Read DIOSPA QHELQACHISQ Quechua SOFONÍAS 2 Bible Online

SOFONÍAS 2 - DIOSPA QHELQACHISQ Quechua bible

SOFONÍAS 2

¹Mana p'enqakuq runakuna, huñunakuychis, k'umuykukuychis,

²Señor Diospa unanchasqan p'unchay manaraq chayamushasuqtiykichis, ñut'u paja hina manaraq wayrachisqa kashaqtiykichis, Señor Diospa k'arakllaña phiñakuynin manaraq chayamushasuqtiykichis, Señor Diospa k'arak phiñakuynin p'unchay manaraq chayamushasuqtiykichis.

³Kay pachapi llapa k'umuykukuqkuna, Diospa kamachikusqankunata kasukuqkuna, Señor Diosman kutirikuychis. Chaninkaqta ruwaychis, huch'uyyaykukuychis, ichapas Señor Diospa k'arak phiñakusqan p'unchaypi pakaykusqa kawaqchis.

⁴Gaza llaqtaqa mana runayoqmi kapunqa, Ascalón llaqtapas raqay-raqayman tukuchisqan kapunqa, Asdod llaqtapi tiyaqkunapas chawpi p'unchaymi qarqosqa kapunqa, Ecrón llaqtapi tiyaqkunapas llapallanmi wikch'usqa kapunqa.

⁵¡Ay, imaynaraqmi kankichis! lamar-qocha patapi tiyaq Filistea runakuna. Canaán suyu, qanpin Filistea runakuna tiyan, Señor Diosmi qan contra nin: Ñoqan ch'usaqyachisqayki, manan pipas qanpi tiyanqañachu, nispa.

⁶Chaymi lamar-qocha pata Filistea suyuqa q'achu pampaman tukupunqa, michiqkunaq michinanman, uywa kanchakunamanwan tukupunqa.

⁷Chaykunaqa Judá suyu puchuq runakunapaqmi kapunqa, chaypin uywa t'aqakunata michinqaku, Ascalón llaqta wasikunapin ch'isinta siriykunqaku, Diosninku Señor Diosmi paykunata waqaychanqa, hinaspan paykunata wakmanta t'ikarichinqa.

⁸Moab suyu runakunaq k'amipakusqantan uyarirqani, Amón suyu runakunaq k'amipakusqantan uyarirqani. Paykunan llaqtay runakunata k'amirqanku, suyunku hallp'awanpas hatunyaykurqanku.

⁹Chaymi Israelpa Tukuy-atiyniyoq Señor Diosninqa sutinpi juraspa nin: Moabqa Sodoma llaqta hinan kapunqa, Amón runakunapas Gomorra llaqta hinan kapunqa, kisa-kisaman tukuchisqa, kachi-kachiman tukuchisqa, wiñaypaq purunyachisqan kapunqa. Llaqtaymanta puchuq runakunan paykunata llat'ananqa, llaqtaymanta puchuq runakunan suyukunata hap'ikapunqa, nispa.

¹⁰Paykunaqa anchaykacharqankun, Tukuy-atiyniyoq Señor Diospa llaqtan runakunatan k'amispa asipayarqanku, chaymi chay hinata Diosqa paykunata muchuchinqa.

¹¹Kay pacha llapa dioskunata thunispan, Señor Diosqa chay runakunata sinchita mancharichinqa. Lamar-qocha patapi llapa suyukunapas paytan yupaychanqaku, sapankankupas suyunkupikama.

¹²Qankunapas Etiopía suyupi tiyaqkuna, Señor Diospa espadanwanmi wañuchisqa kankichis.

¹³Señor Diosqa wichay lado suyuta maqaspan Asiria suyuta thuninqa, Nínive llaqtatan purunyachinqa, ch'inneqta hinan ch'akiman tukuchinqa.

¹⁴Perqa qatasqa cedro tablakunan mullphayanqa, wasi punkukunapin rumi soqya kanqa, chay raqaykunapin uywa t'aqakuna puñunqa, imaymana animalkunapas samakunqa. Hukupas, peqpiripas tusa rumikunapin q'esachakunqa, ventanakunamantapas chaykunaq waqasqanmi uyarikunqa.

¹⁵Chay llaqtaqa mana imata reparaspan kusisqa karqan, sonqonpin nisqa: ¡Ñoqaqa Diosmi kani! ¡Ñoqamanta wakqa manan kanñachu! nispa. ¡Kunantaq purunyachisqa kapushan! ¡Phiña animalkunaq tiyananmanmi tukupun! Pipas chay qayllanta puriqqa asipayanqan, makinta maywispan: ¡Achacháw! ninqa.