Read DIOSPA QHELQACHISQ Quechua NÚMEROS 27 Bible Online

NÚMEROS 27 - DIOSPA QHELQACHISQ Quechua bible

NÚMEROS 27

¹Josepa churinmi karqan Manasés, Manasespa churintaq Maquir, Maquirpa churintaq Galaad, Galaadpa churintaq Hefer, Heferpa churintaq Zelofehad. Zelofehadpa ususinmi phisqa karqan: Maala, Noa, Hogla, Milca, Tirsapiwan.

²Chay Manasés ayllu phisqa ñaña warmikunan Dioswan Tupana Karpa punkuta rirqanku, Moisesta, sacerdote Eleazarta, umallikunata huñunasqa Israel runakunatawan rimapayanankupaq, hinaspan nirqanku:

³— Taytaykun ch'inneqpi wañukapurqan, ichaqa manan payqa Señor Dios contra huñukuq Corepa t'aqanpichu karqan. Pay kikinpa huchanmantan wañupurqan, manataqmi qhari wawata churiyarqanchu.

⁴Chaywanpas manan chaninchu taytaykuq sutin ayllu miray qelqamanta pichasqa kanan, mana churiyoq kasqanraykullaqa. Chhaynaqa, taytaykuq wawqenkunaman tupaq hallp'amanta ñoqaykuman hallp'ata qowayku, nispa.

⁵Hinan Moisesqa chay warmikunaq mañakusqanta Señor Diosman willarqan.

⁶Chaymi Señor Diosqa Moisesta nirqan:

⁷— Zelofehadpa ususinkunaqa chanintan mañakunku. Chhaynaqa, taytankuq wawqenkunaman tupaq hallp'amanta hallp'ata qoy, taytankuman tupaq hallp'ata paykunaman qopuy.

⁸Hinallataq Israel runakunatapas kamachiy: Mayqen runapas mana churiyoq wañupunman chayqa, ususinmanmi hallp'anta saqepunqa.

⁹Manataq ususinpas kanmanchu chayqa, wawqenkunamanmi hallp'anta saqepunqa.

¹⁰Wawqenkunapas manataq kanmanchu chayqa, taytanpa wawqenkunamanmi hallp'anta saqepunqa.

¹¹Taytanpa wawqenkunapas manallataq kanmanchu chayqa, aswan qaylla ayllunmanmi hallp'anta saqepunqa. Chaymi Israel runakunapaq kamachikuy kanqa, Señor Diospa kamachiwasqanman hina, nispa.

¹²Señor Diosmi Moisesta nirqan: — Kay Abarim orqo-orqoman wichay, hinaspa Israel runakunaman qonay hallp'ata qhawarinki.

¹³Chay hallp'ata rikusqayki qhepataqa wañukapunkin, Aarón wawqeyki hina.

¹⁴Zin ch'inneqpi Meriba qayllapi runakuna ñoqa contra chhuchupakushaqtinmi, qankuna iskayniykichis kamachisqayta mana kasuwarqankichischu, manallataq runakunaq qayllanpipas hatunchawarqankichischu, nispa. Meribaqa Zin ch'inneq Cadespi unu pukyun.

¹⁵Hinan Moisesqa Señor Diosta nirqan:

¹⁶— Señor Diosníy, qanmi llapa runaman kawsay qoqqa kanki, llaqtaykita umallinanpaq huk umallita akllay,

¹⁷maymanña llaqtayki riqtinpas paymi pusanqa, awqa-tinkuytapas paymi umallinqa, ama llaqtayki mana michiqniyoq oveja hina purinanpaq, nispa.

¹⁸Chaymi Señor Diosqa Moisesman kutichirqan: — Nunpa churin Josuemi chaypaq hina allin qhari, payta akllaspa uman pataman makiykita churaykuy.

¹⁹Chaymantataq sacerdote Eleazarman llapa runakunamanwan pusanki, hinaspa paykunaq ñawpaqenpi umallinkupaq churanki.

²⁰Josuetaqa rantiykipi wakin atiyniykiwan kamachinanpaqmi churanki, ahinapin llapa Israel llaqta payta kasunqaku.

²¹Josueqa umalliña kaspanmi sacerdote Eleazarwan sapa kuti tapuchiwanqa, Eleazartaq Josuepa sutinpi munayniy tapuna Urimwan ñoqata tapuwanqa. Ahinapin Josueqa Israel runakunata tukuy ima ruwanankupaqpas kamachinqa, nispa.

²²Hinan Moisesqa Señor Diospa kamachisqanman hina lliwta ruwaspa, sacerdote Eleazarman llapan Israel runakunamanwan Josueta pusarqan,

²³hinaspa paypa uman pataman makinta churaykuspa, rantinpi kamachikunanpaq churarqan, Señor Diospa kamachisqanman hina.