Read DIOSPA QHELQACHISQ Quechua ZACARÍAS 14 Bible Online

ZACARÍAS 14 - DIOSPA QHELQACHISQ Quechua bible

ZACARÍAS 14

¹Señor Diospa taripanan p'unchaymi chayamushan, Jerusalenmi llat'anasqa kanqa, awqakunan qechusqakunata qhawashaqtiyki rakinakunqaku.

²Señor Diosmi Jerusalenta maqanankupaq llapan suyukunata huñuykamunqa, hinan llaqtaqa hap'isqa kanqa, wasikunapas suwasqan kanqa, warmikunapas violasqan kanqa. Kuskan llaqtataqmi wak suyuman preso apasqa kanqa, puchuqkunallan llaqtamanta mana apasqachu kanqa.

³Chaymantataq Señor Diosqa lloqsispa chay suyukunawan maqanakunqa, imaynan ñawpa awqa-tinkuypi maqanakurqan hinata.

⁴Chay p'unchaypin Señor Diosqa Jerusalén chimpa inti lloqsimuy cheqas Olivos orqo patapi sayaykunqa. Hinan chay orqoqa iskayman ch'eqtasqa kanqa inti lloqsimuy ladomanta inti haykuy ladoman. Ancha hatun wayq'omanmi tukunqa, kuskan orqon wichayman suchurinqa, kuskannintaq urayman suchuykunqa.

⁵Chay wayq'oqa Azalkaman chayanqa, chaymi chayninta ayqekunkichis Judá rey Uziaspa kamachikusqan tiempopi pacha chhaphchikuqtin ayqekurqanku hinata. Chay qhepatan Diosniy Señor Diosqa llapa angelkunawan kuska hamunqa.

⁶Chay p'unchaypiqa manan inti k'anchaypas, chiripas, qasapas kanqachu.

⁷Chay p'unchayqa Señor Diospa reqsisqallanmi kanqa, chaypiqa manan p'unchay kasqanpas tuta kasqanpas reparakunqachu, aswanpas p'unchay hinan tutaqa k'anchanqa.

⁸Chay p'unchaypin Jerusalenmanta phawashaq unu phullpumunqa q'oñi tiempopipas chiri tiempopipas, kuskanmi inti lloqsimuy lado Kachi Qochaman phawanqa, kuskantaq inti haykuy lado lamar-qochaman phawanqa.

⁹Señor Diosmi kay pachantinpi rey kanqa, llapa pachantinmi pay sapallan Diosta reqsinqaku, Señor Diospa sutinpitaqmi yupaychanqakupas.

¹⁰Llapa suyuntinmi pampaman tukunqa, Jerusalén uray Geba llaqtamanta Rimón llaqtakama. Jerusalentaqmi pampa moqo patapi kashanqa. Maypichus kananpi kashanqa Benjamín Punkumanta Ñawpa Punku nisqa Esquina Punkukama, hinallataq Hananeel Torremanta reypaq uvas saruna cheqaskama.

¹¹Jerusalenqa manañan hayk'aqpas thunisqachu kanqa, aswanpas chaypiqa runakunan mana manchakuspa tiyanqaku.

¹²Señor Diosmi Jerusalenta maqaq llapan suyukunata millay onqoywan muchuchinqa. Hinan kawsashaqtinku aychanku ismunqa, ñawinkupas ñawi t'oqonkupi ismunqa, qallunkupas siminkupin apiyanqa.

¹³Chay p'unchaypin Señor Diosqa paykunata llaksanqa, hinan sapankanku runa-masinkuman hap'iparqokunqaku, hinaspan maqanakunqaku.

¹⁴Judá runakunapas Jerusalenpin maqanakunqa, hinaspan muyuriqninpi kaq llapan suyukunamanta qechunqa ancha askha qorita, qolqeta, p'achatapas.

¹⁵Runata onqochiq millay onqoyllataqmi hap'inqa caballokunatapas, mulakunatapas, camellokunatapas, asnokunatapas, karpa-karpankupi kashaq llapa uywakunatapas.

¹⁶Jerusalén contra hamuq suyukunamanta kawsashaq qhepaqkunataq sapa wata chayman wichanqaku, Tukuy-atiyniyoq Señor Dios Reyta yupaychanankupaq, Ch'uklla Ruwana Fiestatapas ruwanankupaq.

¹⁷Kay pacha mayqen suyutaqchus Jerusalenta mana wicharinqachu, Tukuy-atiyniyoq Señor Dios Reyta yupaychaq chayqa, manan chay suyupi paramunqachu.

¹⁸Egipto runakunachus mana rinqaku chayqa, manan chay suyupi paramunqachu. Ch'uklla Ruwana Fiestaman mana riq suyukunatan Señor Diosqa millay onqoywan muchuchin, chayllawantaqmi Egipto suyutapas muchuchinqa.

¹⁹Chaymi Egipto suyuq muchunanqa kanqa, hinallataq Ch'uklla Ruwana Fiestaman mana riq llapan suyukunaq muchunanpas kanqa.

²⁰Chay p'unchaypin caballokunaq campanillanpi qelqasqa kashanqa “Señor Diospaq T'aqasqa” niq. Señor Diospa wasinpi kaq mankakunataq altar qayllapi hatun vasokuna hina ch'uya kanqa.

²¹Tukuy mankan Jerusalenpipas Judapipas Tukuy-atiyniyoq Señor Diospaq t'aqasqa kanqa. Hinan sacrificio haywaq llapa hamunqaku, hinaspan chay mankakunata hoqarinqaku wayk'unankupaq. Manañan chay p'unchaypiqa Tukuy-atiyniyoq Señor Diospa wasinpi qhatuqkuna kanqañachu.