Read DIOSPA QHELQACHISQ Quechua NÚMEROS 22 Bible Online

NÚMEROS 22 - DIOSPA QHELQACHISQ Quechua bible

NÚMEROS 22

¹Israel runakunaqa puririllarqankutaqmi, hinaspan Moab suyu pampapi karpakurqanku, chaymi karqan Jericó llaqta qhawaypi, Jordán mayu inti lloqsimuy ladopi.

²Moab suyu rey Ziporpa churin Balacmi repararqan imaynatachus Israel runakuna Amor runakunata atipasqanta.

³Moab suyu runakunapas Israel runakunaq ancha askha kasqanta rikuspan sinchita mancharikurqanku.

⁴Chaymi paykunaqa Madián runa kurak taytakunata nirqan: — Tukuy chay runakunaqa hallp'anchistachá q'ararqapunqa, imaynan huk toro campopi q'achuta lliwta ch'usaqyachin hinata, nispa. Ziporpa churin Balacmi chay tiempopi Moab suyu rey karqan.

⁵Hinan rey Balacqa Beorpa churin Balaam waqyaqta kacharqan. Balaamqa Amav suyupi Eufrates mayu qaylla Petor llaqtapin tiyarqan. Balacmi kachasqankunawan nichirqan: — Egipto suyumantan huk llaqta hamuspa hinantinman ch'eqeykushan, kunanqa ñoqaykuq qayllaykupiñan kashanku.

⁶Ama hinachu kay, hamullawaypuni, chay runakunata ñakapuway, paykunaqa ñoqaykumanta aswan atiyniyoqmi. Ichapaschá ñoqa atipayman, hinaspa kay suyumanta qarqoyman. Ñoqaqa allintan yachani, ñakasqaykiqa ñakasqa kasqanta, saminchasqaykipas saminchasqa kasqanta, nispa.

⁷Hinan Moab suyu kurak runakunaqa Madián runa kurak taytakunapiwan Balaamman rirqanku, watusqanmanta paganapaq qolqeta aparikuspa, chayaspankutaq Balacpa nisqanta willarqanku.

⁸Hinan Balaamqa nirqan: — Kaypi samakuychis, paqarinña Señor Diospa kamachiwasqanta willasqaykichis, nispa. Hinan Moab runakunaqa Balaamwan qhepakurqanku.

⁹Diostaq Balaamman rikhurirqan, hinaspa tapuykurqan: — ¿Pikunataq qanwan kashan chay qharikunari? nispa.

¹⁰Balaamtaq kutichirqan: — Moab rey Balacmi ñoqaman kachamuwasqa:

¹¹Egipto suyumanta huk llaqta hamuspanmi hinantinman ch'eqeykushan. Ama hinachu kay, hamullawaypuni, chay runakunata ñakapuway. Ichapaschá atipaspa suyuymanta qarqoyman, nispa niwaqta.

¹²Chaymi Diosqa Balaamta nirqan: — Ama chay runakunawan riychu, amataq chay llaqtatapas ñakaychu, ñoqan paykunataqa samincharqani, nispa.

¹³Hinan Balaamqa qhepantin p'unchay tutallamanta hatarispa, Balacpa kachasqan umallikunata nirqan: — Llaqtaykichista kutipuychis, Señor Diosmi qankunawan rinayta mana munanchu, nispa.

¹⁴Moab suyu umallikunataq kutipuspa Balacta nirqanku: — Manan Balaamqa hamuyta munanchu, nispa.

¹⁵Hinan Balacqa wak umallikunata aswan askhata kacharqan, paykunan karqan ñawpaq kachasqanmantaqa aswan mentasqa umallikuna.

¹⁶Paykunataq chayaspa Balaamta nirqanku: — Rey Balacmi nisunki: Ama hinachu kay, valekuykin hamunaykita. Amayá: Manan, niwaychu.

¹⁷Ñoqaqa anchatapunin qhapaqyachisqayki, tukuy ima nisqaykitataq ruwasaqpas. Ama hina kaychu, hamuy, chay runakunata ñakapuway, nispa.

¹⁸Balaamtaq ichaqa paykunaman kutichirqan: — Wasinpi hayk'an kaq qorita qolqetaña llapanta Balac qowanman chaypas, Diosniy Señor Diospa kamachiwasqanta p'akispaqa manapunin imatapas ruwaymanchu.

¹⁹Chaywanpas kaypi puñukuychis, ñoqataq Señor Diosta tapusaq icha imatawanpas niwanman, nispa.

²⁰Chay tutataq Diosqa Balaamman rikhurispa nirqan: — Chay runakuna qanta pusaq hamun chayqa paykunawan riy, ichaqa imatachus ñoqa kamachisqayki chayllatan ruwanki, nispa.

