Read DIOSPA QHELQACHISQ Quechua MATEO 16 Bible Online

MATEO 16 - DIOSPA QHELQACHISQ Quechua bible

MATEO 16

¹Fariseokunataq saduceokunapiwan Jesusta wateqanankupaq asuykuspa nirqanku: — Huk milagrota rikuchiwayku hanaq pachamanta kasqaykita yachanaykupaq, nispa.

²Chaymi Jesusqa paykunata nirqan: — Tarden pukata antawaraqtinmi ninkichis: Allin tiempon kanqa, nispa.

³Tutamanta yanata antawaraqtintaq ninkichis: Paranqan, nispa. ¡Iskay uyakunan kankichis! Qankunaqa cielota qhawaspan imaynachus tiempo kananta kusata yachankichis, ¿imaynataq mana reparankichischu kunan tiempo imaynachus kasqanta?

⁴Yaw, Diosta mana kasukuq millay runakuna, milagro ruwanaytan munashankichis, ichaqa manan ima milagrotapas rikuchisqaykichischu, aswanpas profeta Jonasta sucedesqallantan milagrota hina rikuchisqaykichis, nispa. Chaykunata nispataq Jesusqa ripurqan.

⁵Jesuspa yachachisqankunan qochata chimpaspa t'anta apakuyta qonqarqanku.

⁶Hinan Jesusqa paykunata nirqan: — Cuidakuychis waqaychakuychis fariseokunaq saduceokunaq qonchunmanta, nispa.

⁷Chaymi paykunaqa ninakurqanku: — Kaytaqa nishawanchis t'antata mana apakamuqtinchismi, nispanku.

⁸Hinan Jesusqa chay nisqankuta entiendespa nirqan: — Pisi iñiyniyoq runakuna, ¿imaraykun rimashankichis t'antata mana apamusqaykichismanta?

⁹¿Manaraqchu entiendenkichis? ¿Manallataqchu yuyarinkichispas phisqa t'antamanta phisqa waranqa runaman rakisqayta? ¿Puchuntapas hayk'a canastatachus hoqarisqaykichista?

¹⁰¿Manallataqchu yuyankichis qanchis t'antamanta tawa waranqa runaman rakisqayta? ¿Puchuntapas hayk'a canastatachus hoqarisqaykichista?

¹¹¿Imaynataq mana entiendenkichischu? Chaytaqa manan t'antamantachu nishaykichis, aswanpas fariseokunaq saduceokunaq qonchunmanta cuidakunaykichispaqmi niykichis, nispa.

¹²Hinan entienderqanku, mana t'anta qonchumantachu nishasqanta, aswanpas fariseokunaq saduceokunaq yachachikuyninmanta cuidakunankupaq rimashasqanta.

¹³Jesusmi Felipeq kamachisqan Cesarea llaqta qaylla hallp'aman chayaspa yachachisqankunata tapurqan: — ¿Runakunari pin ninkutaq Runaq Churinmanta? nispa.

¹⁴Chaymi yachachisqankunaqa nirqanku: — Wakinmi Bautizaq Juanmi ninku, wakintaq Eliasmi ninku, wakintaq Jeremiasmi ninku, wakinñataq profetakunamanta hukninchá ninku, nispa

¹⁵Hinan Jesusqa paykunata nirqan: — Qankunari, ¿pin niwankichistaq? nispa.

¹⁶Simón Pedrotaq Jesusta nirqan: — Qanqa kawsaq Diospa Churin Criston kanki, nispa.

¹⁷Hinan Jesusqa payta nirqan: — Jonaspa churin Simón, kusisamiyoqmi kanki, manan runachu chaytaqa yachachirqasunki, aswanpas hanaq pachapi kaq Yayaymi.

¹⁸Ñoqapas nillaykitaqmi, qanqa Pedro kasqaykita, kay qaqa patapin iglesiayta sayarichisaq, manataqmi Wañuy-pachaq atiyninpas iglesiataqa atipanqachu.

¹⁹Qanmanmi Hanaq pacha qhapaqsuyuman haykuna llavekunata qosqayki, kay pachapi tukuy watasqaykiqa hanaq pachapipas watasqallataqmi kanqa, kay pachapi tukuy paskasqaykipas hanaq pachapiqa paskasqallataqmi kanqa, nispa.

²⁰Hinaspanmi Jesusqa yachachisqankunata kamachirqan: — Aman pimanpas Cristo kasqaytaqa willankichischu, nispa.

²¹Chaymantapachan Jesusqa yachachisqankunaman sut'inchaspa nirqan: — Jerusalén llaqtamanqa rinaypunin, chaypin kurak runakuna, sacerdote umallikuna, kamachikuy simita yachachiqkuna sinchitapuni ñak'arichiwaspa wañuchiwanqaku. Ichaqa kinsakaq p'unchaypin kawsarimpusaq, nispa.

²²Chaymi Pedroqa payta wakman pusaspa anyarqan: — Señor, amapuni Diospas munachunchu chay hina sucedenasuykitaqa, nispa.

²³Hinan Jesusqa Pedrota nirqan: — ¡Satanás, ladoymanta anchhuriy! Urmachiytan munawanki. Qanqa manan Dios hinachu yuyaykunki, aswanpas runa hinallan yuyaykunki, nispa.

²⁴Hinaspan Jesusqa yachachisqankunata nirqan: — Pipas qhepayta hamuyta munaqqa, pay kikinta negakuchun, hinaspa cruzpi ñoqarayku ñak'arishaq hina ñak'arispa qhepayta hamuchun.

²⁵Pipas pay kikillanta waqaychakuyta munaqqa, chinkapunqan, pipas ñoqarayku wañuqmi ichaqa kawsanqa.

²⁶Huk runachus kay pachantinpi lliw kaqkunata paylla hap'ikapunman kawsaynintataq chinkachikapunman chayqa, ¿ima allintaq paypaq kanqa? ¿Hayk'atataq runaqa qonman kawsayninta qespichinanpaq?

²⁷Runaq Churinqa angelninkunapiwanmi Yayanpa hatunchasqan hamunqa, hinaspan sapankaman ruwasqanman hina pagapunqa.

²⁸Cheqaqtan niykichis, kaypi kashaqkunamanta wakinkunaqa manan wañunqakuchu Runaq Churinta qhapaqsuyunpi hamushaqta rikunankukama, nispa.