Read DIOSPA QHELQACHISQ Quechua MATEO 14 Bible Online

MATEO 14 - DIOSPA QHELQACHISQ Quechua bible

MATEO 14

¹Chay p'unchaykunapin Galilea provinciapi kamachikuq Herodesqa Jesusmanta rimayta uyarirqan.

²Hinaspan oficialninkunata nirqan: — Chay runaqa wañusqanmanta kawsarimpuq Bautizaq Juanmi, chayraykun payqa milagrokunata ruwan, nispa.

³Juanmi Herodesta anyasqa: — Manan chaninchu wawqeyki Felipeq warmin Herodiaswan casarakusqaykiqa, nispa. Chaymi Herodesqa Juanta hap'ichispa watasqata carcelman wisq'achisqa.

⁵Hinaspan Juanta wañuchiytapuni munarqan, ichaqa runakunatan manchakurqan. Llapa runan Juantaqa reqsirqan profeta kasqanta.

⁶Herodesmi nacesqan p'unchayta yuyarispa fiestakusharqan, hinan Herodiaspa ususinqa ñawpaqenkupi tususpa Herodespa sonqonta suwarqan.

⁷Chaymi Herodesqa juraspa sipasta nirqan: — Lliw imapas mañakuwasqaykitan qosqayki, nispa.

⁸Sipastaq mamanpa yachachisqan kaspa nirqan: — Bautizaq Juanpa umanta platopi qoway, nispa.

⁹Chaymi rey Herodesqa llakikurqan. Ichaqa jurasqanrayku paywan mikhuqkunapas uyarisqanraykun kamachirqan sipasman qonankupaq.

¹⁰Hinaspan kacharqan carcelpi Juanpa umanta qhoruchimunanpaq.

¹¹Chay umatataq platopi apamuspa sipasman qorqan, paytaq mamanman aparqan.

¹²Chay qhepatataq Juanpa yachachisqankunaqa hamuspa ayata apaspa p'ampaykamurqanku. Hinaspan rirqanku Jesusman willamuq.

¹³Jesusmi Bautizaq Juanpa wañusqanta yachaspa, chaymanta botepi sapallan ch'inneqman ripurqan. Runakunataq chayta yachaspa llaqtakunamanta paypa qhepanta chakipi rirqanku.

¹⁴Jesustaq botemanta lloqsishaspa sinchi askha runata rikurqan, hinaspan paykunata khuyapayarqan. Onqosqa runakunatapas qhaliyachirqan.

¹⁵Ch'isiyaykushaqtintaq yachachisqankunaqa Jesusman asuykuspa nirqanku: — Kayqa ch'inneqmá, ch'isiyaykushanñataqmi. Chayrayku runakunata kacharparipuy, llaqtakunaman rispa mikhunata rantikamunankupaq, nispa.

¹⁶Hinan Jesusqa paykunata nirqan: — Manan ripunkumanchu, paykunamanqa qankuna mikhuchiychis, nispa.

¹⁷Chaymi paykunaqa nirqanku: — Kaypiqa phisqa t'antallaykun iskay challwallaykupiwanmi kashan, nispa.

¹⁸Jesustaq nirqan: — Chaykunata apamuwaychis, nispa.

¹⁹Hinaspan runakunata q'achu patapi tiyaykunankupaq kamachirqan. Phisqa t'antata iskay challwatawan hap'iykuspataq, hanaq pachata qhawarispa graciasta qorqan, hinaspan t'antakunata phasmispa yachachisqankunaman qorqan runakunaman rakimunankupaq.

²⁰Hinan llapanku saksaykurqanku, puchuq t'anta p'akitataq hoqarirqanku chunka iskayniyoq canasta hunt'ata.

²¹Mikhuqkunataq phisqa waranqa qharikuna karqan, warmikunawan wawakunawanqa manan yupasqachu karqan.

²²Chaymantataq Jesusqa yachachisqankunata kamachirqan boteman haykuspa qocha chimpaman ñawpanankupaq, chaykamataq payqa runakunata kacharparipusharqan.

²³Chay qhepatataq orqoman wicharqan sapallanpi Diosmanta mañakamunanpaq. Tutayaykuqtintaq Jesusqa sapallan chaypi kasharqan.

²⁴Bote sinchi ukhupiña kashaqtinmi, ñawpaqenkumanta wayramurqan, qochaq phoqchiqeynintaq boteta apaykachasharqan.

²⁵Hinan Jesusqa pacha illarimuyta paykunaman rirqan unu patanta purispa.

²⁶Chaymi yachachisqankunaqa unu patanta paypa purisqanta rikuspa, mancharisqa qaparirqanku: — ¡Manchachikuqmi! nispa.

²⁷Hinan Jesusqa paykunata kaq rato nirqan: — ¡Kallpachakuychis, ñoqan kani, ama mancharikuychischu! nispa.

²⁸Hinaqtinmi Pedroqa payta nirqan: — Señor, qanpuni kanki chayqa, kamachiway unu patanta qanman hamunaypaq, nispa.

²⁹Jesustaq: — Hamuy, nirqan. Hinan Pedroqa botemanta uraykuspa, unu patanta purirqan Jesusman rinanpaq.

³⁰Sinchita wayramusqanta rikuspataq Pedroqa mancharikurqan, unuman chinkaykuyta qallarispataq qaparirqan: — ¡Señor, aysarqoway! nispa.

³¹Hinan chay ratopacha Jesusqa Pedroq makinmanta hap'iykuspa nirqan: — ¡Pisi iñiyniyoq runa! ¿Imanaqtinmi iskayrayanki? nispa.

³²Boteman paykuna haykuqtinku hinataq wayraqa thanipurqan.

³³Hinaqtinmi botepi kashaqkunaqa asuykuspa Jesusta yupaycharqanku: — Cheqaqtapunin qanqa Diospa Churin kanki, nispanku.

³⁴Qochata chimpaspataq Genesaret ladoman chayarqanku.

³⁵Chaypi tiyaq runakunataq Jesusta reqsirqospa muyuriqninpi ayllukunaman willachirqanku, chaymi llapa onqosqakunata Jesusman pusamurqanku.

³⁶Hinaspan Jesusta rogakurqanku, p'achan patallatapas llamiykunankupaq, chaymi llapan llamiykuqkunaqa qhaliyarqanku.