Read DIOSPA QHELQACHISQ Quechua MIQUEAS 7 Bible Online

MIQUEAS 7 - DIOSPA QHELQACHISQ Quechua bible

MIQUEAS 7

¹¡Ay, llakisqan kashani! Uvas pallasqa qhepata qhellapaq runa hinan kashani, manan huk k'allmallapas mikhunapaq qhepanchu. Ruphay mitapi ruru pallaq runa hinan kashani, manataqmi munasqay higostapas tarinichu.

²Manan kay suyupi Dios sonqo runa kanñachu, manan runakuna ukhupi chanin runa qhepanñachu. Lliwmi runata wañuchinapaq qhamiyanku, sapankan runamasinpaq toqllata churanku.

³Mana allinkaqta ruwanankupaqqa kusallañan kanku, kamachikuqkunaqa sinchitan mat'inku, juezkunapas lluk'iykachikunkun, atiyniyoqkunapas ima munasqankutan rimanku, hinaspan juezkunawan rimanakunku chayta ruwanankupaq.

⁴Allinninkaqninkuqa khiska hinan, aswan chaninkaqtaq t'ankarmantapas aswan millayraq. Ichaqa llaqtanta Diospa muchuchinan p'unchaymi chayamushan, llaqta qhawaq profetakunaq willasqan p'unchaymi qayllamushan, chaymi runakunaqa anchata q'aqchakushanku.

⁵Ama runa-masiykichispa siminta hap'iychischu, amallataq amigoykichismanpas k'askakuychischu, warmiykiwan rimashaspapas allinta yuyaykukuspa rimay.

⁶Churin taytanta k'amin, ususintaq maman contra sayarin, qhachunmi suegran contra sayarin, runaq awqankunaqa wasinpi kaq ayllunkunallataqmi.

⁷Ñoqan ichaqa Señor Diospi makilla suyakusaq, qespichiwaqniy Diostan suyakusaq, payqa uyariwanqan.

⁸Qan awqayqa, ama kusipayawaychu, urmaniña chaypas sayarisaqmi, laqhayaqpiña tiyasaq chaypas, Señor Diosmi k'anchaykuwanqa.

⁹Señor Dios contra huchallikusqayraykun paypa k'arak phiñakusqanta muchusaq, chaykamaqa paymi uyarichikusqayta juzganqa, hinaspan chaninchaykapuwanqa. Paymi k'anchayman horqowanqa, ñoqataq chaninchapuwasqanta rikusaq.

¹⁰Awqaypas chaytaqa rikunqan, hinan chaywan p'enqakunqa. Paymi niwarqan: ¿Maytaq Diosniyki Señor Diosri? nispa. Ichaqa kunanmi chay awqata kusipayasaq, callekunapi t'uru hina sarusqa kasqanta qhawarispa.

¹¹Jerusalén, perqaykikunaq perqasqa kanan p'unchaymi chayamushan, chay p'unchaypin qorpaykikuna yaparikunqa.

¹²Chay p'unchaypin tukuyneqmanta hamusunkiku, Asiria suyumantapas Egipto suyumantapas, Eufrates qayllamantapas, hatun lamar-qochakunamantapas, karu orqokunamantapas.

¹³Kay pachataq ichaqa purunyachisqa kanqa, chaypi tiyaqkunaq huchallikusqanrayku.

¹⁴Señor Diosníy, llaqtaykita tawnaykiwan michiy, akllakusqayki llaqtata pusay, sapallanmi mallki-mallkipi tiyan, sumaq q'achuyoq hallp'akunatan muyuykunpas, ñawpa p'unchaykunapi hina, Basán q'achukunamanpas Galaad q'achukunamanpas pusay.

¹⁵Egipto suyumanta horqomuwasqaykiku p'unchaykunapi hina musphanakunata rikuchiwayku.

¹⁶Suyukunan chayta rikunqaku, ancha atiyniyoqña kashaspankupas pisipanqakun. Upa hinan, roqt'o hinan kanqaku.

¹⁷Ñut'u hallp'atan mach'aqway hina llaqwanqaku, pampanta suchuq mach'aqwaykuna hinan kanqaku. Pakakunankumantan khatatataspa lloqsinqaku, qan Diosniyku Señor Diosmanmi khatatataspa hamusunkiku, hinaspan manchakusunkiku.

¹⁸Diosníy, manan qan hinaqa kanchu, qanmi huchata pampachanki, hinaspa kay puchuq llaqtaykiq mana kasukusqantapas qonqapunki. Manan wiñaypaqchu phiñakunki, tukuy tiempo runata khuyapayaspaykin kusikunki.

¹⁹Huktawanmi khuyapayaykuwankiku, mana chanin ruwasqaykutan sarunki, llapa huchaykutan lamar-qochaq ukhu-ukhunman wikch'uykunki.

²⁰Qanmi Jacobpa mirayninpaq hunt'aqpuni kanki, Abrahampa miraynintapas tukuy tiempon munakunki, imaynan ñawpa p'unchaykunapi ñawpa taytaykuman prometerqanki hina.