Read DIOSPA QHELQACHISQ Quechua HAGEO 2 Bible Online

HAGEO 2 - DIOSPA QHELQACHISQ Quechua bible

HAGEO 2

¹Qanchiskaq killaq iskay chunka hukniyoq p'unchayninpin Señor Diosqa profeta Hageota nillarqantaq:

²— Judá suyupi kamachikuq Zorobabelta, Josuetapas, Babilonia suyumanta llapan kutimpuqkunatapas nimuy:

³¿Mayqenniykichispas kashankichisraqchu kay yupaychana wasiq ñawpaq sumaq-kayninta rikuq? Kunanri, ¿imayna kashaqtataq rikushankichis? Kay wasitaqa mana valeqta hinan qhawashankichis riki.

⁴Chaypas Tukuy-atiyniyoq Señor Diosmi nin: Zorobabel, ¡kallpachakuy! Uma sacerdote Josué, ¡kallpachakuy! ¡Suyuntin runakunapas kallpachakuychis! ¡Llank'aychis! Ninmi Señor Diosqa, Ñoqaqa qankunawanmi kashani. Ñoqa Señor Diosmi chayta nini.

⁵Egipto suyumanta lloqsimushaqtiykichis qankunawan rimanakusqayman hinan Espirituyqa qankunawan kashanqa. Ama manchapakuychischu.

⁶Kay pisi tiempollamantan chhaphchichisaq hanaq pachatapas, kay pachatapas, lamar-qochatapas, ch'aki hallp'a patatapas. Ñoqa Tukuy-atiyniyoq Señor Diosmi chayta nini.

⁷Llapan suyukunatapas chhaphchichillasaqtaqmi, hinan qhapaq kayninkuta kayman apamunqaku. Yupaychana wasiytataq anchata qhapaqchasaq. Ñoqa Tukuy-atiyniyoq Señor Diosmi chayta nini.

⁸Ñoqaqmi qolqepas, ñoqaqmi qoripas. Ninmi Señor Diosqa.

⁹Kay qhepakaq wasiq sumaq-kayninqa aswanraqmi kanqa ñawpaqkaqmantaqa. Ninmi Tukuy-atiyniyoq Señor Diosqa. Kayneqpitaq sumaqta tiyachisqaykichis. Ñoqa Tukuy-atiyniyoq Señor Diosmi chayta nini.

¹⁰Rey Darío iskay kaq watapiña kamachikushaqtinmi isqonkaq killaq iskay chunka tawayoq p'unchayninpi Señor Diosqa profeta Hageoman rimaykurqan,

¹¹Tukuy-atiyniyoq Señor Diosmi nin: Sacerdotekunata kamachikuy simimanta tapukuy:

¹²Pipas Diospaq t'aqasqa aychata p'achanpi unkhunman, chaypa ch'ullpantaq tupaykunman t'antatapas, sumaq mikhunatapas, vinotapas, aceitetapas, ima mikhunatapas chayqa, ¿chayraykuchu chay mikhunaqa ch'uyayachisqa kapunqa? nispa. Chayta Hageo tapuykuqtinmi, sacerdotekunaqa: — Manan, nirqanku.

¹³Hinan Hageoqa nirqan: — Pipas huk ayata tupaykusqanrayku qhelli kashaspa chaykunata llamiykunman chayqa, ¿manachu chaykunapas qhelli kapunqa? nispa. Sacerdotekunataq: — Qhellipunin kanqa, nirqanku.

¹⁴Chaymi Hageoqa nirqan, Señor Diosmi nin: Chay hina qhellin qayllaypi kay suyu runakunapas, tukuy ruwasqankupas, tukuy ima haywawasqankupas.

¹⁵Kunanqa, kay p'unchaykama imakunachus pasasqanta sonqoykichispi yuyaykuychis. Ñoqa Señor Diospa wasiyta manaraq wakmanta sayarichishaqtiykichis,

¹⁶¿iman sucederqasunkichis? Pipas iskay chunka arroba huñusqa trigota tariyta yuyaspanmi, chunka arroballataña tarirqan. Pipas phisqa chunka p'uyñuman vino wisiyta yuyaspan uvas sarunaman chayaspa, iskay chunka p'uyñullapaqña tarirqan.

¹⁷Ruphashaq wayrawanmi, polvillowanmi, chikchiwanmi llapa llank'asqaykichista chaqorqani, chaywanpas manan kutirikamuwarqankichischu. Ñoqa Señor Diosmi chayta nini.

¹⁸Kay isqonkaq killaq iskay chunka tawayoq p'unchayninpin wasiyta teqsichashankichis. Chay hinaqa, kunanmanta qhepaman imakunachus kananta sonqoykichispi yuyaykuychis.

¹⁹Taqepi muhupas manañan kapunchu, manataq uvas yurapas, higos sach'apas, granada sach'apas, olivo sach'apas rurunraqchu, chaypas kay p'unchaymantapachan saminchasqaykichis, nispa.

²⁰Chay killaq iskay chunka tawayoq p'unchaynillanpitaqmi, Señor Diosqa iskaykaq kutipi Hageota nirqan:

²¹— Judá suyupi kamachikuq Zorobabelta nimuy: Tukuy-atiyniyoq Señor Diosmi nin, Ñoqan hanaq pachatapas kay pachatapas chhapchirisaq.

²²Kay pacha suyukunaq kamachikuy tiyanankutapas thunisaqmi, suyukunaq atiynintapas qolluchisaqmi. Kumparqarisaqmi awqa-tinkuy carretakunatapas, carreta purichiqkunatapas. Hinan caballokunapas chaykunapi sillakuqkunapas urmaykunqaku, sapanka sillakuqmi runamasinpa espadanwan sat'isqa wañunqa.

²³Chay p'unchaypin kamachiy Zorobabel qanta akllasqayki, hinaspan selloyoq anilloywan kamachikuqta churasqayki, ñoqa qanta akllakusqayrayku, nispa. Ñoqa Tukuy-atiyniyoq Señor Diospunin chayta nini.