²¹Hinan Balaamqa qhepantin paqar tutallamanta china asnonta caronakuspa, Moab suyu umallikunapiwan rirqan.

²²Diosmi ichaqa Balaampa risqanmanta phiñakurqan, chaymi iskay kamachinkunapiwan rishaqtin Señor Diospa angelnin awqa hina sayaykuspa ñanta hark'arqan mana purinanpaq.

²³Sillakusqan asnoqa Señor Diospa angelnintan espada hap'intinta rikurqan ñanpi sayashaqta, chaymi asnoqa ñanmanta chakra-chakraman pulqarirqan. Balaamtaq waqtalla asnota ñanman kutichirqan.

²⁴Chaymantataq Señor Diospa angelninqa uvas chakra chawpinta pasaq k'illku ñanpi sayaykurqan, chay ñanmi iskay ladonmanta rumiwan perqasqa karqan.

²⁵Hinan asnoqa Señor Diospa angelninta rikuspa huk lado rumi kancha perqaman k'iraykuspa, Balaampa chakinta kanchaman ñit'irqan. Chaymi Balaamqa wakmanta asnota waqtarqan.

²⁶Señor Diospa angelnintaq paykunamanta ñawparispa huk sinchi k'illku ñan cheqaspi sayaykurqan, chay cheqaspiqa manan may ladoman kutirinapas karqanchu.

²⁷Hinan asnoqa angelta rikuspa pampapi puñurparirqan. Balaamtaq sinchi phiñasqa huk k'aspiwan asnota waqtarqan.

²⁸Chay raton Señor Diosqa asnota rimarichirqan, chaymi asnoqa Balaamta nirqan: — ¿Imanaykitaq ñoqari? ¿Chaytaq kinsa kutitaña waqtawanki? nispa.

²⁹Balaamtaq kutichirqan: — Burlakushankin ñoqawan, cuchillollay makiypi kashanman, kunallanmi sipirqoykiman, nispa.

³⁰Asnotaq nirqan: — Ñoqan silla asnoyki kani, uywawasqaykimantapachan kunankama sillakuwanki, manataqmi hayk'aqpas khaynata ruwarqaykichu, qanmi allinta yachanki, nispa. Balaamtaq kutichirqan: — Arí, hinapunin, nispa.

³¹Hinan Señor Diosqa Balaamman angelninta rikuchirqan, chay angelmi espada hap'iykusqa ñanpi sayashasqa. Chaymi Balaamqa angelta rikuspa pampakama k'umuykukurqan.

³²Angeltaq Balaamta tapurqan: — ¿Imanaqtinmi kinsa kutitaña asnoykita waqtanki? Ñoqan purinaykita hark'arqayki, purisqayki mana chaninchu ñoqapaq kasqanrayku.

³³Rikuwaspanmi asnoqa kinsa kutita ñoqamanta laq'ochiwan, manachus laq'ochiwanman chayqa ñan wañurqachiykimanña karqan, asnotataq mana wañuchiymanchu karqan, nispa.

³⁴Hinan Balaamqa angelta nirqan: — Huchallikunin, manan yacharqanichu qan hark'ashawasqaykita. Maytachus rishasqay mana allin kaqtinqa, kutikapusaq, nispa.

³⁵Angeltaq kutichirqan: — Rillay chay qharikunawan, ichaqa imatachus ñoqa kamachisqayki chayllatan ruwanki, nispa. Chaymi Balaamqa Balacpa kachamusqan umallikunapiwan rirqan.

³⁶Balaampa hamushasqanta yacharqospataq Balacqa chaskiq rirqan Moab suyu qorpa Arnón mayu qayllapi kashaq Ar llaqtata.

³⁷Hinaspa Balaamta nirqan: — Maytapunin waqyachimurqayki, ¿imanaqtintaq mana hamuyta munarqankichu? ¿Mana imatapas qanman paganaytachu yuyarqanki? nispa.

³⁸Balaamtaq Balacman kutichirqan: — Hamuniñan, qayllaykipin kashani. Ichaqa manan imatapas ñoqallamantaqa rimaymanchu, aswanpas imatachus Dios kamachiwanqa chayllatapunin rimasaq, nispa.

³⁹Chaymantataq Balaamqa Balacpiwan Quiriat-huzot llaqtata rirqanku,

⁴⁰chaypin Balacqa wakata ovejatawan nak'achirqan, hinaspa wakin aychata Balaamman paywan kashaq umallikunamanwan qorqan.

⁴¹Qhepantin paqartaq Balacqa Balaamta pusaspa Bamot-Baal orqoman wichachirqan, chaymanta qhawarispan rikurqanku karpakuspa tiyashaq wakin Israel runakunata.