Read DIOSPA QHELQACHISQ Quechua MATEO 26 Bible Online

MATEO 26 - DIOSPA QHELQACHISQ Quechua bible

MATEO 26

¹Jesusqa tukuy chaykunata rimayta tukuspan yachachisqankunata nirqan:

²— Yachankichismi iskay p'unchaymanta Pascua Fiesta kananta. Chaypin Runaq Churinta kamachikuqkunaman hap'ichinqaku chakatanankupaq, nispa.

³Chaypachan sacerdote umallikuna, judío kurak runakunapiwan huñukurqanku uma sacerdote Caifaspa wasi pationpi,

⁴hinaspan rimanakurqanku q'otullawan Jesusta hap'ispa wañuchinankupaq.

⁵Ichaqa nirqankun: — Ama fiesta p'unchaypiqa hap'isunchu, runakuna ama ch'aqwananpaq, nispa.

⁶Betania llaqtachapi lepra onqoyniyoq nisqa Simonpa wasinpi Jesusqa

⁷mikhunanpaq tiyashaqtinmi, huk warmi hamurqan yuraq rumi p'uyñuchapi ancha chaniyoq q'apaq hawina apantin. Hinaspan Jesuspa umanman hich'aykurqan.

⁸Yachachisqankunataq chayta rikuspa phiñakurqanku: — ¿Imapaqmi kaytaqa usuchin?

⁹Kaytaqa askha qolqeman vendespan wakchakunata yanapasunman karqan, nispa.

¹⁰Jesustaq chayta yachaspa paykunata nirqan: — ¿Imanaqtinmi kay warmi contra rimankichis? Payqa ñoqapaqmi allinta ruwashan.

¹¹Wakchakunaqa qankunawanpunin kashan, ñoqan ichaqa mana tukuy tiempochu qankunawan kasaq.

¹²Kay q'apaq hawinata cuerpoyman hich'aykuwaspaqa p'ampasqa kanaypaqmi wakichipushawan.

¹³Cheqaqtan niykichis, maypipas allin willakuykuna kay pachantinpi willasqa kasqanpin kay warmiq ruwasqanpas willasqallataq kanqa payta yuyarinapaq, nispa.

¹⁴Hinaqtinmi chunka iskayniyoq yachachisqankunamanta huknin Judas Iscarioteqa sacerdote umallikunaman rirqan.

¹⁵Hinaspan paykunata nirqan: — ¿Imatataq qowankichisman Jesusta qankunaman hap'ichiqtiy? nispa. Hinan paykunaqa kinsa chunka qolqeta Judas Iscarioteman qorqanku.

¹⁶Chaymantapachataq imaynatachus Jesusta hap'ichinanpaq yuyaykurqan.

¹⁷Mana Qonchuyoq T'anta mikhunanku Fiesta qallariy p'unchaypitaq yachachisqankunaqa Jesusman asuykuspa tapurqanku: — Pascua mikhunata mikhunanchispaqqa, ¿maypin wakichimunaykuta munanki? nispa.

¹⁸Jesustaq nirqan: — Llaqtata riychis nisqay runaqta, hinaspa nimuychis, yachachikuqmi nin: Wañuchiwananku tiempon qayllaykamunña, wasiykipin yachachisqaykunawan Pascua mikhunata mikhusaq, nispa.

¹⁹Hinan yachachisqankunaqa Jesuspa kamachisqanta hina ruwarqanku, hinaspan chay mikhunata wakichirqanku.

²⁰Tutayaykuqtintaq Jesusqa chunka iskayniyoq yachachisqankunawan mikhuq tiyaykurqan.

²¹Paykuna mikhushaqtinkutaq Jesusqa nirqan: — Cheqaqtan niykichis, hukniykichismi ñoqata hap'ichiwanqa, nispa.

²²Hinan paykunaqa sapankanku sinchi llakisqa tapuyta qallarirqanku: — Señor, ¿ñoqachu kani? nispa.

²³Hinaqtinmi Jesusqa nirqan: — Pichus ñoqawan kuska puruñaman makinta challpuqmi ñoqata hap'ichiwanqa.

²⁴Runaq Churinqa wañunqa Diospa Simin Qelqapi paymanta nisqaman hinan. Ichaqa, ¡ay, Runaq Churinta hap'iykachiq runamanta! Allinmi kanman karqan chay runapaqqa mana naceynin, nispa.

²⁵Chaymi payta hap'ichiq Judasqa tapuykurqan: — Yachachikuq, ¿icha ñoqachu kani? nispa. Jesustaq nirqan: — Arí, qanmi kanki, nispa.

²⁶Paykuna mikhushaqtintaq Jesusqa t'antata hap'iykuspa Diosman graciasta qospa phasmirqan, hinaspan yachachisqankunaman qorqan: — Hap'iychis, mikhuychis, kayqa cuerpoymi, nispa.

