Read DIOSPA QHELQACHISQ Quechua HABACUC 3 Bible Online

HABACUC 3 - DIOSPA QHELQACHISQ Quechua bible

HABACUC 3

¹Profeta Habacucpa mañakusqan, llakiy-llakita takinapaq.

²Señor Diosnilláy, allin mentasqa kasqaykitan uyarirqani, Señor Diosnilláy, ruwasqaykikunamantan utirayarqani. Ñawpa ruwasqaykikunata kunanpas ruwallaytaq, kay p'unchaykunapi chaykunata rikuchiwayku. K'arakta phiñakuspaykipas khuyapayaykuwayku.

³Diosmi Temán suyumanta hamun, Ch'uya Diosmi Parán orqomanta hamun. Qhapaq-atiyninmi hanaq pachantinman mast'arikun, teqsimuyuntinpin payqa yupaychasqa kashan.

⁴Lliphipiyninpas inti k'anchay hinan, makinmantan illapakuna wach'imun, atiyniyoq kaspanmi payqa chaykunawan p'achakun.

⁵Ñawpaqentan wañuy onqoy phawan, qhepantan ruphapakuy onqoy purin.

⁶Pay sayaykuqtinmi kay pacha khatatatan, pay qhawariqtinmi suyukuna chukchun, ñawpa orqokunan thunikun, ñawpa moqokunan urmaykun, maypachamantapas chay hinatan payqa ruwan.

⁷Cusán runakunaq karpankunapin hatun llakita rikurqani, Madián runakunaq tiyananpin llaki phutiyta rikurqani.

⁸Señor Diosnilláy, ¿mayukunapaqchu phiñakurqanki? ¿Phawaq mayukunapaqchu phiñakurqanki? ¿Lamar-qochapaqchu k'arakta phiñakurqanki? ¿Chaychu, caballoykikunapi sillakurqanki, atipanaykipaq carretakunapipas phawamurqanki?

⁹P'eqtaykitan wach'inaykipaq wakichirqanki, llapa wach'inaykikunan wakichisqaña kashan. Mayukunawanmi kay pachata wayq'o-wayq'ota ruwachirqanki,

¹⁰qanta rikuspan orqokuna khatatatarqan, lloqlla unun phawarqan, ukhuy-ukhu lamar-qochan qaparirqan, chaykamataqmi phoqchiqesqankuna orqo hinaraq sayarirqan,

¹¹wach'isqaykikuna k'anchariqtinmi, k'anchashaq lanzayki lliphipiriqtinmi, intipas killapas sayarqan.

¹²Phiñasqan teqsimuyuntinta charqaspa purirqanki, k'arak phiñasqan suyukunata sarurqanki.

¹³Llaqtaykita qespichinaykipaqmi lloqsimurqanki, akllasqayki reyta qespichinaykipaqmi hamurqanki. Millay runakunaq wasintan thunirqanki, teqsinkunataraqmi rikhurichirqanki.

¹⁴Soldadonkunan ch'eqechiwanankupaq sinchi wayra hina phawaykamuwarqanku, paykunaqa pakaykukuq wakcha runatan oqoykunankupaq qhawapayashanku, qanmi ichaqa umallinkuta wach'ispa ch'antirqanki.

¹⁵Lamar-qochantan caballoykikunapi purirqanki, askha unu ukhupin hatun phosoqokunata sayarichirqanki.

¹⁶Chaykunata uyariqtiymi sonqoy phatatatarqan, kunkanta uyariqtiymi simiy khatatatarqan. Tullu nanaymi hap'iwarqan, chakiymi susunhapurqan. Ichaqa Diosmi sinchi llakiwan muchuchinqa hamuq awqa soldadokunata, chaymi ñoqaqa chay p'unchayta pacienciawan suyakusaq.

¹⁷Higos sach'aña mana t'ikaqtinpas, uvas yurakunaña mana ruruqtinpas, olivo sach'aña mana ruruqtinpas, chakrakunapiña cosecha mana kaqtinpas, oveja t'aqaña wañurqarichisqa kaqtinpas, uywa kanchakunapiña wakakuna mana kaqtinpas,

¹⁸ñoqaqa Señor Dioswanmi kusikusaq, Qespichiqniy Dioswanmi q'ochukusaq.

¹⁹Apu Señor Diosmi kallpachawan, paymi tarukata hina purichiwanqa, paymi orqo patankunanta allintapuni purichiwanqa.