Read DIOSPA QHELQACHISQ Quechua NÚMEROS 30 Bible Online

NÚMEROS 30 - DIOSPA QHELQACHISQ Quechua bible

NÚMEROS 30

¹Israel ayllu umallikunatan Moisesqa nirqan: — Señor Diosmi kamachikun:

²Mayqen qharipas imata qowananpaqpas prometekun, otaq imamanta waqaychakunanpaqpas juran chayqa, rimarisqantaqa hunt'anqapunin.

³Taytanpa wasinpiraq tiyaq sipas imata qowananpaqpas prometekun, otaq imamanta waqaychakunanpaqpas juran,

⁴chaykunata yachaspataq taytan mana hark'anchu chayqa, prometekusqantaqa hunt'anqapunin.

⁵Taytan mana munaqtinmi ichaqa hunt'ananpaq mana kamachisqañachu kanqa. Taytan hark'ashaqtinqa, manan: Hunt'allaypuni, nisaqchu.

⁶Huk soltera warmi yuyaykukuspapas hawan-ukhunta rimaspapas imata qowananpaqpas prometekun, otaq imamanta waqaychakunanpaqpas juran, chaymantataq casarakapunqa,

⁷chayta yachaspataq qosan mana hark'anchu chayqa, prometekusqantaqa hunt'anqapunin.

⁸Qosan mana munaqtinmi ichaqa hunt'ananpaq mana kamachisqañachu kanqa. Manan ñoqaqa: Hunt'allaypuni, nisaqchu.

⁹Huk viuda warmipas t'aqanakuq warmipas imata qowananpaqpas prometekun chayqa, tukuy prometekusqantaqa hunt'anqapunin.

¹⁰Huk casarasqa warmi imata qowananpaqpas prometekun otaq imamanta waqaychakunanpaqpas juran,

¹¹chayta yachaspataq qosan mana hark'anchu chayqa, prometekusqantaqa hunt'anqapunin.

¹²Qosan mana munaqtinmi ichaqa hunt'ananpaq mana kamachisqañachu kanqa. Qosan hark'akushaqtinqa, manan: Hunt'allaypuni, nisaqchu.

¹³Qosaqa warminpa prometekusqanta jurasqantapas atinmi hark'ayta otaq: Allinmi, niytapas.

¹⁴Manataq qosan ima ninqapaschu p'unchay-p'unchay pasashaqtin chayqa, ch'inlla kasqanwanmi warminpa prometekusqantapas jurasqantapas: Allinmi, nin.

¹⁵Qosanchus yachasqan qhepa unaymantaña: Manan allinchu, nispa hark'anqa chayqa, paymi warminpa mana hunt'asqanmanta huchachasqa kanqa, nispa.

¹⁶Chay hinatan Señor Diosqa Moisesta kamachirqan casarasqa warmiq prometekusqanmanta, taytanpa wasinpiraq tiyaq sipaspa prometekusqanmantawan.