Read DIOSPA QHELQACHISQ Quechua NÚMEROS 3 Bible Online

NÚMEROS 3 - DIOSPA QHELQACHISQ Quechua bible

NÚMEROS 3

¹Sinaí orqopi Moisesta Señor Diospa rimaykusqan tiempopin, Moisespa Aaronpa mirayninkuna kaykuna karqan:

²— Aaronpa phiwinmi karqan Nadab, qatiqninkunataq Abiú, Eleazar, Itamarpiwan.

³Paykunatan sacerdote kanankupaq aceitewan hawispa churarqanku.

⁴Nadabwan Abiuwanqa Señor Diospa ñawpaqenpin wañupurqanku, Sinaí ch'inneqpi Señor Diosman mana haywana ninata haywasqankurayku. Paykunaqqa manan churinku karqanchu, chaymi Eleazarpiwan Itamarpiwan taytanku Aarón kawsashaqtin sacerdote karqanku.

⁵Señor Diosmi Moisesta nirqan:

⁶— Leví ayllu runakunata huñuy, hinaspa sacerdote Aaronpa kamachinpi llank'anankupaq churay.

⁷Ñoqawan Tupana Karpapin llank'anqaku Aaronpa kamachisqan, llapan llaqtaq rantinpi lliwta ruwaspanku,

⁸karpapi llapan serviciokunata waqaychanqaku, Israel runakunaq rantinpi servinqaku.

⁹Leví runakunataqa Israel runakuna ukhumanta t'aqaspaykin Aaronta churinkunatawan servinankupaq qopunki.

¹⁰Sacerdote-kay llank'aymanqa Aaronta churinkunatawanmi churanki. Pipas sacerdote hina llank'anman mana sacerdote kashaspa chayqa, wañuchisqan kanqa, nispa.

¹¹Señor Diosmi Moisesta nirqan:

¹²— Israel runakuna ukhumantan Leví runakunata akllakurqani sapanka familiaq phiwi churinpa rantinpi, chaymi Leví runakunaqa ñoqaq kapunku,

¹³llapa phiwi churi ñoqaman tupawasqanrayku. Egipto suyu runakunaq llapan phiwi churinta wañuchishaspaymi, Israel runakunaq llapan phiwi churinta, uywankuq ñawpaq wachay uñantapas ñoqapaq t'aqakurqani. Chayraykun ñoqaman tupawan. Ñoqaqa Señor Diosmi kani, nispa.

¹⁴Sinaí ch'inneqpin Señor Diosqa Moisesta nirqan:

¹⁵— Leví ayllu runakunata ayllunkuman hina familiankuman hina yupay, llapan qharikunata huk killayoqmanta wichayman, nispa.

¹⁶Hinan Moisesqa paykunata yuparqan Señor Diospa kamachisqanman hina.

¹⁷Kaykunan karqan Levipa churinkuna: Gersón, Cohat, Meraripiwan.

¹⁸Gersonpa miraynin ayllukunan karqan Libnipiwan Simeipiwan.

¹⁹Cohatpa miraynin ayllukunan karqan Amram, Izhar, Hebrón, Uzielpiwan.

²⁰Merariq miraynin ayllukunan karqan Mahlipiwan Musipiwan. Chay ayllukunamantan Leví runakunaq llapan familiankuna paqarirqan.

²¹Gersonpa mirayninkunan karqan Libni ayllupas Semei ayllupas.

²²Chay ayllukunapi llapan qharikunan huk killayoqmanta wichayman qanchis waranqa phisqa pachak karqan.

²³Paykunan Dioswan Tupana Karpaq qhepanpi inti haykuy ladopi karpakurqanku.

²⁴Umallinkutaq karqan Laelpa churin Elisafat.

²⁵Paykunan Dioswan Tupana Karpapi cuidarqanku karpata, karpaq qara qatanta, karpa punku cortinata,

²⁶karpa kancha punku cortinata, kancha muyuriq cortinakunata, hap'ichina waskhakunata, tukuy kaqninkunatawan.

²⁷Cohatpa mirayninkunan karqan Amram ayllu, Izhar ayllu, Hebrón ayllu, Uziel ayllupiwan.

²⁸Chay ayllukunapi llapan qharikunan huk killayoqmanta wichayman pusaq waranqa kinsa pachak karqan. Paykunan karpa ukhupi kaqkunata cuidarqanku.

