Read DIOSPA QHELQACHISQ Quechua NÚMEROS 6 Bible Online

NÚMEROS 6 - DIOSPA QHELQACHISQ Quechua bible

NÚMEROS 6

¹Señor Diosmi Moisesta nirqan:

²— Israel runakunata niy: Huk qharipas warmipas Nazareo[1] runa kananpaq prometekuspa Señor Diosman sapaqchakunqa chayqa,

³manan ukyanqachu vinotapas, ima machachikuq ukyanatapas, uvasmanta ch'irwasqa ima ukyanatapas. Manallataq mikhunqachu hoq'o uvastapas ch'aki uvastapas.

⁴Señor Diospaq t'aqasqa kashasqan tiempopiqa manan uvas yuramanta chhikallantapas mikhunqachu, manallataq muhuntapas ch'illpintapas mikhunqachu.

⁵Chukchantapas manan rutuchikunqachu, aswanpas hinallatan wiñachikunqa. Nazareo runa kashasqan tiempopiqa ch'uyan kanqa.

⁶Señor Diospaq t'aqasqa kashasqan tiempopiqa manan ayamanpas qayllaykunqachu.

⁷Manapunin taytanña mamanña wawqenña pananña wañuqtinpas qayllaykunqachu, ama qhellichasqa kananpaq. Señor Diospaq t'aqasqa kaynintaqa chukchanmi sut'inchan.

⁸Prometekusqan tiempopiqa Señor Diospaqmi ch'uya kanqa.

⁹Paypa qayllanpi pipas qonqay wañuqtin Señor Diospaq t'aqasqa-kayninta rikuchiq chukchanta qhellichanqa chayqa, qanchis p'unchay qhepatan chukchanta rutuchikapunqa, hinaspan ch'uya kapunqa.

¹⁰Pusaqkaq p'unchaypitaq Dioswan Tupana Karpa punkupi kaq sacerdoteman apanqa iskay kullkuta, mana chayqa iskay malqo urpitapas.

¹¹Hinan sacerdoteqa haywanqa hukkaqta hucha pampachay sacrificiota, hukkaqtataq ruphachina sacrificiota, ahinapi ayata llamiykuspa qhellichakusqanmanta ch'uya kapunanpaq. Chay kikin p'unchaymi wakmanta chukchanta Señor Diospaq t'aqanqa,

¹²hinaspa Señor Diospaq t'aqasqa prometekusqan tiempota wakmanta qallarinqa, ñawpaq ruwasqanqa manan valepunchu qhellichakapusqan hawa. Chaymantataq Señor Diosman haywachinqa watayoq borregota kutichipuy sacrificiopaq.

¹³Kaymi Nazareo runapaq kamachikuy: Señor Diosman t'aqakusqan tiempo hunt'akuqtinmi chay runaqa Dioswan Tupana Karpa punkuman rinqa,

¹⁴hinaspa Señor Diosman haywachinqa watayoq mana imanasqa borregota ruphachina sacrificiota, watayoq mana imanasqa ovejata hucha pampachay sacrificiota, mana imanasqa anejotataq sumaq kawsay sacrificiota.

¹⁵Sapanka sacrificiota haywachinqa ruru ofrendantinta, hich'aykunapaq vino ofrendantinta. Hinallataq chaywan kuskata huk canastapi mana qonchuyoq t'antata aceitewan llusisqa llaphllay-llaphlla t'antata sacerdoteman apanqa. Chay t'antaqa ñut'u hak'umanta aceitewan chapuspa ruwasqan kanqa.

¹⁶Hinan sacerdoteqa Señor Diosman haywanqa hucha pampachay sacrificiota, ruphachina sacrificiota,

¹⁷Sumaq kawsay sacrificiota, ruru ofrendantinta, hich'aykunapaq vino ofrendantinta. Haywallanqataq canastapi kaq mana qonchuyoq t'antatapas.

¹⁸Señor Diospaq t'aqasqa runaqa Dioswan Tupana Karpa punkupin chukchanta rutuchikunqa, hinaspa chay t'aqasqa chukchan rutuchikusqanta sumaq kawsay sacrificiota ruphashaq ninaman wikch'uykunqa.

¹⁹Chaymantataq sacerdoteqa chayasqaña kaqtin anejoq qharminta hap'inqa canastapi mana qonchuyoq huk t'antatawan, mana qonchuyoq huk llaphllay-llaphlla t'antatawan, hinaspa Señor Diospaq t'aqasqa runaman llapanta qonqa chukchanta rutuchikusqan qhepataña.

²⁰Sacerdotetaq llapan chaykunata Señor Diospa ñawpaqenpi maywispa haywanqa, ofrenda kasqanrayku. Chaykunaqa ancha ch'uyan, sacerdotemanmi tupan imaynan maywisqa ofrendamanta pechonpas chakanpas tupan hinata. Chay qhepataqa Señor Diospaq t'aqasqa runaqa vinota ukyanmanmi.

²¹Chaymi kamachikuy kanqa Señor Diospaq t'aqasqa kananpaq prometekuq runapaq. Haywanan kaq ofrendakunamantapas wak ofrendakunata haywananpaq prometekunman chayqa, allinmi. Ichaqa lliw prometekusqantaqa hunt'anqapunin, nispa.

²²Señor Diosmi Moisesta nirqan:

²³— Aaronta churinkunatawan kamachiy Israel runakunata khaynata saminchanankupaq:

²⁴Señor Diosmi saminchasunkipas waqaychasunkipas,

²⁵Señor Diosmi sumaqta qhawarisunkipas khuyapayasunkipas,

²⁶Señor Diosmi munakusunkipas, thak-kaypipas kawsachisunki, nispa.

²⁷Sacerdotekunan Israel runakunata sutiywan saminchanqaku, ñoqataq paykunata saminchasaq, nispa.