Read DIOSPA QHELQACHISQ Quechua MIQUEAS 4 Bible Online

MIQUEAS 4 - DIOSPA QHELQACHISQ Quechua bible

MIQUEAS 4

¹Hamuq p'unchaykunapin Señor Diospa wasin orqo aswan hatunkaray kanqa, llapa orqokunamantapas aswan alton kanqa. Chaymanmi llaqtakuna qhochurikamunqaku,

²askha suyukunan pusarinakamunqaku: Hakuchis, Señor Diospa orqonman seqasun, Jacobpa Diosnin yupaychana wasiman wichasun. Paymi ñanninkunata reqsichiwasun, chay ñanninkunatataq purisun, nispa. Sionmantan Señor Diospa kamachikuyninqa lloqsimunqa, Jerusalenmantan Señor Diosqa rimamunqa.

³Señor Diosmi askha llaqtakunaq ch'aqwayninta kuskachanqa, karukaman atiyniyoq suyukunaq churanakuyninta chaninchanqa. Espadankumantan yapuna rejakunata ruwakapunqaku, lanzankumantapas ichhunakunatan ruwakapunqaku. Manan mayqen suyupas huk suyuwan maqanakunqañachu, manan awqa-tinkuypaqpas wakichikunqakuñachu.

⁴Sapanka runan tiyaykunqa uvas yuran[5] k'uchupipas higos sach'an k'uchupipas, manataqmi pipas manchachiqninku kanqañachu, Tukuy-atiyniyoq Señor Diosmi chay hinata nin.

⁵Wak llaqtakunaqa diosninkutan kasunku yupaychanku, ñoqanchismi ichaqa Diosninchis Señor Diosta wiñay-wiñaypaq kasusunpas yupaychasunpas.

⁶Señor Diosmi nin: Chay p'unchaypin ovejaykunata huñuykamusaq, k'irisqaykunatapas wist'ukunatapas pantapuqkunatapas.

⁷Chay wist'ukunawanmi wakmanta llaqtata paqarichisaq, pantapuqkunatapas atiyniyoq hatun suyumanmi tukuchisaq. Ñoqa Señor Diosmi Sión orqopi llaqtayta kamachisaq, chay p'unchaymanta wiñay-wiñaykama.

⁸Qanmi, Jerusalén, uywa qhawana torre kanki, Sión llaqtapi pukara kanki. Qanmi suyupi wakmanta hatun llaqta kapunki, Israel suyuntinpi wakmanta kamachikuq kapunki, nispa.

⁹Kunanri, ¿imanaqtintaq qaparinki? ¿Manachu reyniyki kan? Icha, ¿yuyaychaqniykikunachu wañupun? ¿Wachakuq warmiq nanayninchu hap'isunki?

¹⁰Sión llaqtaq ususin, wachakushaq warmi hina nanaymanta q'ewikachakuspa qapariy. Kunanqa llaqtamantan lloqsinki, hinaspan ch'usaq pampapi karpakunki, Babiloniakaman chayanki, chaypin qespichisqa kanki, chaypin Señor Diosqa awqaykikunamanta qespichisunki.

¹¹Kunanmi askha suyukuna awqayki huñukuspa ninku: ¡Jerusalenta sarunchasunchis! ¡Sionta thunispa q'ochukusunchis! nispa.

¹²Ichaqa chay suyukunaqa manan Señor Diospa yuyaykusqankunata yachankuchu, manataq imachus ruwanantapas entiendenkuchu, paymi chaykunata erapi phichakunata hina huñuykun.

¹³Sión llaqtaq ususin, ¡sayariy! ¡Chaykunata saruy! Señor Diosmi nisunki: Ñoqan qosqayki fierro waqrayoq bronce phapatuyoq toroq kallpanta, hinan askha llaqtakunata ñut'urqarinki, paykunaq llat'anasqankutan ñoqa Señor Diosman qowanki, qhapaq kayninkutapas ñoqa kay pachantin Señor Diospaqmi t'aqapuwanki, nispa.