Read DIOSPA QHELQACHISQ Quechua ZACARÍAS 5 Bible Online

ZACARÍAS 5 - DIOSPA QHELQACHISQ Quechua bible

ZACARÍAS 5

¹Huktawan qhawarispan rikurqani huk qelqa k'uyu phalashaqta.[3]

²Angeltaq tapuwarqan: — ¿Imatan rikushanki? nispa. Ñoqataq kutichirqani: — Qelqa k'uyu phalashaqtan rikushani, chay k'uyun isqon metro wask'ayoq, tawa metro kuskan anchoyoq kashasqa, nispa.

³Hinan payqa niwarqan: — Chaypin qelqasqa kashan suyuntinman chayaq ñakayqa. Pipas suwakuqqa qarqosqan kanqa, imaynan qelqa k'uyuq huknin uyanpi nisqa kashan hina. Pipas llullakuspa juraqpas qarqosqan kanqa, imaynan qelqa k'uyuq hukkaqnin uyanpi nisqa kashan hina, nispa.

⁴Tukuy-atiyniyoq Señor Diosmi nin: Ñoqan chay ñakayta chayachimuni suwakuqpa wasinmanpas haykunanpaq, llullakuspa sutiypi juraqpa wasinmanpas haykunanpaq. Chaypin ñakayqa kashallanqapuni k'aspinkunatapas ruminkunatapas thuninankama, nispa.

⁵Hinamantataq ñoqawan rimaq angelqa asuykamuwaspa niwarqan: — Kunan imachus rikhurimunqa chayta allintapuni qhaway, nispa.

⁶Ñoqataq tapurqani: — ¿Imataq chayri? nispa. Paytaq niwarqan: — Chayqa tupuna rakin. Chayqa suyuntinpi huchallikusqankun, nispa.

⁷Qhawashaqtiytaq titi kirpanata kicharqanku, huk warmitaq chay raki ukhupi tiyashasqa.

⁸Angeltaq niwarqan: — Kay warmiqa “Mana Allin Kaymi” nispa. Hinaspan raki ukhuman tanqaykurqan, chay titi kirpanawantaq kirpaykurqan.

⁹Wichayman qhawariqtiymi, ñawpaqeypi iskay warmi kapushasqa. Cigüeña hina raphrayoqmi kasqaku, wayrataq raphrankuta phalachishasqa. Hinan paykunaqa chay rakita wichayman hoqarirqanku.

¹⁰Chaymi ñoqawan rimaq angelta tapurqani: — ¿Maytan chay rakita apashanku? nispa.

¹¹Paytaq niwarqan: — Sinar sutiyoq Babilonia suyupin yupaychana wasita “Mana Allin Kaypaq” perqanqaku, wasichasqaña kaqtintaqmi tiyachina patapi rakita tiyachinqaku, nispa.