Read DIOSPA QHELQACHISQ Quechua NÚMEROS 32 Bible Online

NÚMEROS 32 - DIOSPA QHELQACHISQ Quechua bible

NÚMEROS 32

¹Rubén aylluwan Gad aylluwanmi ancha askha uywayoq karqanku, chaymi Jazer llaqta hallp'ata Galaad hap'iyta qhawarispa repararqanku uywa michinapaq kusa kasqanta.

²Hinaspan rirqanku Moisesman, sacerdote Eleazarman, wakin ayllu umallikunamanwan, nirqankutaq:

³— Qhawariychis, kaypin kashan Atarot, Dibón, Jazer, Nimra, Hesbón, Eleale, Seba, Nebo, Beón llaqtakuna.

⁴Señor Diosmi kay hap'iypi tiyaqkunata atipaspa tiyachiwarqanchis. Chay hallp'akunan uywapaq kusa pastoyoq, ñoqayku kamachiykikunaqtaq uywayku askha.

⁵Sumaqta qhawariwankiku chayqa, kay hap'iy hallp'akunata qowayku, hinaspa amaña Jordán mayuta chimpachiwaykuchu, nispa.

⁶Hinan Moisesqa kutichirqan: — Chhaynaqa, ¿kaypichu qankuna qhepakuyta munankichis, llaqtamasi wawqeykichiskuna maqanakuyman rishaqtinku?

⁷¿Imanaqtintaq Israel runakunata pisi kallpayachiyta munankichis, Señor Diospa qosqan suyuman mana haykunankupaq?

⁸Chay kikillantan taytaykichispas ruwarqan, Cades-barneamanta suyu qhamiyaqta kacharqani chaypacha.

⁹Escol wayq'okama rispankun chay suyuta qhamiyarqanku, chaymantataq Israel runakunata pisi kallpayachirqan Señor Diospa qosqan hallp'aman haykunanku kashaqtin.

¹⁰Chaymi Señor Diosqa chay p'unchay phiñarikuspa jurarqan:

¹¹— Egipto suyumanta lloqsimuq runakunaqa llapanmi iskay chunka watayoqmanta wichayman mana haykunqakuchu Abrahamman, Isaacman, Jacobmanwan qonaypaq prometesqay suyuman, mana tukuy sonqochu kasuwasqankurayku.

¹²Aswanpas Cenezpa miraynin Jefoneq churin Calebwan Nunpa churin Josuellawanmi haykunqaku tukuy sonqo kasuwasqankurayku, nispa.

¹³Señor Diosqa Israel runakuna contra k'arakta phiñakuspanmi tawa chunka wata ch'inneqpi tumaqayachirqan, pay contra mana chanin ruwaq runakuna llapallan wañupunankukama.

¹⁴Chhaynaqa, taytaykichis hinallataqmi millay huchasapa runakuna kankichis. ¡Señor Diospa k'arak phiñakuyninta Israel contra wakmanta q'oñirichinkichis!

¹⁵Señor Diosmanta t'aqarikunkichis chayqa, aswan unaymi payqa Israel runakunata ch'inneqpi qhepachinqa, qankunataq kay llaqta wañuchisqa kaqtin huchachasqa kankichis, nispa.

¹⁶Paykunataq ichaqa Moisesman qayllaykuspa nirqanku: — Ñoqaykuqa uywaykupaq kanchakunata wawaykupaqpas warmiykupaqpas llaqtakunata sayarichiyllatan munashayku.

¹⁷Chaymantaqa ñoqayku kikiykun usqhaylla awqa-tinkuypaq wakichikusaqku, hinaspa wakin Israel runakunaq ñawpaqenta risaqku chay suyuta hap'ikapunankukama. Chaykamataq familiaykuqa allin hark'achisqa llaqtakunapi qhepashanqaku, kay hap'iypi tiyaqkunaq phawaykunanmanta waqaychasqa.

¹⁸Ñoqaykuqa wakin Israel runakuna chay suyu hallp'ata sapanka hap'ikapuqtinkuñan kutimpusaqku.

¹⁹Hinallataq Jordán mayu inti lloqsimuy kay ladopi hallp'ayku kaqtinqa, Jordán mayu inti haykuy ladopi manaña paykunawan hallp'ata chaskisaqkuchu, nispa.

²⁰Hinan Moisesqa paykunaman kutichirqan: — Chhaynaqa, allinmi, rimarisqaykichista hunt'aychis, Señor Diospa ñawpaqenpi wakichikuychis awqa-tinkuypaq.