²⁷Vinoyoq vasotapas hap'illarqantaq, hinaspan Diosman graciasta qospa paykunaman qorqan: — Llapaykichis kay vasomanta ukyaychis,

²⁸kayqa Diospa rimanakuyninta cheqaqchaq yawarniymi, askha runaq huchankuna pampachasqa kananpaqmi hich'asqa kanqa, nispa.

²⁹Niykichismi, kunanmantaqa manañan kay uvas vinotaqa ukyasaqchu, aswanpas Yayaypa qhapaqsuyunpiñan mosoq vinota qankunawan ukyasaq, nispa.

³⁰Himnota takispankuñataq Olivos orqoman rirqanku.

³¹Chaypin Jesusqa yachachisqankunata nirqan: — Llapallaykichismi kunan tuta ñoqata saqerpariwankichis. Diospa Simin Qelqan nin: “Diosmi michiqta k'irinqa, ovejakunataq ch'eqeripunqaku”, nispa.

³²Kawsarimpusqay qhepatan ichaqa, ñawpaqeykichista Galilea provinciaman risaq, nispa.

³³Chaymi Pedroqa payta nirqan: — Llapaña saqerparisunki chaypas, manan ñoqaqa hayk'aqpas saqesqaykichu, nispa.

³⁴Hinan Jesusqa Pedrota nirqan: — Cheqaqtan niyki, kunan tutan manaraq gallo waqashaqtin, kinsa kutita negawanki, nispa.

³⁵Pedrotaq payta nirqan: — Qanwan kuska wañunay kanman chaypas, manapunin negasqaykichu, nispa.

³⁶Jesusmi Getsemaní huertaman chayaspa yachachisqankunata nirqan: — Kaypi tiyashaychis Diosmanta haqaypi mañakamunaykama, nispa.

³⁷Hinaspan Jesusqa Pedrota, Zebedeoq iskaynin churintawan pusaspa anchatapuni llakikuspa

³⁸paykunata nirqan: — Llakikuymantan sonqoy phatarqoq hinallaña kashan. Kayllapi kashaychis, rikch'aysiwaychis, nispa.

³⁹Asllata ñawpaqman rispataq, pampakama k'umuykukuspa Diosmanta mañakurqan: — Yayáy, atikuqtinqa kay ñak'arinata ñoqamanta anchhurichiy, ichaqa ama ñoqaq munasqaychu kachun, aswanpas qanpa munasqayki kachun, nispa.

⁴⁰Yachachisqankunaman kutispataq puñushaqta paykunata tarirqan, hinaspan Pedrota nirqan: — ¿Manachu huk horallatapas rikch'aysiwayta atirqankichis?

⁴¹Rikch'ashaychis, Diosmanta mañakuychis, ama wateqasqa kanaykichispaq. Sonqoqa munallanpunin, aycha cuerpon ichaqa pisi kallpa, nispa.

⁴²Iskay kutipi rispataq Jesusqa huktawan Diosmanta mañakurqan: — Yayáy, ñak'arinaypuni kaqtinqa, munayniyki ruwasqa kachun, nispa.

⁴³Kutimuspataq yachachisqankunata puñushaqllatataq tarirqan, paykunataqa misk'i puñuymi aysasharqan.

⁴⁴Paykunata saqespataq kinsa kutita rispa Diosmanta mañakurqan chay kikin simikunallawantaq.

⁴⁵Hinaspan yachachisqankunaman kutispa nirqan: — ¿Puñushankichisraqchu? ¿Samashankichisraqchu? Horan chayamunña. Runaq Churinqa huchasapakunaman hap'ichisqa kananpaq.

⁴⁶Hatariychis, haku, hap'ichiwaqniymi chayamunña, nispa.

⁴⁷Jesús rimashallaqtinraqmi Judasqa hamurqan, paymi chunka iskayniyoq yachachisqankunamanta huknin karqan. Judaswanmi espadakunantin k'aspikunantin askha runakuna hamurqanku, chaykunatan sacerdote umallikuna judío kurak runakunapiwan kachamurqanku.

⁴⁸Hap'ichiqnin Judastaq paykunata yachaykachispa nimusqa: Pitachus ñoqa much'aykusaq, chaytan hap'inkichis, nispa.

⁴⁹Jesusman asuykurqospataq: — Yachachiqníy, napaykuykin nispa, Jesusta much'aykurqan.

⁵⁰Chaymi Jesusqa Judasta nirqan: — Amigo, ¿imamanmi hamushanki?[14] nispa. Hinaqtinmi Jesustaqa presota hap'irqanku.

⁵¹Chayllamanmi Jesuspa huknin yachachisqanqa espadanta horqokurqan, hinaspan uma sacerdoteq kamachinta waqtaspa ninrinta qhorurqorqan.

⁵²Chaymi Jesusqa nirqan: — Espadaykita waqaychay churananman, espadawan maqanakuqkunaqa espadawan wañuchisqallataqmi kanqaku.

