Read DIOSPA QHELQACHISQ Quechua NÚMEROS 21 Bible Online

NÚMEROS 21 - DIOSPA QHELQACHISQ Quechua bible

NÚMEROS 21

¹Neguev hap'iypi Arad llaqta reyqa Canaán runan karqan, paymi uyarirqan “Israel runakunan Atarimman riq ñanninta hamushan” nisqata, hinaspan payqa Israel runakunawan maqanakuq rispa wakin Israel runakunata presota aparqan.

²Chaymi Israel runakunaqa Señor Diosman prometekurqanku: — Señor Diosniyku, qan kay runakunata hap'ichiwankiku chayqa, llapan llaqtankutan thunisaqku, nispa.

³Hinan Señor Diosqa Israel runakunaq mañakusqanta uyarispa Canaán runakunata paykunaman hap'ichirqan, chaymi Israel runakunaqa llapallanta Canaán runakunata wañuchirqanku, llaqtankutapas llapanta thunirqanku. Chaymi chay cheqasta Horma[6] nispa suticharqanku.

⁴Chaymantataq Israel runakunaqa Hor orqomanta puririrqanku Puka Qochaman riq ñanninta Edom suyuta muyurinankupaq. Hinan runakunaqa ñanta purishaspanku phiñakurqanku,

⁵hinaspan Dios contra Moisés contra rimarqanku: — ¿Imapaqmi Egipto suyumanta horqomuwarqankiku kay ch'inneqpi wañunaykupaq? ¡Manan unupas mikhunapas kanchu! ¡Amikuykuñan kay ima kasqan mikhunawan! nispa.

⁶Chaymi Señor Diosqa venenoyoq mach'aqwaykunata rikhurichirqan runakunata picananpaq, hinan askha Israel runakuna mach'aqwaypa picasqan wañurqanku.

⁷Runakunataq Moisesman rispa nirqanku: — ¡Huchallikuykun Señor Dios contra qan contrapiwan rimaspayku! ¡Mañapuwayku Señor Diosmanta kay mach'aqwaykunata ñoqaykumanta ch'usaqyachinanpaq! nispa. Chaymi Moisesqa Señor Diosmanta mañakurqan Israel runakunata pampachananpaq.

⁸Señor Diostaq Moisesta nirqan: — Chay mach'aqwaykunaq rikch'ayninta ruwaspa huk sayaq k'aspiman warkuy, hinan mach'aqwaypa picasqan runaqa k'aspipi warkusqa mach'aqway rikch'ayta qhawarispa qhaliyanqa, nispa.

⁹Chaymi Moisesqa broncemanta huk mach'aqway rikch'ayta ruwaspa huk sayaq k'aspiman warkurqan, hinan pipas mach'aqwaypa picasqan kaqkunaqa bronce mach'aqway rikch'ayta qhawarispa qhaliyarqanku.

¹⁰Chaymantataq Israel runakunaqa puririllarqankutaq, hinaspa Obotpi karpakurqanku.

¹¹Obotmanta puririspataq Moab suyuq inti lloqsimuy lado ch'inneqpi Ije-abarim llaqtapi karpakurqanku.

¹²Chaymanta puririspataq Zered wayq'opi karpakurqanku.

¹³Zeredmanta puririspataq Arnón mayu chimpa ch'inneqpi karpakurqanku, chay ch'inneqqa Amor runakunaq hallp'ankaman mast'arikun. Arnón mayuqa Moab suyuta Amor runakunaq suyuntawanmi t'aqan.

¹⁴Chayraykun Señor Diospa Awqa-tinkuynin nisqa Qelqapiqa nin: … Sufa hap'iypi Waheb llaqta, k'aha-k'ahakuna Arnón mayupas,

¹⁵wayq'okunan uraykun Ar llaqtakama, Moab suyu qorpakaman mast'arikun…, nispa.

¹⁶Arnón mayumantataq puririrqanku Beer nisqa p'uytuman, chaypin Señor Diosqa Moisesta nirqan: — Huñuy llapa runakunata, hinan unuta ñoqa qosqaykichis, nispa.

¹⁷Chaymi Israel runakunaqa takirqanku: — ¡Phullpumuy, unu p'uytu! ¡Takiychis unu p'uytumanta!

