Read DIOSPA QHELQACHISQ Quechua ZACARÍAS 12 Bible Online

ZACARÍAS 12 - DIOSPA QHELQACHISQ Quechua bible

ZACARÍAS 12

¹Señor Diosmi hanaq pachata mast'arin, kay pachatapas teqsichan, runamanpas kawsayta qon. Paymi Israelmanta nin:

²Ñoqan Jerusalenta churani muyuriq llapa suyukunata machachiq vino vaso kananpaq. Chaykuna Jerusalenta muyuykuqtinkun, Judá suyupi huk llaqtakunapas muyuykusqallataq kanqa.

³Chay p'unchaypin Jerusalenta churasaq mana kuyurichiy atina llasa qaqa kananpaq, mayqen suyupas chay qaqata kuyurichiyta munaqqa k'irisqan kanqa. Tukuy suyukunan Jerusalén contra huñukamunqaku.

⁴Ichaqa, chay p'unchaypin llapa caballota q'aqchasaq, caballopi sillakuq soldadokunatapas waq'ayachisaq. Judá runakunatan waqaychasaq, awqan suyukunaq caballontataqmi ichaqa llapallanta ñawsayachisaq. Ñoqa Señor Diosmi chayta nini.

⁵Judapi umallikunataqmi sonqonkupi ninqaku: Jerusalenpi tiyaqkunaq Diosninqa Tukuy-atiyniyoq Señor Diosmi, paymi paykunataqa kallpachan, nispanku.

⁶Chay p'unchaypin Judá umallikunata llant'a ukhupi nina sansata hina churasaq, trigo marq'ay ukhupi rawrashaq ninata hina. Chaymi qorpa tupayninpi kaq suyukunata llapallanta ruphaykunqa, Jerusalenpi tiyaqkunataq llaqta ukhupi mana manchachisqa tiyakapunqaku.

⁷Ñawpaqtaqa ñoqa Señor Diosmi Judá ayllukunawan awqakunata atipachisaq, Davidpa mirayninpas Jerusalenpi tiyaqkunapas Judá ayllukuna contra ama anchaykachanankupaq.

⁸Chay p'unchaypin ñoqa Señor Diosqa Jerusalenpi tiyaqkunata amachasaq, chaymi paykuna ukhupi sinchi pisi kallpayoqqa David hina kallpasapa kanqa. Davidpa miraynintaq Dios hina kanqa, wawqenkuq ñawpaqentan Señor Diospa angelnin hina rinqaku.

⁹Chay p'unchaypin ñoqaqa Jerusalén contra hamuq mayqen suyutapas wañuchisaq.

¹⁰Davidpa miraynintapas Jerusalenpi tiyaqkunatapas khuyapayakuq sonqomanmi tukuchisaq, mañakuy munaq sonqoyoqmanmi tukuchisaq. Hinan qhawarimuwaspanku, t'urpuspa wañuchisqanku qharimanta waqaykunqaku. Sapan churimanta waqaq hina, phiwi wawamanta llakikuq hina paymanta llakikunqaku.

¹¹Chay p'unchaypin Jerusalenpi khuyay waqay kanqa, Meguido pampapi Hadad-rimonpaq waqasqanku hina.

¹²Kay suyupin sapanka ayllu sapaqpi waqaykunqaku: Davidpa miraynin qharikunapas sapaqpi, warminkupas sapaqpi, Natanpa miraynin qharikunapas sapaqpi, warminkupas sapaqpi,

¹³Levipa miraynin qharikunapas sapaqpi, warminkupas sapaqpi, Simeipa miraynin qharikunapas sapaqpi, warminkupas sapaqpi,

¹⁴wakin ayllu tukuy qharikunapas sapaqpikama, warminkupas sapaqllapitaq.