⁵³Munaspayqa Yayaymantan mañakuyman, hinan payqa kunanpacha waranqa-waranqa angelkunata kachamuwanman. ¿Manachu chayta yachanki?

⁵⁴Chay hinata ruwaqtiyqa, ¿imaynatataq chay hinapuni kanan kaq Diospa Simin Qelqaqa hunt'akunman? nispa.

⁵⁵Chay raton Jesusqa runakunata nirqan: — ¿Suwaman hinachu hamurqankichis espadakunantin k'aspikunantin hap'iwanaykichispaq? Sapa p'unchaymi qankunawan kasharqani Dios yupaychana wasipi yachachispa, manataqmi hap'iwarqankichischu.

⁵⁶Aswanpas kaykunaqa profetakunaq qelqasqankuna hunt'akunanpaqmi suceden, nispa. Chay raton llapan yachachisqankunaqa sapallanta Jesusta saqerparispa ayqerqanku.

⁵⁷Hap'iqninkunataq Jesustaqa uma sacerdote Caifasman aparqanku, chaypin kamachikuy simita yachachiqkuna kurak runakunapiwan huñunasqa kasharqanku.

⁵⁸Pedrotaq ichaqa Jesuspa karu qhepanta rirqan uma sacerdoteq pationkama. Ukhuman haykuspataq Dios yupaychana wasi guardiakunawan tiyasharqan imaynapichus chaykuna tukukunanta yachananpaq.

⁵⁹Sacerdote umallikunan umalli runakunaq huñunakuyninpi kaqkunapiwan Jesús contra llulla testigota maskharqanku payta wañuchinankupaq.

⁶⁰Ichaqa manan ima huchallatapas tarirqankuchu, askhaña llulla testigokuna hamushaqtinpas. Qhepatan ichaqa iskay llulla testigokuna hamuspa

⁶¹nirqanku: — Kay runaqa nirqanmi, Dios yupaychana wasitan thuniyman, kinsa p'unchaypitaq sayarichiyman, nispa.

⁶²Chaymi uma sacerdoteqa sayarispa Jesusta nirqan: — ¿Manachu imatapas kutichikunki? Chay rimasqankuqa, ¿hinapunichu? nispa.

⁶³Jesustaq ichaqa ch'inlla kakurqan. Uma sacerdotetaq payta nirqan: — Kawsaq Diospa sutinpin kamachiyki, sut'inta rimariy, ¿qanchu Diospa Churin Cristoqa kanki? nispa.

⁶⁴Jesustaq payta nirqan: — Arí, nisqayki hinan. Chaywanpas niykichismi, pisi tiempomantan Runaq Churinta rikunkichis atiyniyoq Diospa paña ladonpi tiyashaqta, hanaq pacha phuyupi hamushaqtawan, nispa.

⁶⁵Hinaqtinmi uma sacerdoteqa phiñakuymanta p'achanta llik'ikuspa nirqan: — ¡Kay runaqa Dios contran riman! ¿Imapaqñataq testigokunata astawan munasunchis? ¡Uyarishankichismi Dios contra rimasqanta!

⁶⁶¿Ima ninkichistaq? nispa. Paykunataq nirqanku: — ¡Huchallikunmi, wañuchun! nispanku.

⁶⁷Hinaspanmi uyanpi thoqaykurqanku, ch'aqlarqanku, hukkunataq saqmaspa nirqanku:

⁶⁸— Yaw, Cristo, pichus ch'aqlashasunki chayta watumuy, nispanku.

⁶⁹Chaykamataq Pedroqa hawa patiopi tiyasharqan. Chayllamanmi huk warmi kamachi payman asuykuspa nirqan: — Qanpas Galilea provinciamanta Jesuswanmi kasharqanki riki, nispa.

⁷⁰Pedrotaq lliwpa ñawpaqenpi negakurqan: — Manan yachanichu, imatachá rimakushankipas, nispa.

⁷¹Punkuta Pedro lloqsishaqtintaq huk warmi kamachipas payta rikurqan, hinaspan chaypi kaqkunata nirqan: — Kay runaqa Nazaret llaqtamanta Jesuswanmi kasharqan, nispa.

⁷²Pedrotaq juraspa huktawan negakurqan: — ¡Manan chay runataqa reqsinipaschu! nispa.

⁷³Chhikan qhepatataq chaypi kaqkunaqa asuykuspa Pedrota nirqanku: — Qanpas paykuna t'aqamantapunin kanki, rimayniykipas sut'in rikch'akushan, nispa.

⁷⁴Hinan Pedroqa pay kikinta ñakakusparaq jurarqan: — Manapunin chay runataqa reqsinichu, nispa. Chayllamanmi galloqa waqarqan.

⁷⁵Chaymi Pedroqa yuyarirqan: — “Manaraq gallo waqashaqtinmi kinsa kutita negawanki” nispa Jesuspa nisqanta. Chaymi Pedroqa hawaman lloqsispa khuyayta waqaykurqan.