Read DIOSPA QHELQACHISQ Quechua MIQUEAS 1 Bible Online

MIQUEAS 1 - DIOSPA QHELQACHISQ Quechua bible

MIQUEAS 1

¹Judá suyupi rey Jotam, rey Ahaz, rey Ezequiaspiwan kamachikushaqtinkun, Señor Diosqa Moreset llaqtayoq Miqueasman rimaykurqan. Huk rikhuriypin Samariamantawan Jerusalenmantawan payman rikuchirqan.

²Llapa llaqtakuna, kayta uyariychis, kay pachapi llapa tiyaqkuna, maki uyariychis. Apu Señor Diosmi qankuna contra testigo hina rimanqa, ch'uya wasinmantapachan Señor Diosqa huchachanqa.

³Señor Diosmi maypichus tiyasqanmanta lloqsimushan, uraykamuspan orqo patankunata purimushan.

⁴Chaki sarunanpin wayq'okunapas ch'eqtakun, orqokunan chullurin ninaman churasqa wira hina, qhatata phaqchaykuq unu hina.

⁵Señor Diosmi chaykunata ruwan Jacobpa mana kasukusqanrayku, Israel runakunaq huchallikusqanrayku. ¿Imataq Jacobpa mana kasukusqanri? ¡Samaria llaqtapi ruwasqanmi! ¿Imataq Judá runakunaq huchallikusqanri? ¡Jerusalén llaqtapi wak'a diosta yupaychasqankun!

⁶Chaymi Señor Diosqa nin: Samaria llaqtatan llapanta thunisaq, uvas mallkina chakramanmi tukuchisaq. Ruminkunatan wayq'oman wikch'uykusaq, Teqsi ruminkunataraqmi horqosaq.

⁷Llapa idolokunan ñut'usqa kanqa, yupaychana wasipi regalokuna huñusqankupas ruphasqan kanqa, lliw rikch'ayninkupas llapallanmi p'akisqa kanqa. Chaykunaqa tarisqa karqan yupaychana wasipi rabona warmikunaq pagachikusqanwanmi, wakmantan rabona warmikunallamantaq chaykunaqa pagasqa kanqa, nispa.

⁸Chaymi waqasaq anchisaq, chaymi q'ala chakipas mana p'achayoqpas purisaq, chacal animalkuna hinan aullakusaq, suri animal hinan qaparisaq.

⁹Samaria llaqtaq k'irisqa kasqanqa mana hampiy atiymi, Judá suyupas k'irisqallataqmi kashan. Awqaqa llaqtaypa tiyasqan kikin Jerusalenkaman chayan.

¹⁰Ama chaytaqa Gat llaqtapi tiyaqkunaman willaychischu, ama waqaychischu. Bet-le-afra[1] llaqtapi tiyaqkuna, ñut'u hallp'api llakikuymanta qhospaychis.

¹¹Safir llaqtapi tiyaqkuna, q'alalla p'enqasqa kamachi-kayman riychis. Zaanán llaqtapi tiyaqkunaqa manchakuspan mana lloqsimunchu, Bet-esel llaqtapiqa wañuqkunamantan lutokushanku, chayraykun mana yanapaykuyta atisunkichischu.

¹²Marot[2] llaqtapi tiyaqkunaqa sinchi llakisqan yanapayta suyashanku, Señor Diosqa hatun llakita kikin Jerusalenkamaraq chayachimusqanrayku.

¹³Laquis llaqtapi tiyaqkuna, caballokunata carretaykichisman wataychis, qankunan Sión llaqtata huchallikuyman tanqarqankichis, qankunawanmi Israel runakunaq huchanqa qallarirqan.

¹⁴Moreset-gat llaqtapi tiyaqkunata kacharpariychis. Aczib[3] llaqtaqa Israel reykunatan q'otunqa.

¹⁵Maresa[4] llaqtapi tiyaqkuna, huk atipaqmi llaqtaykita hap'ikapunqa. Israel suyupi umalli runakunapas Adulam qaqa wasimanmi pakakuq haykunqaku.

¹⁶Munasqaykichis wawaykichiskunamanta llakikuspa chukchaykichista rutukuychis, suweq'ara hina kanaykipaq umaykichista p'aqlakuychis, wawaykichismi kamachi-kayman apasqa kanqaku.