Read DIOSPA QHELQACHISQ Quechua NÚMEROS 34 Bible Online

NÚMEROS 34 - DIOSPA QHELQACHISQ Quechua bible

NÚMEROS 34

¹Señor Diosmi Moisesta nirqan:

²— Israel runakunata kamachiy, Canaán suyuman haykuqtiykichisqa qankunaq hallp'aykichispunin chay suyuqa kapunqa. Kaykunataqmi qorpankuna kanqa:

³Uray lado qorpanmi kanqa Edom suyu qaylla Zin ch'inneq. Chay qorpaqa qallarinqa Kachi Qochaq ura cantonmanta,

⁴hinaspa Nina Q'ara nisqa Q'asanta wichanqa, chaymanta Zin ch'inneqninta Cades-barneakama aysakunqa. Chaymantataq aysakunqa Hasar-adarninta Asmonkama.

⁵Asmonmantataq kutirinqa Egipto qorpa mayukama, chaymantataq lamar-qocha patakama aysakunqa.

⁶Inti haykuy lado qorpanqa lamar-qocha patantakaman aysakunqa.

⁷Wichay lado qorpanmi lamar-qocha patamanta Hor orqokama cheqanta aysakunqa,

⁸Hor orqomantataq Hamat Q'asakama, chaymantataq Zedadkama,

⁹Zedadmantataq Zifronkama, Zifronmantataq Hazar-enankama.

¹⁰Inti lloqsimuy lado qorpantaq Hazar-enanmanta Sefankama cheqanta aysakunqa,

¹¹Sefanmantataq Ainpa inti lloqsimuy ladon Harbelkama, chaymantataq Cineret qocha inti lloqsimuy lado qhatanta aysakunqa,

¹²hinaspa Jordán mayunta uraykapunqa Kachi Qochakama. Chay hinan kanqa suyuykichispa qorpankuna, nispa.

¹³Moisesmi Israel runakunata kamachirqan: — Chay suyutan qankuna sorteopi t'aqanakunkichis, Señor Diosmi kamachikurqan chay suyuta isqon ayllu kuskanniyoqman rakinapaq.

¹⁴Rubén ayllu, Gad ayllu, Manasés kuskan ayllupiwanqa ñan chaskirqankuña tupaqninku hallp'ata ayllunkuman hina.

¹⁵Iskay ayllu kuskanninqa Jericó qhaway Jordán mayu inti lloqsimuy ladopin ayllunkuman hina chaskirqanku tupaqninkuta, nispa.

¹⁶Señor Diosmi Moisesta nirqan:

¹⁷— Hallp'ata t'aqaspa ayllukunaman rakiqmi kanqa sacerdote Eleazarwan Nunpa churin Josuewan.

¹⁸Churallaychistaq sapanka ayllumanta huk umallita paykunata yanapananpaq.

¹⁹Chay umallikunan kaykuna: Judá ayllumanta Jefoneq churin Caleb,

²⁰Simeón ayllumanta Amiudpa churin Semuel,

²¹Benjamín ayllumanta Quislonpa churin Elidad,

²²Dan ayllumanta Jogliq churin umalli Buqui,

²³Josepa churin Manasés ayllumanta Efodpa churin umalli Haniel,

²⁴Josepa churin Efraín ayllumanta Siftanpa churin umalli Kemuel,

²⁵Zabulón ayllumanta Parnacpa churin umalli Elizafán,

²⁶Isacar ayllumanta Azanpa churin umalli Paltiel,

²⁷Aser ayllumanta Selomiq churin umalli Ahiud,

²⁸Neftalí ayllumantataq Amiudpa churin umalli Pedael, nispa.

²⁹Chay qharikunatan Señor Diosqa kamachirqan Canaán suyuta t'aqaspa Israel runakunaman rakinankupaq.