kanqa. Ch'uyanchana unuwan mana hich'aykusqa kaspanmi qhelli qhepakunqa.

¹⁴Pipas karpapi wañuqtinmi kay kamachikuyta hunt'ankichis: Karpa ukhupi kashaq llapan runakuna, chay karpaman llapa haykuqkunapas qanchis p'unchaymi qhelli kanqaku.

¹⁵Hinallataq llapan mana allin kirpasqa kashaq mankakunapas qhelli kanqa.

¹⁶Pipas campopi llaminman runaq wañuchisqan ayatapas, wañunanta wañukapuq ayatapas, aya tullutapas, aya p'ampasqatapas chayqa, qanchis p'unchaymi qhelli kanqa.

¹⁷Chhaynapi qhellichakuqkunapaqqa huchamanta ch'uyanchana sacrificio usphata huk chhikata hoqarispa huk rakichaman churanqaku, hinaspan chayllaraq wisimusqa pukyu unuta chayman hich'aykunqaku.

¹⁸Chaymantataq ch'uya kashaq qhariqa muñata hap'ispa ch'uyanchana unuman challpuykunqa, hinaspa chaywan ch'aqchunqa karpata, serviciokunata, chaypi kashaq runakunata ima. Hinallataq ch'aqchunqa aya tulluta llamiykuqtapas, runaq wañuchisqan ayata llamiykuqtapas, wañunanta wañukapuq ayata llamiykuqtapas, aya p'ampasqata llamiykuqtapas.

¹⁹Ch'uya kashaq qharin qhelli kashaq runataqa ch'aqchunqa kinsakaq p'unchaypi qanchiskaq p'unchaypiwan. Hinan qhelli kaq runaqa p'achanta t'aqsakunqa cuerpontapas bañakunqa, ichaqa qhelliraqmi kanqa ch'isinkama.

²⁰Pipas qhelli kashaspa mana ch'uyanchakunqachu chayqa, wañunanpaq huchachasqan kanqa, Señor Diospa Karpanta qhellichasqanrayku. Ch'uyanchana unuwan mana ch'aqchusqa kaspanmi qhelli qhepapunqa.

²¹Chaymi wiñaypaq kamachikuy kanqa. Ch'uyanchana unuwan runamasinta ch'aqchuykuq runaqa p'achantan t'aqsakunqa. Ch'uyanchana unuta llamiq runaqa qhellin kanqa ch'isinkama.

²²Qhelli kashaq runaq tukuy llamisqankunaqa qhellillataqmi kanqa, chayta llamiqpas qhellillataq kanqa ch'isinkama, nispa.