²¹Hinaspa llapaykichis Señor Diospa kamachisqan Jordán mayuta chimpaspaykichis chaypi qhepakuychis llapan awqakunata Señor Dios qarqonankama.

²²Llapa suyuntinta hap'ikapuqtinkuñan kutimpunkichis, ahinapin Señor Diospaq ruwanaykichistapas Israel llaqtapaq ruwanaykichistapas hunt'apunkichis. Chaymi Señor Diosqa kay hallp'ata hallp'aykichista hina qhawarinqa.

²³Manachus nisqaykichista hina ruwankichis chayqa, cheqaqtapunin Señor Dios contra huchallikunkichis, chay huchaykichismantaqa muchuchisqapunin kankichis.

²⁴Chhaynaqa, sayarichiychisyá familiaykichispaq llaqtakunata uywaykichispaqpas kanchakunata ruwamuychis, rimarisqaykichistan ichaqa hunt'ankichispuni, nispa.

²⁵Hinan Gad ayllu runakuna Rubén ayllu runakunapiwan kutichirqanku: — Ñoqayku kamachiykikunaqa kamachiwasqaykikutan ruwasaqku.

²⁶Kay Galaad hap'iy llaqtakunapin warmiyku, wawayku, hayk'an kaq uywaykupiwan qhepakunqaku.

²⁷Ñoqaykutaq maqanakuypaq wakichikusaqku, hinaspa Señor Diospa kamachisqan awqa-tinkuyman risaqku kamachiwasqaykikuman hina, nispa.

²⁸Chaymantataq Moisesqa sacerdote Eleazarta, Josueta, Israel ayllu umallikunatawan kamachirqan:

²⁹— Gad ayllu Rubén ayllu qharikuna awqa-tinkuypaq wakichisqa Señor Diospa kamachisqanman hina qankunapiwan Jordán mayuta chimpaqtinkun chay suyuta hap'ikapuspaykichisña paykunaman qonkichis Galaad suyuta hallp'anku kananpaq.

³⁰Ichaqa awqa-tinkuypi mana yanapakuyta munaspa Jordanta mana chimpanqakuchu chayqa, Canaán suyupi qankunawan kuskan hallp'ata chaskinqaku, nispa.

³¹Gad ayllu Rubén ayllu runakunataq kutichirqanku: — Ñoqayku kamachiykikunaqa ruwasaqkupunin Señor Diospa kamachiwasqankuta.

³²Ñoqaykuqa awqa-tinkuypaq wakichisqan Canaán suyuta risaqku Señor Diosta kasukuspayku, ichaqa Jordanpa kay ladonpin hap'ikapunayku hallp'aqa kanqa, nispa.

³³Ahinatan Moisesqa qorqan Gad aylluman, Rubén aylluman, Manasés kuskan ayllumanwan Amor runakunaq reynin Sehonpa suyunta, rey Ogpa Basán suyuntawan llapa llaqtankunantinta camponkunantinta.

³⁴Gad ayllu runakunan wakmanta sayarichirqanku Dibonta, Atarot-ta, Aroerta,

³⁵Atarot-sofanta, Jazerta, Jogbehata,

³⁶Bet-nimrata, Bet-arantawan, hinaspa chay llaqtakunata allinta perqarqanku, hinallataq uywa kanchakunatapas sayarichirqanku.

³⁷Rubén ayllu runakunataq wakmanta sayarichirqanku Hesbonta, Elealeta, Quiriataimta,

³⁸Sibmata, Nebota, Baal-meontawan. Nebota Baal-meontawanqa wak sutiwanmi churarqanku, hinallataq wakin llaqtakunatapas.

³⁹Manasespa churin Maquirpa miraynin runakunan Galaad hap'iyta rirqanku, munaychakuspataq chaypi tiyaq Amor runakunata lliwta qarqorqanku.

⁴⁰Hinan Moisesqa Maquirpa miraynin runakunaman Galaad hap'iyta qopurqan, paykunataq chaypi tiyapurqanku.

⁴¹Manasespa miraynin Jairtaq kap'ikapurqan Amor runakunaq llaqtachankunata, hinaspa suticharqan: Jairpa llaqtachankuna, nispa.

⁴²Nobataq hap'ikapurqan Kenat llaqtata llapan llaqtachakunatawan, hinaspa paypa sutinwan suticharqan: Noba, nispa.