²⁹Karpakurqankutaq Dioswan Tupana Karpaq uray ladonpi,

³⁰umallinkutaq Uzielpa churin Elizafán karqan.

³¹Kaykunatan cuidarqanku: rimanakuy arcata, mesata, candelerota, altarkunata, yupaychaypaq t'aqasqa serviciokunata, t'aqaq cortinata, hayk'an chaypi kaq serviciokunatawan.

³²Leví ayllu umallikunaq qollanantaq karqan sacerdote Aaronpa churin Eleazar, paymi Dioswan Tupana Karpa cuidaqkunata kamachirqan.

³³Merariq mirayninkunan karqan Mahli ayllu, Musi ayllupiwan.

³⁴Chay ayllukunapi llapan qharikunan huk killayoqmanta wichayman soqta waranqa iskay pachak karqan.

³⁵Umallinkutaq Abihailpa churin Zuriel karqan, Dioswan Tupana Karpaq wichay ladonpitaq karpakurqanku.

³⁶Paykunan cuidarqanku karpa marcokunata, suskhuq k'aspikunata, sayaq k'aspikunata, k'aspipaq sayanakunata, hayk'an chaypi kaq serviciokunata,

³⁷karpa kancha muyuriqpi sayaq k'aspikunata, k'aspipaq sayanakunata, takarpukunata, waskhakunatawan.

³⁸Inti lloqsimuy ladopi Dioswan Tupana Karpaq ñawpaqenpin Moisespiwan Aaronpiwan, Aaronpa churinkunapiwan karpakurqanku, paykunan Karpata cuidarqanku wakin Israel runakunaq rantinpi. Pipas mana sacerdote kashaspa sacerdote hina ruwaqqa wañuchisqan kanqa.

³⁹Moisespiwan Aaronpiwanmi Leví ayllu runakunata yuparqanku, ayllunkuman hina familiankuman hina, Señor Diospa kamachisqanman hina. Chaymi llapa qharikuna huk killayoqmanta wichayman iskay chunka iskayniyoq waranqa karqan.

⁴⁰Señor Diosmi Moisesta nirqan: — Israel runakunaq llapan phiwi churinkunata huk killayoqmanta wichayman yupay, hinaspa qelqay sutinkuta.

⁴¹Chaymantataq Israel runakunaq phiwi churinpa rantinpi Leví runakunata t'aqapuway. Ñoqaqa Señor Diosmi kani. Chhaynallataq Israel runakunapaq uywanpa ñawpaq wachay uñankunaq rantinpipas Leví runakunaq uywanta t'aqapuway, nispa.

⁴²Hinan Moisesqa Israel runakunaq llapa phiwi churinkunata yuparqan, Señor Diospa kamachisqanman hina.

⁴³Chaymi llapan phiwi churikunata huk killayoqmanta wichayman yupaspa sutinkuta qelqarqan, iskay chunka iskayniyoq waranqa iskay pachak qanchis chunka kinsayoq qharikunataq karqanku.

⁴⁴Hinan Señor Diosqa Moisesta nirqan:

⁴⁵— Israel runakunaq phiwi churinkunaq rantinpi Leví runakunata t'aqapuway, hinallataq Israel runakunaq uywanpa rantinpi Leví runakunaq uywanta t'aqapuway, Leví runakunaqa ñoqaqmi. Ñoqaqa Señor Diosmi kani.

⁴⁶Ichaqa Leví runakunamantaqa Israel runakunaq phiwi churinkunaqa aswan askhan kanku, chayrayku iskay pachak qanchis chunka kinsayoq qharikunata horqokapunapaq

⁴⁷sapanka runamanta phisqa qolqeta cobray, Ñoqawan Tupana Karpapi chanin pesana qolqeman hina, chaymi chunka gramo qolqe.

⁴⁸Hinaspa chay yapasqa phiwi churikunamanta cobrasqayki qolqeta Aaronman churinkunamanwan qonki, horqokapuy precio kananpaq, nispa.

⁴⁹Chaymi Moisesqa huñurqan Israel runakunaq iskay pachak qanchis chunka kinsayoqmanta yaparisqa qolqeta phiwi churinkuta horqokapunankupaq.

⁵⁰Chaskirqantaq waranqa kinsa pachak soqta chunka phisqayoq qolqeta, Dioswan Tupana Karpapi chanin pesana qolqeman hina.

⁵¹Chaymantataq chay qolqeta Aaronman churinkunamanwan qorqan, Señor Diospa kamachisqanman hina.