Read DIOSPA QHELQACHISQ Quechua ZACARÍAS 2 Bible Online

ZACARÍAS 2 - DIOSPA QHELQACHISQ Quechua bible

ZACARÍAS 2

¹Qhawarispaymi rikullarqanitaq: Huk qharin tupuna cordelta hap'ishasqa.

²Hinan payta tapurqani: — ¿Maytan rishanki? nispa. Paytaq niwarqan: — Jerusalenta tupuqmi rishani, hayk'a anchoyoqchus hayk'a wask'ayoqchus kasqanta yachanaypaq, nispa.

³Chaymantataq ñoqawan rimaq angelqa ripurqan, huk angeltaq paywan tupaq hamurqan,

⁴hinaspan payta nirqan: — Phaway, tupuna cordelniyoq waynata nimuy: Jerusalenpin askhallaña runapas uywapas tiyanqa, chaymi llaqtaqa manaña perqawan muyuykachisqachu kanqa, nispa.

⁵Kikin Señor Diosmi nin: Ñoqaqa chay llaqtapaqmi muyuykuqnin nina perqa hina kasaq, chay ukhupin paykunapaq qhapaq-atiynin kasaq, nispa.

⁶Señor Diosmi nin: ¡Lloqsimuychis ayqemuychis wichay suyumanta! Ñoqan hinantinman ch'eqechirqaykichis, ninmi Señor Diosqa.

⁷Sión llaqtalláy, Babiloniapi tiyashasqaykichismanta, ¡ayqemuychis! ¡Hampuychis! nispa.

⁸Pipas qankunata tupaykuqqa ñawi ruruytan tupaykun, Tukuy-atiyniyoq Señor Diosmi chunkay-chunkata kamachimuwan llat'anaqniykichis suyukuna contra rimanaypaq:

⁹Señor Diosmi nin: Qankuna contran sayarisaq, kikin kamachillaykichiswantaqmi qankunata llat'anachisqaykichis, nispa. Ahinapin yachankichis Tukuy-atiyniyoq Señor Diospa kachamuwasqanta.

¹⁰Señor Diosmi nin: Sión llaqtapi tiyaqkuna, kusisqa qapariychis q'ochukuychis, hamushaniñan, qankuna ukhupin tiyasaq, nispa.

¹¹Chay p'unchaypin askha suyukuna Señor Diosman huñuykukunqaku, paykunapas llaqtallantaqmi kapunqaku. Tukuy-atiyniyoq Señor Diosmi qankuna ukhupi tiyanqa, ahinapin yachankichis paypa qankunaman kachamuwasqanta.

¹²Señor Diosmi Judá suyuta ch'uya hallp'api wakmanta hap'ikapunqa kaqnin kananpaq, Jerusalentapas wakmantan akllakapunqa.

¹³Señor Diosmi ch'uya tiyananmanta sayarimun, chayrayku llapa runa paypa qayllanpi upallachun.