Read DIOSPA QHELQACHISQ Quechua ZACARÍAS 1 Bible Online

ZACARÍAS 1 - DIOSPA QHELQACHISQ Quechua bible

ZACARÍAS 1

¹Iskaykaq watapiña rey Darío kamachikushaqtinmi pusaqkaq killapi Iddoq nieton Berequiaspa churin profeta Zacariasta Señor Diosqa rimaykurqan:

²Ñoqa Señor Diosmi ñawpa taytaykichispaq k'araktapuni phiñakurqani.

³Chayrayku, llaqtayta nimuy, Tukuy-atiyniyoq Señor Diosmi nin: Kutirikamuwaychis, nispa. Tukuy-atiyniyoq Señor Diosmi nin: Ñoqapas kutirimusqaykichismi, nispa.

⁴Ama ñawpa taytaykichiskuna hinachu kaychis, paykunamanmi ñawpa profetakunaqa kunkayoqta nirqanku: ¡Millay kawsasqaykichismanta, millay ruwasqaykichismanta kutirikamuwaychis! nispanku. Ichaqa manan uyariwarqankuchu, manan kasuwarqankuchu. Ninmi Tukuy-atiyniyoq Señor Diosqa.

⁵Kunanri, ¿maytaq chay ñawpa taytaykichiskuna? ¿Wiñaytachu profetakunari kawsanqa?

⁶Kamachiy profetakunawanmi ñawpa taytaykichisman willachirqani simiykunata kamachikuyniykunata. Chaykunan paykuna contra hunt'akurqan, chaymi paykunaqa kutirikamuwaspa nirqanku: Imaynan Tukuy-atiyniyoq Señor Diosqa yuyaykurqan purisqanchisman hina, ruwasqanchisman hina ruwayta, ahinatan ñoqanchista muchuchiwarqanchis, nispa.

⁷Iskay kaq watapiña rey Darío kamachikushaqtinmi, Sebat nisqa chunka hukniyoq killaq iskay chunka tawayoq p'unchayninpi ñoqa Iddoq nieton, Berequiaspa churin profeta Zacariasta Señor Diosqa rimaykuwarqan.

⁸Tutan rikhuriyta rikurqani: Huk runan puka-ch'umpi caballopi sillaykusqa kashasqa, paymi wayq'o k'aktupi arrayán-arrayanpi sayashasqa, qhepanpitaq kashasqa puka-ch'umpi caballokuna, ch'umpi caballokuna, yuraq caballokuna.

⁹Chaymi tapurqani: — Wiraqocháy, ¿imakunataq kaykunari? nispa. Hinan ñoqawan rimaq angelqa niwarqan: — Ñoqan rikuchisqayki imakunachus chaykunaqa kasqanta, nispa.

¹⁰Arrayán-arrayanpi kashaq runataq nirqan: — Chaykunaqa teqsimuyuntin pachata purimunankupaq Señor Diospa kamachisqankunan, nispa.

¹¹Hinan paykunaqa arrayán-arrayanpi kashaq Señor Diospa angelninta nirqanku: — Teqsimuyuntin pachatan purimuyku, llapa pachantinmi allillan thak-kayapi kawsashanku, nispa.

¹²Chaymi Señor Diospa angelninqa nirqan: — Tukuy-atiyniyoq Señor Diosnilláy, ¿hayk'aqkamataq mana khuyallikunkichu Jerusalentapas Judá llaqtakunatapas? Chaykunapaqmi qanchis chunka wataña phiñasqa kashanki, nispa.

¹³Hinaqtinmi Señor Diosqa ñoqawan rimaq angelman kusichikuq sumaq simikunata kutichirqan.

¹⁴Chaymantataq ñoqawan rimaq angelqa kayta willanaypaq kamachiwarqan: — Tukuy-atiyniyoq Señor Diosmi nin: Sientenipunin Jerusalenmantapas Sión orqomantapas.

¹⁵Chayraykun k'araktapuni phiñakuni chay llakhi tiyashaq suyukunapaq, ñoqa asllata phiñakushaqtiymi paykunaqa llaqtayta sinchita ñak'arichirqanku.

¹⁶Chaymi ñoqa Señor Diosqa Jerusalenta wakmanta khuyapayasaq, chaypin wasiyqa wakmanta perqasqa kanqa. Chay hinaqa perqanapaqmi cordelwan tupunqaku, nispa. Ñoqa Tukuy-atiyniyoq Señor Diosmi chayta nini.

¹⁷Chay angelqa nillawarqantaqmi, Willamullaytaq: Tukuy-atiyniyoq Señor Diosmi nin: Anchatapunin llaqtaykunataqa wakmanta t'ikarichisaq, Siontaqa wakmantan sonqochasaq, Jerusalentaqa wakmantan akllakusaq, nispa.

¹⁸Chaymantataq qhawarispa rikurqani tawa waqra kashaqta.

¹⁹Chaymi ñoqawan rimaq angelta tapurqani: — ¿Imataq chay waqrakunari? nispa. Paytaq niwarqan: — Chaykunaqa Judapi, Israelpi, Jerusalenpi tiyaqkunata ch'eqechiq atiyniyoq suyukunan, nispa.

²⁰Chaymantataq Señor Diosqa tawa herrerota rikuchiwarqan.

²¹Ñoqataq tapurqani: — ¿Imamantaq kaykunari hamunku? nispa. Hinan payqa niwarqan: — Waqrakunaqa Judá suyuta ch'eqechispan k'uytupachirqanku, kay herrerokunataq ichaqa hamunku chay Judá suyuta ch'eqechiq suyukunata khatatatachispa atipanankupaq, nispa.