¹⁸Umallikunan t'oqorqanku kamachina varankuwan, llaqta apukunan hasp'irqanku tawnankuwan, nispa. Chaymantataq Israel runakunaqa ch'inneqmanta puririrqanku Matanaman,

¹⁹Matanamantataq Nahalielman, Nahalielmantataq Bamotman,

²⁰Bamotmantataq Moab suyupi kashaq wayq'oman. Chay wayq'oqa Pisga orqoman wichanapin kashan, chay orqomantan ch'inneq rikukun. (Dt 2.26-37)

²¹Israel runakunan willaqkunata kacharqanku Amor runakunaq reynin Sehonta nimunankupaq:

²²— Ama hinachu kay, suyuykita pasarichiwayku. Manan chakra-chakrantachu pasasaqku, manataqmi uvas chakrantapaschu, manallataq pukyuykikunamantapas unuta ukyasaqkuchu, aswanpas hatun ñannillantapunin pasasaqku mana mayman kutirispa, nispa.

²³Amor runakunaq reynin Sehontaq ichaqa suyunta Israel runakunaq pasananta mana munaspa llapan soldadonkunata huñurqospa ch'inneqta pasarqan Israel runakunawan maqanakuq, hinan Jahazaman chayaspa chaypi Israel runakunaman phawaykurqan.

²⁴Israel runakunataq ichaqa paykunata sinchita atiparqanku, hinaspan hallp'ankuta hap'ikapurqanku, Arnón mayumanta wichay ladopi Jaboc mayukama, Amón runakunaq suyun qorpakama. Chay qorpaqa allin hark'asqan karqan.

²⁵Ahinapin Israel runakunaqa Amor runakunaq llapan llaqtankuta hap'ikapurqanku, hinallataq Hesbón llaqtata, muyuriqnin llaqtachakunatapas hap'ikapurqanku.

²⁶Hesbón llaqtaqa Amor runakunaq reynin Sehonpa tiyananmi karqan. Rey Sehonmi Moabpa ñawpaq reyninwan maqanakusqa, hinaspan Sehonqa llapan chay hap'iy hallp'anta qechusqa Arnón mayukama.

²⁷Chaymi taki kamariqkuna kay hinata nisqaku: — Hesbón llaqtaman hamuychis, wakmanta sayarichisqa kachun, Sehonpa llaqtan allichasqa kachun.

²⁸Hesbonmantan nina wach'irimurqan, Sehonpa llaqtanmantan nina qallumurqan, Moabpi kashaq Ar llaqtatan ch'usaqyachirqan, Arnón orqo-orqopi tiyaqkunatan ruphaykurqan.

²⁹¡Ay, qanmanta Moab llaqta! ¡Quemos diosta yupaychaqkuna chinkasqan kashankichis! Quemosmi churinkunata wikch'upurqan ayqekunankupaq, ususinkunatataq Amor rey Sehonman hap'ichirqan preso kanankupaq.

³⁰Kunanqa mirayninkunan wañuchisqa, Hesbón llaqtamanta Dibón llaqtakama thunisqa, Medeba qaylla Nofa llaqtakaman paykunaqa ch'usaqyachisqa, nispa.

³¹Chhaynatan Israel runakunaqa Amor runakunaq suyunta hap'ikapurqanku.

³²Hinallataq Moisesqa wakin qharikunata Jazer llaqta qhamiyaqta kacharqan, hinan Israel runakunaqa chay llaqtata muyuriqnin llaqtachakunatawan munaychakuspa chaypi tiyaq Amor runakunata qarqorqan.

³³Chaymantataq Israel runakunaqa Basán suyu ladoman kutirqanku, hinan Basán suyu rey Ogqa llapan ejercitonpiwan paykunawan Edreipi maqanakuq rirqan.

³⁴Señor Diostaq Moisesta nirqan: — Ama paykunata manchakuychu, ñoqan qanman hap'ichisqayki rey Ogta llapa ejercitonta, suyuntawan, chaymi Hesbonpi tiyaq Amor runakunaq reynin Sehonta hina paykunatapas ruwanki, nispa.

³⁵Hinan Israel runakunaqa wañuchirqanku rey Ogta, churinkunata, llapa ejercitontawan, manan hukllapas qheparqanchu. Hinaspan suyunkuta hap'ikapurqanku.