Read DIOSPA QHELQACHISQ Quechua ZACARÍAS 10 Bible Online

ZACARÍAS 10 - DIOSPA QHELQACHISQ Quechua bible

ZACARÍAS 10

¹Señor Diosmanta qhepa mita parata mañakuychis, illapata lliphllikichimuq Señor Diosmi allinta parachimunqa, llapapaqtaqmi campopi q'achuta wiñachinqa.

²Wasi idolokunaq rimasqanqa llullan, watuqkunaq rikusqanpas q'otuyllan, llulla mosqokusqankutan watunku, sonqochaykuq siminkupas yanqan, chaymi llaqtaqa oveja t'aqa hina pantapun, mana michiqniyoq kaspataq muchushan.

³Chaymi Señor Diosqa nin: Michiqkunapaqmi k'arakta phiñakuni, llaqtay kamachiqkunatan muchuchisaq. Judá runakunaqa ñoqaqmi, ñoqa Tukuy-atiyniyoq Señor Diosmi paykunata oveja t'aqata hina qhawasaq, paykunatan awqa-tinkuypaq kallpasapa caballoman hina tukuchisaq.

⁴Paykunamantan esquina hap'iq rumi sayarimunqa, paykunamantan karpa takarpupas kanqa, paykunamantan awqa-tinkuy wach'ina p'eqtapas kanqa, paykunallamantataqmi tukuy kamachikuqkunapas sayarimunqa.

⁵Awqa-tinkuypi calle t'urukunata saruq soldadokuna hinan kanqaku, ñoqa Señor Diosmi paykunawan kashasaq, chaymi paykunaqa caballopi sillakuq soldadokunatapas maqanakuspa atipanqaku.

⁶Ñoqan Judá runakunata kallpachasaq, Josepa miraynintapas qespichisaq. Paykunataqa khuyapayaspaymi maychus tiyanankuman kutichimpusaq, manapas wikch'uymanchu karqan hinan kapunqaku. Ñoqaqa Diosninku Señor Diosmi kani, mañakamuwasqankutan uyarisaq.

⁷Kallpasapa hinan Efraín runakunaqa kanqa, sonqonkupas vinowan hinan kusikunqa, churinkupas chayta rikuspankun kusikunqa. ¡Sonqonkun Señor Diospa ruwasqanwan kusikunqa!

⁸Ñoqan paykunata waqyarispa huñuykampusaq, ñoqan paykunataqa horqokampusaq, chaymi ñawpa p'unchaykunapi hina anchatapuni askhayanqaku.

⁹Llaqtakuna ukhumanña paykunata ch'eqechirqani chaypas, karu suyukunamantan yuyarimuwanqaku, paykunapas churinkupas kawsashallanqakupunin, kaymantaqmi kutimpunqakupas.

¹⁰Ñoqan Egipto suyumanta paykunata kutichimpusaq, Asiria suyumantapas pusakampusaqmi. Galaadmanmi Libanomanmi paykunataqa apakampusaq, manaraqmi paykunapaq tiyanapas aypanqachu.

¹¹Llaki-phutiy qochatan chimpanqaku, chay qochaq phoqchiqesqankunatan ch'inyachisaq, Nilo mayutan ukhukama ch'akichisaq. Asiria suyuq uma hoqarisqantapas k'umuykachisaqmi, Egipto suyuq kamachikusqantapas chinkachisaqmi.

¹²Ñoqan llaqtay runakunata kallpachasaq, chaymi sutiypi purinqaku, nispa. Ñoqa Señor Diosmi chayta nini.